Read Chimborazo Highland Quichua GÉNESIS 30 Bible Online

GÉNESIS 30 - Chimborazo Highland Quichua bible

GÉNESIS 30

¹Raquelca mana huachaj cashpami, paipaj ñañata envidiashpa pai shinallataj huahuacunata charinata munashpa Jacobtaca: — Ñucamanpish huahuacunata cui, mana cashpaca huañushami — nirca.

²Chaimi Jacobca, Raquelhuan p'iñarishpaca: — Ñucaca Taita Dios cashpatajmari, canmanca huahuacunata cusha. Ashtahuanpish paimi cantaca huahuacuna illajlla cachun munashca — nirca.

³Chaimi Raquelca: — Shinashpaca cunanca ñucapajta ruraj Bilha huarmipi chayaripai. Pai ñuca cunguripi huachajpica, ñuca huachashca shinallatajmi canga. Chashnami ñucapish huahuacunayuj tucusha — nirca.

⁴Shina nishpaca Raquelca paipajta ruraj Bilha huarmita paipaj huarmi cachun cujpimi, Jacobca paipi chayarirca.

⁵Bilha huarmi chichushpaca, shuj c'ari huahuatami huacharca.

⁶Chaimi Raquelca: “Taita Diosca ñuca mañashcata uyashpa, ñucatapish alli cashcata ricuchishpami cai c'ari huahuata cuhuan” nishpami, paitaca Danta shutichirca.

⁷Raquelpajta ruraj Bilha huarmica Jacobpajta cutinllataj chichushpaca shujtaj c'ari huahuatami huacharca.

⁸Chaimi Raquelca: “Ñuca ñañahuan p'iñanacushpalla causacujpipish, Taita Diosmari mishachishca” nishpami, paitaca Neftalita shutichirca.

⁹Lea huarmipish ña mana ashtahuan huachaipaj cashpami, paipajta ruraj Zilpa huarmita Jacobman paipaj huarmi cachun curca.

¹⁰Leapajta ruraj Zilpa huarmipish Jacobpajtaca shuj c'ari huahuatami huacharca.

¹¹Chaimi Leaca: “Ñucapajca jatun cushicunamari” nishpa paitaca, Gadta shutichirca.

¹²Leapajta ruraj Zilpa huarmica Jacobpajtaca shujtaj c'ari huahuatami huacharca.

¹³Chaimi Leaca: “Cai huahuaca ñuca cushijlla canapajmari. Tucui huarmicunami ñucataca chai huarmica cushicucunmari ningacuna” nishpami, paitaca Aserta shutichirca.

¹⁴Rubenca trigota cozichai punllacunami mandragoracunata chagrapi japishpa, paipaj mama Leapajman apamujpi, Raquelca Leataca: — Cambaj churi apamushca mandragoracunata ashata cui — nirca.

¹⁵Chaimi Leaca: — ¿Ñuca cusata can japishpaca, allitami rurani yuyanguichu? ¿Chai jahuachu, ñuca churi apamushca mandragoracunatapish quichusha yuyangui? — nijpimi Raquelca: — Cambaj churi apamushca mandragoracunata ashata carajpica, cunan tutaca Jacobca canhuanmi dorminga — nirca.

¹⁶Chaimi Leaca chagramanta Jacob chishita tigracujpi tupanaman llujshishpaca: — Cunan tutaca ñucahuanmi dormina cangui. Ñucaca canhuan dormingapajmi, Raquelmanca ñuca churi apamushca mandragorata ña cararcani — nijpimi, Jacobca chai tutaca Leahuan dormirca.

¹⁷Taita Diosca Lea mañashcata uyashpa cujpimi, Leaca Jacobpajta chichushpa, shujtaj c'ari huahuata huacharca. Chaihuanca pichca churicunatami charirca.

¹⁸Chaimi Leaca: “Ñucapajta ruraj huarmita ñuca cusaman cushcamantami, Taita Diosca ñucapaj allita rurashca” nishpami chai huahuataca Isacarta shutichirca.

¹⁹Chai q'uipaca Leaca cutinllataj chichushpami, shujtaj c'ari huahuata huacharca. Chaihuanca sujta churicunatami Jacobpajta charirca.

²⁰Leaca: “Taita Diosmari ñucamanca shuj sumaj allita cuhuan. Cunanca sujta churicunayuj cashcamanta ñuca cusaca ñucallahuanmi causanga” nishpami, Zabulonta shutichirca.

²¹Leaca tucui huahuacunapaj q'uipaca huarmi huahuatami huacharca. Chaitaca Dina shutitami shutichirca.

²²Taita Diosca Raquelta yuyarishpa, paita uyashpami, huahuacunata curca.

