Read Chimborazo Highland Quichua GÉNESIS 36 Bible Online

GÉNESIS 36 - Chimborazo Highland Quichua bible

GÉNESIS 36

¹Edom nishca Esaupaj huahua huahua callari yayacunaca caicunami:

²Esauca cananea huarmicunatami paipaj huarmi cachun japirca. Shujca heteo Elonpaj ushushi Ada huarmimi carca. Caishujca heveo Zibeonpaj churi Anapaj ushushi Aholibama huarmimi carca.

³Caishujca Ismaelpaj ushushi Basemat huarmimi carca. Paica Nebaiotpaj panimi carca.

⁴Ada huarmipi Esaú charishca churica Elifazmi carca. Basemat huarmipi charishca churica Reuelmi carca.

⁵Aholibama huarmipi charishca churicunaca Jeús, Jaalam, Coré shuticunami carca. Chaicunaca Canaanpi Esaú causacujpi chaipi huacharishca huahuacunami.

⁶Esauca paipaj huarmicunata, churicunata, ushushicunata, paipaj huasipi causaj gentecunata pushashpa, Canaanpi causacushpa tucui imalla charishcacunata, huagracunata, animalcunatapish tucuita apashpami paipaj huauqui Jacobmanta ch'ican causangapaj shujtaj llajtaman rirca.

⁷Ishquindijtaj yallitaj charijcuna cashcamantami, tandallaca mana causai tucurcacuna. Paicuna causacun llajtapi tiyaj michina pambacunapish animalcunata michinapajca ña mana pajtarcachu.

⁸Chaimi Edom nishca Esauca, Seir urcupi causarca.

⁹Edom nishca Esaumanta mirarishpa Seir urcupi causajcunaca caicunami.

¹⁰Esaupaj churicunapaj shuticunaca: Ada huarmipi Esaú charishca churica Elifazmi carca. Basemat huarmipi Esaú charishca churica Reuelmi carca.

¹¹Elifazpaj churicunaca Temán, Omar, Zefo, Gatam, Cenaz shuticunami carca.

¹²Esaupaj churi Elifazca, Timna shuti caishuj huarmitapishmi charirca. Chai huarmipica Amalec churitami charirca. Chaicunaca Ada huarmipi Esaú charishca churipaj churicunami carca.

¹³Reuelpaj churicunaca Nahat, Zera, Sama, Miza shuticunami carca. Chaicunaca Basemat huarmipi Esaú charishca churipaj churicunami carca.

¹⁴Zibeonpaj churi Anapaj ushushi Aholibama huarmipi Esaú charishca churicunaca Jeús, Jaalam, Coré shuticunami carca. Chaicunaca Aholibama huarmipi Esaú charishca churicunami carca.

¹⁵Esaupaj huahuacunapurapi mandajcunaca caicunami: Esaupaj punta churi Elifazpaj churicunamanta mandajcunaca Temán, Omar, Zefo, Cenaz,

¹⁶Coré, Gatam, Amalecmi carca. Elifazmanta mirarishpa Canaanpi causaj edomitacunata mandajcunaca chaicunami. Chaicunaca Ada huarmipi Esaú charishca churipaj churicunami carca.

¹⁷Esaupaj churi Reuelpaj huahuacunapurapi mandajcunaca: Nahat, Zera, Sama, Miza shuticunami carca. Reuelmanta mirarishpa Edompi causajcunata mandajcunaca chaicunami. Chaicunaca Basemat huarmipi Esaú charishca churipaj churicunami carca.

¹⁸Aholibama huarmipi Esaú charishca churicunapaj huahua huahuacunapurapi mandajcunaca: Jeús, Jaalam, Coré shuticunami carca. Chaicunaca Ana runapaj ushushi Aholibama huarmipi Esaú charishca churipaj churicunami carca.

¹⁹Edom nishca Esaumanta mirarishcacunaca tucui chaicunami. Paicunaca quiquin aillullatataj mandajcunami carca.

²⁰Chai llajtallapitaj causaj horeo Seirpaj churicunaca: Lotán, Sobal, Zibeón, Aná,

²¹Disón, Ezer, Disán shuticunami carca. Horeo Seirpaj churicunaca chaicunami. Paicunaca Edompi causaj horeocunata mandajcunami carca.

²²Lotanpaj churicunaca Hori, Hemam shuticunami carca. Lotanca Timna shuti panitami charirca.

²³Sobalpaj churicunaca Alván, Manahat, Ebal, Sefo, Onam shuticunami carca.

²⁴Zibeonpaj churicunaca Aja, Aná shuticunami carca. Chai Anami paipaj yaya Zibeonpaj burrocunata shitashca pambapi michicushpaca, achca yacu t'imburishpa llujshicujta japirca.

²⁵Anaca Disón shuti churita, Aholibama shuti ushushitami charirca.

²⁶Disonpaj churicunaca: Hemdán, Esbán, Itrán, Querán shuticunami carca.

²⁷Ezerpaj churicunaca: Bilhán, Zaaván, Acán shuticunami carca.

²⁸Disanpaj churicunaca: Uz, Arán shuticunami carca.

²⁹Horeocunata mandajcunaca: Lotán, Sobal, Zibeón, Aná,

³⁰Disón, Ezer, Disán shuticunami carca. Chaicunaca Seir llajtapi paicunapaj quiquin aillucunata mandajcunami carca.

³¹Israelcuna jatun mandajta manaraj charijpica, Edom llajtataca cai jatun mandajcunami mandacurca:

³²Edom llajtata mandajca Beorpaj churi Belami carca. Paipaj puebloca Dinaba shutimi carca.

³³Bela runa huañujpica, Zerapaj churi Jobabmi paipaj randi mandarca. Paica Bosra pueblomantami carca.

³⁴Jobab huañujpica, Temán llajtamanta caj Husammi paipaj randi mandarca.

³⁵Husam huañujpica, Bedadpaj churi Hadadmi paipaj randi mandarca. Paipaj puebloca Avit shutimi carca. Pai mandacushpami Moab pambacunapi madianitacunahuan macanacushpaca misharca.

³⁶Hadad huañujpica, Masreca pueblomanta caj Samlami paipaj randi mandarca.

³⁷Samla huañujpica, Éufrates yacu c'uchullapi tiyaj Rehobot pueblomanta caj Saulmi paipaj randi mandarca.

³⁸Saúl huañujpica, Acborpaj churi Baal-hananmi paipaj randi mandarca.

³⁹Acborpaj churi Baal-hanán huañujpica, Hadar runami paipaj randi mandarca. Paipaj puebloca Pau shutimi carca. Hadar runapaj huarmica Mizaabpaj churi Matredpaj ushushi Mehetabelmi carca.

⁴⁰Esaupaj huahua huahuacunaca quiquin familiapuracunata, quiquin llajtata mandajcunaca caicunami. Paicunaca: Timna, Alva, Jetet,

⁴¹Aholibama, Ela, Pinón,

⁴²Cenaz, Temán, Mibzar,

⁴³Magdiel, Iram shuticunami carca. Quiquin llajtacunata rurashpa, quiquin aillucunallatataj Edompi mandajcunaca chaicunami carca. Esaullatajmi Edom carca. Paimi edomitacunapaj yayaca carca.