Read Chimborazo Highland Quichua GÉNESIS 42 Bible Online

GÉNESIS 42 - Chimborazo Highland Quichua bible

GÉNESIS 42

¹Jacobca, Egiptopi granocuna tiyan nijta uyashpami, paipaj churicunataca: “¿Imatataj caishuj chaishuj ricunacucunguichijlla?

²Ñucaca Egiptopi granocuna tiyan nijtami uyani. Yaricaihuan ama huañungapajca chaiman uriyashpa granocunata ñucanchijpaj randimugrichij” nirca.

³Josepaj chunga huauquicunaca trigota randingapajmi Egiptoman uriyarcacuna.

⁴Jacobca Josepaj huauqui Benjamintaca mana cacharcachu. Paipish ima llaqui tucungallatajmari yuyashpami, paipaj huauquicunahuanca mana cacharca.

⁵Canaanpi jatun yaricai tiyashcamantami, yaya Israelpaj churicunaca chai llajtallamantataj shujtajcunandij granocunata randingapaj rircacuna.

⁶Joseca chai llajtapi mandajmi carca. Paimi tucuicunaman trigota c'atuj carca. Josepaj huauquicunapish paipajman chayashpaca paipaj ñaupajpimi pambaman tupajta cumurircacuna.

⁷Joseca ricushcahuanmi paipaj huauquicuna cashcata rijsirca. Ashtahuanpish mana rijsij shina tucushpa maipish cachun rimashpami: — ¿Maimantataj shamunguichij? — nijpi paicunaca: — Granocunata randingapajmi Canaanmanta shamunchij — nircacuna.

⁸Joseca paipaj huauquicuna cashcataca rijsircami. Ashtahuanpish paipaj huauquicunaca Josetaca mana rijsircacunachu.

⁹Chaimi Joseca paipaj huauquicunamanta ñaupaman pai muscushcata yuyarishpa paicunataca: — Cancunaca cai llajta mitsari tucuipajta, mana mitsari tucuipajta purij shinalla ricujcunami canguichij — nirca.

¹⁰Paicunaca: — Ñucanchij amito, cambajta ruraj ñucanchijca mana chaipajchu shamurcanchij. Ashtahuanpish granocunata randingapajllami shamurcanchij.

¹¹Tucui ñucanchijmi shuj yayapajlla huahuacuna canchij. Ñucanchijca mana allita rurajcunaca mana canchijchu. Cambajta ruraj ñucanchijca purij shinalla ricujcunaca manataj cashcanchijchu — nircacuna.

¹²Shina nijpipish Joseca: — Mana chashnachu canguichij. Cancunaca cai llajta mitsari tucuipaj cajta mana mitsari tucuipaj cajta purij shinalla ricujcunami canguichij — nircami.

¹³Shina nijpi paicunaca: — Cambajta ruraj ñucanchijca shuj yayapajlla huahuacuna, chunga ishqui huauquindijcunami canchij. Canaanpimi causanchij. Tucui ñucanchijpaj q'uipa huauquica ñucanchij yayahuanmi saquirirca. Shuj huauquica chingarircami — nircacunami.

¹⁴Shina nijpimi Joseca: — Cancunaca ñuca nishca shinallataj purij shinalla ricushpa purijcunatajmi canguichij.

¹⁵Cancuna nishca chashnataj cashcataca caita rurashpami yachasha: ¡Tucui cancunapaj q'uipa huauqui shamungacama, caimantaca manataj llujshinguichijchu. Faraonpaj shutipimi chashna nini!

¹⁶Cancuna nishca chashnataj cajpica caishujcunaca caipi prezu saquirishpa shujtaca q'uipa huauquita pushanaman cachaichij. Mana chashna rurashpaca purij shina ricujcunatajmi canguichij. Faraonpaj shutipimi chashna nini — nirca.

¹⁷Shina nishpaca tucuicunatami quimsa punllacama prezu churarca.

