Read Chimborazo Highland Quichua GÉNESIS 37 Bible Online

GÉNESIS 37 - Chimborazo Highland Quichua bible

GÉNESIS 37

¹Jacobca paipaj yaya causashca Canaanpimi causarca.

²Jacobpaj huahua huahua callari yayacunamanta parlashcaca cashnami: Joseca chunga canchis huatacunayuj cashpami, paipaj huauquicunahuan ovejacunata michishpa purij carca. José mosoca Bilha, Zilpa caishuj huarmicunapi paipaj yaya Jacob charishca churicunahuan purishpami, paipaj huauquicuna mana allita rurashcataca, yaya Jacobman huillaj carca.

³Yaya Israelca yuyaj cashpa Joseta charishcamantami, paitaca caishuj churicunata yalli c'uyashpa, paimanca murujlla churanata rurashpa churachirca.

⁴Paipaj huauquicunaca paicunapaj yayaca paicunata yallica Joseta c'uyajta ricushpami, yallitaj p'iñashpa Josehuanca mana rimasha nijcunallapish carca.

⁵Joseca shuj muscuitami muscurca. Chaita paipaj huauquicunaman parlajpicarin, paicunaca ashtahuanmi p'iñarircacuna.

⁶Joseca cashnami nirca: — Uyaichij, cunanca ñuca imata muscushcatami parlagrini:

⁷Tucui ñucanchijmi chagrapi trigota huayungacurcanchij. Chaipica ñuca huayungaca jatarishpa ñapish shayarircallami. Cancunapaj huayungacunapish jatarishpami, ñapish ñuca huayunga muyundijpi shayarishpa cungurircacuna — nircami.

⁸Chaimi paipaj huauquicunaca: — ¿Shinashpaca canchu jatun mandaj tucusha ningui? ¿Canchu ñucanchijta mandasha yuyangui? — nishpa, pai muscushcata José parlajpica, ashtahuan p'iñarcacuna.

⁹Chai q'uipapish Joseca, shujtaj muscuita muscushpami paipaj huauquicunamanca: — Ñucaca shujtaj muscuitamari muscurcani. Intitapish, lunatapish, chunga shuj luzerocunatapish ñucata cumuricujtamari muscuni — nishpami parlarca.

¹⁰Paipaj yayamanpish, paipaj huauquicunamanpish parlajpimi paipaj yayaca Josetaca: — ¿Imatataj muscushcanguichu imamí? Ñucapish, cambaj mamapish, cambaj huauquicunapish cambaj ñaupajpi cungurichunchu ningui — nishpami sinchita rimarca.

¹¹Chaipicarin paipaj huauquicunaca ashtahuanmi p'iñarcacuna. Ashtahuanpish paipaj yayaca, chai muscuica imatashi nisha nin nishpami yuyacurcalla.

¹²Shuj punllaca Josepaj huauquicunaca, paicunapaj yayapaj ovejacunata Siquempi michinamanmi rircacuna.

¹³Yaya Israelca Josetaca: — Cambaj huauquicunaca Siquempimi ovejacunata michicungacuna. Canca paicunapajman ri — nijpimi Joseca: — Ari, rishallami — nirca.

¹⁴Yaya Israelca Josetaca: — Cunanca cambaj huauquicunapish, ovejacunapish ima shinalla cashcata ñuca yachangapaj ricushpa tigramugri — nishpami paitaca Hebrón pambamanta cachajpi Joseca Siquemman chayarca.

¹⁵Chai pambapi José chingarishca puricujpimi, shuj runa tupashpaca: — ¿Imatataj mashcashpa puricungui? — nijpi,

¹⁶Joseca: — Ñuca huauquicunatami mashcashpa puricuni. Paicuna maipi michicujta ricurcanguipishchari huillahuai — nirca.

¹⁷Chaimi chai runaca: — Ñamari caimantaca rishcacuna. Dotanman jacuchij ninacucujtami uyarcani — nijpimi, Joseca paipaj huauquicunata mashcashpa rishpaca Dotanpi japirca.

