Read Chimborazo Highland Quichua GÉNESIS 4 Bible Online

GÉNESIS 4 - Chimborazo Highland Quichua bible

GÉNESIS 4

¹Evaca paipaj cusa Adán chayarijpimi, chichushpa shuj huahuata huacharca. “Mandaj Dios munashpa cujpimari shuj c'ari huahuata charini” nishpami, chai huahuataca Cainta shutichirca.

²Chai q'uipaca paipaj huauqui Abeltami huacharca. Abelca ovejacunata michijmi carca. Cainca allpapi trabajajmi carca.

³Ña unipimi, Cainca allpapi p'ucushca granocunamantaca, Mandaj Diosman cungapaj apamurca.

⁴Abelpish punta huacharishca alli huira ovejatami Mandaj Diosman cungapaj apamurca. Mandaj Diosca Abeltapish, pai cushcatapish cushicushpami chasquirca.

⁵Ashtahuanpish Caintapish, pai cushcatapish Mandaj Diosca mana chasquircachu. Chaimi Cainca yallitaj p'iñarishpa p'iña ñahui tucurca.

⁶Chaimi Mandaj Diosca, Caintaca: — ¿Ima nishpataj canca yallitaj p'iñarishpa ñahuipish shujtajyaringui?

⁷Allita rurashpaca jatunyachishcami canguiman. Ashtahuanpish mana allita rurajpica, juchami cantaca mana allita rurachingapaj shuyacun. Shina cajpipish mana allitaca canmari mishana cangui — nircami.

⁸Cainca, paipaj huauqui Abeltaca: “Chagraman jacu” nishpami pushashpa rirca. Paicuna ña chagrapi cashpami, Cainca paipaj huauquihuan p'iñarishpa Abeltaca huañuchirca.

⁹Chaimi Mandaj Diosca Caintaca: — ¿Cambaj huauqui Abelca maipitaj? — nishpa tapujpi Cainca: — Ñucaca imatataj yachashari. Ñucaca huauquita cuidajchari caniyari — nirca.

¹⁰Mandaj Diosca, Caintaca: — ¿Imatataj rurarcanguiyari? Cambaj huauquipaj yahuarmi ñucataca allpamanta caparicun.

¹¹Cunanca cambaj huauquita huañuchishpa yahuarta jichachijpi chai yahuarta millpuj allpallatajmi can millai runa cashcataca huillacun.

¹²Chaimanta allpapi tarpujpipish ña mana alli p'ucungachu. Chai allpapica maipi causanata mana charij, caru llajtamanta shina puricunguillami — nircami.

¹³Chaimi Cainca, Mandaj Diostaca: — Ñuca juchamanta llaquita apanaca yallitaj mana apai tucuipajmari.

¹⁴Ñucata cai allpamanta llujshichishpa cachajpica, cunanca quiquinpaj ñaupajmanta miticushpa rishallami. Cai allpapica maipi causanata mana charij, caru llajtamanta shina puricushallatajchari. Chaipica ñucataca pipish japishpa huañuchingallatajchari — nirca.

¹⁵Shina nijpi Mandaj Diosca: — Cainta maijanpish huañuchijtaca, paitapish canchis cutinmi llaquichishca canga — nishpaca Cainpica, paihuan tupajcunaca pi mana huañuchinalla cashcata ricuchij señaltami churarca.

¹⁶Mandaj Diospaj ñaupajmanta Caín rishpaca, Edén llajtamanta inti llujshin ladoman caj Nod llajtapimi causagrirca.

¹⁷Caín paipaj huarmipi chayarijpimi, chichushpa shuj c'ari huahuata huachashpaca, chai huahuataca Enoc shutita shutichirca. Chai q'uipaca Cainca shuj pueblotami shayachirca. Chai pueblotaca paipaj churipaj shuti Enoc shutitami shutichirca.

¹⁸Enocca Irad churitami charirca. Iradca Mehujael churitami charirca. Mehujaelca Metusael churitami charirca. Metusaelca Lamec churitami charirca.

¹⁹Lamecca ishqui huarmicunatami paipaj huarmi cachun japirca. Shujca Adami carca, caishujca Zilami carca.

²⁰Ada huarmica Jabal shuti huahuatami huacharca. Jabalpaj huahua huahuacunami carpa huasicunapi causashpa animalcunata mirachijcuna carca.

²¹Jabalca Jubal shuti huauquitami charirca. Jubalca arpapi tocajcunapaj, flautapi tocajcunapaj yayami carca.

²²Shinallataj Zila huarmipish Tubal-caín shuti huahuatami huacharca. Paimi broncetapish fierrotapish tacashpa ima charinacunatapish ruraj carca. Tubal-cainca Naama shuti panitami charirca.

²³Shuj punllami Lamecca paipaj huarmicunataca cashna nirca: “Ada, Zila ñuca huarmicuna. Ñuca nishcata uyaichij. Ñuca rimashcata uyaichij. Shuj runataca ñucata chugrichijpimi huañuchircani. Q'uipa huiñai shuj huambrataca ñucata huajtajpimi huañuchircani.

²⁴Cainta huañuchijta canchis cutin llaquichishca cana cajpica, Lamecta huañuchijtacarin canchis chunga canchis cutinmi llaquichinga” nircami.

²⁵Adán paipaj huarmipi cutin chayarijpica, shujtaj c'ari huahuatami huacharca. Cai huahuataca: “Abelta Caín huañuchishcamantami, paipaj randi Taita Diosca cuhuan” nishpami, chai huahuataca Set shutita shutichirca.

²⁶Setca shuj c'ari huahuatami charirca. Chai huahuatami Enos shutita shutichirca. Chai punllamantapachami runacunaca, Mandaj Diosta yuyarinata callarirca.