Read Chimborazo Highland Quichua GÉNESIS 35 Bible Online

GÉNESIS 35 - Chimborazo Highland Quichua bible

GÉNESIS 35

¹Taita Diosca Jacobtaca: “Jatari, Bet-elman huichiyashpa chaipi causagri. Chaipica cambaj huauqui Esauta miticushpa ricujpi, ricurij Taita Diospaj shuj altarta ruragri” nijpimi,

²Jacobca paihuan caj tucuicunataca: — Cancunapurapi caj rurashcalla shujtaj dioscunataca anchuchishpa shitaichij. Tucuicuna armashpa, shujtaj churanacunata churashpa allichirichij.

³Cunanca Bet-elman huichiyashunchij. Taita Diosca ñuca llaquilla puricujpipish tucui ñanpimi ñucataca huaquichihuarca. Paita pagui ningapajmi, ñucaca chaipi shuj altarta Taita Diospaj ruragrini — nirca.

⁴Chaimi paicunaca rurashcalla shujtaj dioscunatapish, rinrinpi aparishca zarcillocunatapish Jacobman tucuita curcacuna. Jacobca paicuna cushcacunataca, Siquem pambapi caj encina yura ucupimi pambashpa pacarca.

⁵Paicuna Bet-elman ña ricujpimi, Taita Diosca chai muyundij llajtacunapi causajcunaman jatun manchaita cujpi Jacobtapish, paihuan caj tucuicunatapish llaquichingapajca mana catishpa rircacuna.

⁶Jacobca tucui paihuan cajcunandijmi, Canaán llajtallapitaj caj Bet-elman chayarca. Chai pambaca ñaupamanca Luz nishcami carca.

⁷Chaiman chayashpaca, chaipi shuj altarta rurashpami, chai pambataca El-bet-elta shutichirca. Paipaj huauquita miticushpa ricujpi Taita Dios chaipi paiman ricurishcamantami chai shutita shutichirca.

⁸Rebecata huiñachij Débora huarmi chaipi huañujpimi paitaca Bet-el ura nijllapi caj encina yura ucupi pambarca. Chaimi chai yurataca: “Alón-bacutta” shutichirca.

⁹Jacobmanca, Padan-arammanta tigracujpimi Taita Diosca cutinllataj ricurishca carca. Chaipimi canmanca achca allicunatami cusha nishpaca,

¹⁰cashna nirca: “Cambaj shutica Jacobmi. Ashtahuanpish cunanmantaca ña mana Jacob shutichu cangui. Israel shutimi cangui” nishpami, Israel shutita shutichishca carca.

¹¹Taita Diosca chaillapitajmi cashnapish nirca: “Ñucaca Ñucalla Tucuita Rurai Tucuj Taita Diosmi cani. Canca huahuacunayuj tucushpa achcata mirarilla. Canmantami shuj jatun llajtapish, achca aillucunapish tucunga. Cambaj huijsamanta llujshishca huahua huahuacunaca jatun mandajcunami canga.

¹²Abrahamman, Isaacman cushca llajtataca canman, cambaj huahua huahuacunamanpishmi cusha” nircami.

¹³Shina nishpaca Taita Diosca Jacobhuan parlanacucushca pambamantaca rircallami.

¹⁴Chaimi Jacobca, Taita Dios paihuan maipi parlanacushcata ricuchij cachun shuj rumita japishpa chaipi shayachirca. Chai rumi jahuapica vinota aceitetami tallirca.

¹⁵Jacobca Taita Dioshuan parlanacushca pambataca, Bet-eltami shutichirca.

¹⁶Bet-elmanta Efrata puebloman ricujpimi, chaiman chayanapaj ashalla illajpi Raquelca huachana pajtajpi huacharca. Ashtahuanpish paica mana alli ungurcachu.

¹⁷Yallitaj nanaihuan ancha cajpimi, partera huarmica: “Ama manchaichu shujtaj c'ari huahuahuanmari ña charingui” nirca.

¹⁸Ñalla huañugrishpa paipaj alma llujshigrijpimi chai huahuataca Benonita shutichirca. Ashtahuanpish Jacobca Benjamintami shutichirca.

¹⁹Chashnami Raquelca huañurca. Paitaca Efrataman rina ñanpimi pambarcacuna. Chaillatajmi cunanca Belén.

²⁰Jacobca Raquelta pambashca jahuapica, shuj jatun pircatami rurarca. Raquelta maipi pambashcaca cunancama ricunallami.

²¹Yaya Israel chaimanta rishpaca, Migdal-edar nishca torre chaininijllapimi paipaj carpa huasita shayachishpa causarca.

²²Yaya Israel ña chaipi causacujpimi, Rubenca paipaj yayapaj Bilha shuti caishuj huarmipajman rishpa paihuan dormirca. Chaitaca yaya Israelca yachaj chayarcami. Yaya Israelpaj churicunaca chunga ishquimi carca.

²³Leahuan charishca churicunaca caicunami: Punta churica Rubén. Q'uipa churica Simeón, Leví, Judá, Isacar, Zabulón shutimi carcacuna.

²⁴Raquelhuan charishca churicunaca José, Benjamín shutimi carcacuna.

²⁵Raquelpajta ruraj Bilhahuan charishca churicunaca Dan, Neftalí shutimi carcacuna.

²⁶Leapajta ruraj Zilpahuan charishca churicunaca Gad, Aser shutimi carcacuna. Paicunaca yaya Jacob, Padan-arampi causacujpi chaipi huacharishcacunami.

²⁷Jacobca paipaj yaya Isaacta ricungapajmi paipaj yaya causacun Arba pueblopi caj Mamreman rirca. Chai puebloca Abraham Isaac causashca Hebrón pueblomi.

²⁸Isaacca, 180 huatacunatami causarca.

²⁹Isaacca uni huatacunata, yallitaj yuyajcamami causarca. Isaacca espíritu paimanta llujshijpi huañushpaca, paipaj ñaupa gentecunahuanmi tandanacugrirca. Paitaca paipaj churi Esaú, Jacobmi pambarcacuna.