²³Chaimi chichushpa shuj c'ari huahuata huachashpaca: “Ñuca mana huachaj cashpa pingaihuan canataca Taita Diosmi anchuchishca.

²⁴Mandaj Diosca, ñucamanca shujtaj huahuatapish cushpa alli canman” nishpami, chai huahuataca Joseta shutichirca.

²⁵Joseta Raquel huachajpimi, Jacobca Labantaca: — Ñuca llajtamanmi rigrini.

²⁶Imamanta cambajta rurashpa causacushcataca canllataj yachanguimi. Ñucaca ñuca huarmicunamantami cambajta rurashpa causarcani. Cunanca ñuca llajtamanmi rigrini. Ñuca huarmicunata, ñuca huahuacunata cushpa cachailla — nirca.

²⁷Chaimi Labanca: — Ñuca canpi alli ricurishca cajpica, ñucahuan causashunlla. Mandaj Diosca canmantamari ñucamanca achca allicunata cushca. Chaitaca allimi yachani.

²⁸Cashnapish nircami: Mashnata pagajpitaj ñucallahuantaj catingui chaita huillai pagashallami — nircami.

²⁹Chaimi Jacobca, Labantaca: — Cambajta ñuca ima shina rurashpa causajtapish, cambaj animalcunapish ñucahuanca ima shina cajtapish canllataj yachanguimi.

³⁰Ñuca shamunapajca ashallatami charishca carcangui. Cunanca achcatamari mirarin. Ñuca caiman shamujpimi, Mandaj Diosca canmanca achca allicunata cushca. Cunanca ñuca huarmicunapaj, ñuca huahuacunapajca ¿ima horataj trabajashari? — nirca.

³¹Shina nijpimi Labanca: — ¿Imatataj cuchun ningui? — nijpi Jacobca: — Imata mana cuchun ninichu. Ashtahuanpish ñuca mañashcata can rurasha nijpica, cambaj ovejacunata michishpa catishallami.

³²Cunanllatajmi ñucaca cambaj canlla animalcunapajman rishpa yana, puzu, muru ovejacunata, yana, puzu, muru chivocunata agllashpa ch'icanchigrini. Cambajta rurashcamanta ñuca japinaca chaillami canga.

³³Chaimi caya punllacuna ñucata ricunaman shamushpaca, imatapish cashcallata ruraj cajta ricungui. Ñuca canlla animalcunapica puzucunalla, murucunalla, chivocunapish puzucunalla murucunalla yanacunalla mana cajta ricushpaca shuhua cashcatami ricungui — nircami.

³⁴Shina nijpimi Labanca: — Allimi, can nishca shina cachunlla — nirca.

³⁵Shina nishca jahuami Labanca, chai punllallataj yana, puzu, muru ovejacunatapish, yana, puzu, muru chivocunatapish pacalla agllashpa paipaj huahuacuna michichun cacharca.

³⁶Chai animalcunataca paipish Jacobpish maipi causacunmanta quimsa punllata purina carupimi michichun cacharca. Ashtahuanpish Jacobca, Labanpaj caishuj ovejacunatami michirca.

³⁷Chaipimi Jacobca álamo, avellano, castaño yuracunamanta caspicunata p'itishpa jahua carata caipi chaipi anchuchishpa murujllata rurarca.

³⁸Chashna rurashpaca, animalcuna yacuta ubyanacunapimi churarca. Ovejacuna yacuta ubyanaman c'uchuyashpaca chai caspicuna jahuapimi japinacuj carca.

³⁹Chaipi chichushpami ovejacunaca yanata, puzuta, muruta huachaj carca.

⁴⁰Chai bachujcunataca Jacobca, Labanpaj ovejacunamanta ch'icanchishpami, paipaj ovejacunahuan tandachishpa churaj carca. Jacobca paipaj oveja canllataca Labanpaj oveja canllamanta ch'icanmi churarca.

⁴¹Jacobca ovejacuna yacuta ubyanacunapica jatun alli ovejacuna japinacucujllapimi, muru caspicunata churaj carca. Chai caspicunata ricushpa ovejacuna japinacushpaca, muru bachujcunatami huachaj carca.

⁴²Ashtahuanpish uchilla yanga ovejacuna shamushpa japinacucujpica, chai muru caspicunataca mana churajchu carca. Chaimi uchilla yanga ovejacuna Labanpajca saquirij carca. Jacobpajca jatun alli ovejacunami carca.

⁴³Chashnami Jacobca achcata charijyashpa catirca. Ovejacunata, camellocunata, burrocunata, paipajta ruraj c'aricunata, huarmicunatapishmi achcata charirca.