Read Chimborazo Highland Quichua GÉNESIS 33 Bible Online

GÉNESIS 33 - Chimborazo Highland Quichua bible

GÉNESIS 33

¹Jacobca paipaj huauqui Esautaca, 400 gentecunata pushashca shamucujta ricushpami, paipaj huarmi Leatapish paipaj huahuacunandij, Raqueltapish paipaj huahuacunandij, paicunapajta ruraj ishqui huarmicunatapish paicunapaj huahuacunandij ch'ican ch'icanpi churarca.

²Chai q'uipaca, Jacobpaj huarmicunapajta ruraj huarmicunatami paicunapaj huahuacunandij puntapi churarca. Chai huashapica Leatami paipaj huahuacunandij churarca. Chaicunapaj q'uipataca Raqueltami paipaj churi Josendij churarca.

³Jacobca paicunapaj puntapi rishpami, paipaj huauquipajman chayangacama canchis cutin pambaman tupajta cumurihuan cumurihuan rirca.

⁴Ashtahuanpish Esauca Jacobta tupanaman callpashpa rishpaca paipaj cungapi ugllarishpa muchashpami ishquindijtaj huacanacurca.

⁵Esauca, chai huarmicunatapish, huahuacunatapish ricushpami: — ¿Paicunaca picunataj? — nijpi Jacobca: — Cambajta rurajman, Taita Dios cushca ñuca huahuacunami — nirca.

⁶Chai q'uipaca Jacobpaj huarmicunapajta ruraj huarmicunami paicunapaj churicunandij Esaupajman c'uchuyashpa pambaman tupajta cumurircacuna.

⁷Leapish paipaj churicunandij Esaupajman c'uchuyamushpami pambaman tupajta cumurirca. Raquelpish paipaj churi Josendij Esaupajman c'uchuyamushpami pambaman tupajta cumurirca.

⁸Chai q'uipami Esauca Jacobtaca: — ¿Imata yuyashpataj, chai tucui animalcunataca ñaupachishpa cacharcanguiyari? — nijpi Jacobca: — Can ñuca amopi alli ricuringapajmi chashna cacharcani — nirca.

⁹Chaimi Esauca: — Ñucaca pajtatami charini. Ñuca huauquilla, cambaj cashcaca cambajllataj cachun — nirca.

¹⁰Shina nijpipish Jacobca: — Cambaj ñahuipi ñuca alli ricurishca cajpica, ñuca canman convidashcacunataca chasquipailla nishpami rogapani. Cambaj ñahuita ricushpaca, Taita Diosta ricushca shinamari cushicuni. Canca ñucataca jatun c'uyaihuanmari chasquihuangui.

¹¹Canman convidangapaj ñuca apamushcacunataca chasquipailla. Taita Dios ñucaman cushcamanta tucui caicunaca ñucapajmi — nicujllapimi, Esauca japirca.

¹²Esauca: — Cunanca ñucaca ñaupashpa risha. Tucuicuna ñucahuan jacuchijlla — nircami.

¹³Jacobca, Esautaca: — Ñuca amitolla ñuca huahuacunapish uchillaraj cashcataca canllataj yachanguimi. Ovejacunapish, vacacunapish cunanlla huachashcatamari charini. Ovejacunaca shaicushpa shuj punllallapimari tucui huañunga.

¹⁴Cunanca ñuca amito cambajta ruraj ñucata ñaupashpa ripailla. Ñucaca animalcunapish, ñuca huahuacunapish purishcallapi allimantalla purishpa Seir pambapi caj can ñuca amopajman chayangacama catimushallami — nirca.

¹⁵Chaimi Esauca: — Allimi, shina cajpipish ñucahuan shamuj gentecunamanta maijancunataca canta pushamuchun saquisha — nijpimi Jacobca: — Ñuca amito, cambaj ñahuipi ñuca alli ricurishca cajpica, chaitapish ama ruraichu — nirca.

¹⁶Esauca chai punllallatajmi Seirman tigrashpa rircalla.

¹⁷Jacobca, Sucotmanmi rirca. Chaipimi pai causanapaj shuj huasitapish, animalcunapaj ramadacunatapish rurarca. Chaimi chai pambataca Sucotta shutichirca.

¹⁸Jacobca Padan-arammanta tigrashpaca Canaanpi caj Siquem puebloman ima mana tucushca alli chayashcamantami, chai pueblo ch'imbapurallapi causanata callarirca.

¹⁹Paipaj carpa huasicunata shayachishca pamba allpataca, Siquempaj yaya Hamorpaj churicunamanmi patsaj cullquipi randirca.

²⁰Shuj altarta chaipi rurashpaca, “El-Elohe-Israeltami” shutichirca.