Read Chimborazo Highland Quichua GÉNESIS 32 Bible Online

GÉNESIS 32 - Chimborazo Highland Quichua bible

GÉNESIS 32

¹Jacob pai maiman ricushca ñanllatataj rijpica, Taita Diospaj angelcunami tupanaman llujshirca.

²Paicunata ricushpami Jacobca: “Caipica Taita Diospaj carpa huasicunamari” nishpa, chai pambataca Mahanaimta shutichirca.

³Chaipi cashpami Jacobca, Edompi caj Seir pambapi causacuj paipaj huauqui Esaumanca pai tigracushcata huillachun huillajcunata cacharca.

⁴Paicunataca cashna nishpami cacharca: “Ñuca amo Esaumanca cashna ninguichij: Cambajta ruraj Jacobca: Labanhuanmi causarcani. Cunancamami paihuan carcani.

⁵Ñucaca vacacunata, burrocunata, ovejacunata, ñucapajta ruraj c'aricunata, huarmicunatapishmi charini. Cunanca canpi alli ricuringapajmi rogarinaman cachani ninmi” nichunmi cacharca.

⁶Chai huillajcuna Jacobpajman tigramushpaca: — Ñucanchijca cambaj huauqui Esaumanca ñami huillamunchij. Paipish canta tupanamanmi shamucun. Paihuanca 400 runacunami shamucun — nircami.

⁷Chaimi Jacobca jatunta mancharishpa llaquirishpaca paipaj ovejacunata, vacacunata, camellocunata, paihuan caj gentecunatapish ishqui mirgapi ch'icanchirca.

⁸“Esaú shamushpa shuj mirgata llaquichijpica, caishuj mirgaca miticushpa richunlla” yuyashpami chashna rurarca.

⁹Chai q'uipami Jacobca: “Ñuca abuelo Abrahampaj, ñuca yaya Isaacpaj Mandaj Taita Dios, quiquinmi ñucataca: Cambaj quiquin llajtaman, cambaj quiquin familiapajman tigrailla. Ñucami cantaca maipipish cuidasha nircangui.

¹⁰¡Tucui caicunata quiquin llaquishpa cuna cashcata mana chasquipaj cajpipish cambajta ruraj ñucamanca cai tucuitami cushcangui! Ñucaca cai Jordán jatun yacutaca tauna caspita aisashcallami ch'imbashpa rircani. Ashtahuanpish cunanca ishqui mirgapi ch'icanyachishca animalcunatapish, runacunatapishmi charini.

¹¹Ñuca huauqui Esaú shamushpa ñuca huarmicunata huahuacunandij huañuchinatami manchani. Cunanca ñuca huauquipaj maquimanta quishpichihuai.

¹²Quiquinca ñucataca: Ñucami cambajca allicunata rurasha. Cambaj huahua huahuacunaca mama cucha uripi tiyaj t'iyu allpa shinami canga. Chashna cashcamanta pi mana yupai tucuipajmi canga nircanguimari” nishpami mañarca.

¹³Chai tutaca Jacobca chaillapitajmi dormirca. Pai charishca animalcunamantaca ashtahuan allicunallatami paipaj huauqui Esauman convidangapaj agllarca.

¹⁴Paica 200 chivacunata, ishqui chunga chivocunata, 200 ovejacunata, ishqui chunga carnerocunata,

¹⁵quimsa chunga camellocunata cunanlla huacharishca huahua camellocunandij, chuscu chunga vacacunata, chunga huagracunata, ishqui chunga burracunata, chunga burrocunatami ch'icanchirca.

¹⁶Chaicunataca tucui animalcunata ch'ican ch'ican churashpa, paipajta rurajcunaman cushpami: — Cunanca cancunaca shuj canlla animalcunamantaca, caishuj animalcunamanta carupi carupi ch'ican ch'ican pushashpa ñucata ñaupashpa richij — nirca.

¹⁷Puntapi rijtaca: — Ñuca huauqui Esaú tupashpa: ¿Pitaj cambaj amo? ¿Maimantaj ricungui? ¿Cai animalcunaca pipajtaj? nijpica:

¹⁸Cai animalcunataca cambajta ruraj Jacobmi can ñucanchij amo Esauman convidachun cacharca. Paipish ñucanchijta catishpami shamucun ningui — nishpami mandarca.

¹⁹Chaipaj cati rijtapish, ishquipaj cati rijtapish, huashan huashan rij tucui caishujcunatapish mandashpaca: — Esaú tupajpica, cancunapish chashnallataj ninguichij.

²⁰Cambajta ruraj Jacobpish ñucanchijta catishpallatajmi shamucun nishpapish huillanguichij — nircami. Jacobca: “Ñuca huauqui Esauca p'iña shamucushpapish, cai animalcunata ñaupachishpa cachashpa paiman convidajpica, q'uipallata ñucahuan tupashpa alli chasquingapishchari” yuyashpami chashna cacharca.

²¹Esauman convidana animalcunata, chaicunata pushajcunatapish ñaupachishpa cachashpaca, Jacobca chai tutaca maipimi carpa huasicunata shayachishcallapitajmi dormingapaj saquirirca.

²²Ashtahuanpish Jacobca chai tutallataj jatarishpami, paipaj ishqui huarmicunata, paicunapajta ruraj ishqui huarmicunata, paipaj chunga shuj churicunatapish pushashpa Jaboc shuti yacutaca maitami ch'imbanallata ch'imbarcacuna.

²³Chai q'uipaca tucui pai imalla charishcacunatami Jaboc yacuta ch'imbachirca.

²⁴Chaipi pailla saquirijpimi, shuj runaca achijyangacama Jacobhuan macanacurca.

²⁵Chai runaca Jacobta mana mishai tucushpa, changa mucupi huajtajpimi, Jacobpaj changa mucuca lisiarirca. Chashna cashpapish Jacobca macanacucurcallami.

²⁶Chai runaca Jacobtaca: — Ña achijyagrinca cachari — nijpimi Jacobca: — Ñucata alli cashca cachun mana nijpica, manataj cacharishachu — nirca.

²⁷Chaimi chai runaca: — ¿Ima shutitaj cangui? — nijpi: — Ñucaca Jacobmi cani — nirca.

²⁸Chaipimi chai runaca: — Canca cunanca ña mana Jacob shutichu cangui. Taita Dioshuanpish, runacunahuanpish macanacushpa mishashcamanta, Israel shutimi cangui — nirca.

²⁹Jacobca paitapish: — Cunantajca cambaj shutita huillayari — nijpimi paica: — Ñuca shutitaca ¿imapajtaj yachasha ningui? — nirca. Shina nishpami chai runaca Jacobtaca chaillapitaj alli cashca cachun nirca.

³⁰Chaimi Jacobca chai pambataca: “Taita Diosta ñahui ñahui ricushpapish, manarajmari huañunichu” nishpa Penielta shutichirca.

³¹Peniel pambamanta Jacob ña ch'imbashca q'uipami intica llujshirca. Paica changa nanaihuan cashpami, cojashpa cojashpa rirca.

³²Jacobpaj changapi huajtashpa lisiashcamantami, israelcunaca cunan punllacunacama ima animalpaj cajpipish, changa aichataca manataj micuncuna.