¹⁸Josepaj huauquicunaca José paicunapajman caruta shamucujta ricushpami, manaraj pai chayajpi paita huañuchinata yuyarinacushpa,

¹⁹paicunaca caishuj chaishuj: — ¡Chaitaca muscuj huambramari shamucun!

²⁰Cunanca, pai muscushca ima shina pajtajta ricungapaj c'amachij huañuchishpa jutcupi shitashunchij. Yayamanca: Sacha animalmi micushca canga nishunllami — nircacuna.

²¹Rubén chaita uyashpami, paicunapaj maquimanta quishpichisha nishpa paicunataca: — Ama huañuchishunchijchu.

²²Ama yahuarta jichashunchijchu. Ashtahuanpish cai shitashca pambapi caj chaquishca jutcullapi shitashunchij. Paipica ama maquita churaichijchu — nirca. Paicunapaj maquimanta chashna quishpichishpa yayapajman tigrachishpa cachangapajmi chashna nirca.

²³José paipaj huauquicunapajman ña chayajpica, José churarishca murujlla churanata quichushpami,

²⁴Josetaca japishpa jutcupi shitarcacuna. Ashtahuanpish chai jutcuca yacu illajllami carca.

²⁵Chai q'uipaca micungapajmi tiyarircacuna. Paicuna huichilla ricushpaca, tauca ismaelitacuna shamucujtami ricurcacuna. Chaicunaca Galaadmantami mishquijllata ashnaj balsamota, mirrata camellocunaman apachishpa Egiptoman ricurcacuna.

²⁶Chaimi Judaca paipaj huauquicunataca: — Ñucanchij huauquita huañuchishpa paita huañuchishca jahua ñucanchijca mana yachanchijchu nishpaca imata mana japishunchu.

²⁷Paica ñucanchij quiquin huauqui, ñucanchij quiquin aichallatajmi. Paipica ama maquita churashunchijchu. Ashtahuanpish ismaelitacunaman c'atushpa cachashunchij — nijpimi caishuj huauquicunaca tucuicunallataj allimi nircacuna.

²⁸C'atushpa randishpa purij madianitacuna ña paicunapaj chaita ricujpimi, paicunaca Joseta jutcumanta llujshichishpaca, ismaelitacunaman ishqui chunga cullquipi c'aturcacuna. Chaicunaca Josetaca, Egiptomanmi aparcacuna.

²⁹Chai q'uipami Rubenca, chai jutcuman tigrashpa chaipi Joseta ña mana japishpaca, paipaj churanata lliquirirca.

³⁰Paipaj huauquicunapajman tigrashpaca: — Joseca manamari ricurinchu. Ñucaca ¿maimantaj rishari? — nirca.

³¹Paicunaca shuj huahua chivota cungata p'itishpami, Josepaj churanataca chai yahuarhuan tucuita llihuircacuna.

³²Josepaj murujlla churanataca yayapajmanca cashna nishpami cacharca: “Cai churanatami japinchij. Cambaj churipaj cashcata, mana cambaj churipaj cashcata rijsipai” nishpami ricuchichun cacharcacuna.

³³Jacobca paipaj churipaj churana cashcata rijsishpami: “Cai churanaca ñuca churipajtajmari. Ima millai animalmari Josetaca mirga mirgata rurashpa millpushca canga” nirca.

³⁴Jacobca paipaj churanacunata lliquirishpa, cañamazuta churarishpami paipaj churimantaca achca punllacunata llaquilla carca.

³⁵Chaimi Jacobtaca churicunapish ushushicunapish cushichishun nishpa tucuicuna c'uchuyashpa sumajta rimarcacuna. Ashtahuanpish Jacobca imata mana uyasha nishpami paicunataca: “¡Ñucaca, seolpi ñuca churihuan tandanacugringacamami llaqui churanata churashca causasha!” nishpami huacarca.

³⁶Madianitacuna Egiptoman chayashpaca, Josetaca Potifarmanmi c'aturcacuna. Potifarca, faraonta cuidaj soldadocunata mandajmi carca.