¹⁸Quimsa punlla tucujpimi Joseca: — Ñucaca Taita Diosta manchajmi cani. Cancuna ama huañungapajca caita ruraichij:

¹⁹Cancuna mana allita mana rurajcunataj cashpaca, cancunapaj shuj huauquita caipi prezu saquishpa, caishujcunaca cancunapaj huasi ucupurapaj micunata apashpa richij.

²⁰Cancuna tigramushpaca tucuicunapaj q'uipa huauquita pushamunguichij. Chaimi cancuna nishcaca chashnataj cajpi mana huañunguichij — nijpimi paicunaca chashna ruranata ari nircacuna.

²¹Chaipimi paicunaca caishuj chaishuj: — Ñucanchij huauquita llaquichishpaca juchayujtajmi tucushcanchij. Paica llaquijlla ñahuimari ñucanchijtaca ama chashna rurahuaichijchu nirca. Ashtahuanpish ñucanchijca mana uyarcanchijchu. Chaimari tucui cai llaquicunaca ñucanchij jahuaman shamushca — nircacuna.

²²Chaimi Rubenca: — ¿Manachu ñucaca cai huambrata llaquichishpa ama juchallichijchu nircani? Ashtahuanpish cancuna mana uyashcamantami, cunanca paipaj yahuar ñucanchijta llaquichichun mañacun — nirca.

²³Joseca paicuna ima rimashcata egipcio rimaipi paiman huillaj runatami charirca. Chaimi paicunaca paicunapaj rimaipi parlanacushcataca Joseca mana entendinchu yuyarcacuna.

²⁴Ashtahuanpish Joseca paicunamanta ch'icanyashpami huacarca. Paicunapajman tigrashpa paicunahuan rimashpaca paicuna ricucujpimi Simeonta prezu japirca.

²⁵Chai q'uipami Joseca, paipajta rurajcunataca: — Paicunapaj costalcunapi trigota jundachichij. Trigomanta pagashca cullquitapish cada quiquinpaj costalcunapi churanguichij. Ñanpi micuchun cucayutapish cachanguichij — nijpica, pai nishca shinami rurarcacuna.

²⁶Josepaj huauquicunaca, paicunapaj burrocunaman trigota apachishpa chaimanta rircallacunami.

²⁷Paicunaca ña tutayajpi samarinaman chayashpami, paicunapuramanta shujca paipaj burroman carangapaj costalta pascarca. Chaipica ñapish costal shimipica cullqui muchila ricurircallami.

²⁸Chaimi paipaj huauquicunamanca: — ¡Riquichigari, ñuca cullquitaca cai ñuca costal-llapitajmari tigrachishpa cachashca! — nijpimi, tucuicuna achcata chujchushpa mancharishpa caishuj chaishuj: — ¿Taita Diosca ñucanchijtaca imatataj ruracunchu imamí? — ninacurcacuna.

²⁹Canaanman chayashpaca, paicunapaj yaya Jacobmanca tucui imalla tucushcatami cashna nishpa parlarcacuna:

³⁰— Chai llajtapaj q'uipa mandajca ñucanchijtaca cancunaca purij shinalla ricujcunami canguichij nishpami maipish cachun riman.

³¹Ashtahuanpish ñucanchijca: Mana allita rurajcunaca mana canchijchu. Purij shinalla ricujcunapish manataj cashcanchijchu.

³²Ñucanchijca shuj yayapajlla huahuacuna, chunga ishqui huauquindijcunami canchij. Shuj huauquica chingarircami. Tucuicunapaj q'uipaca Canaanpimi ñucanchij yayahuan saquirirca nircanchijmi.

³³Chaimi chai llajtapaj q'uipa mandajca: Cancuna mana allita mana rurajcuna cashcata ricuchingapajca cancunapaj shuj huauquita caipi ñucahuan saquishpa cancunapaj huasi ucupuracuna yaricaihuan cajcunapaj micunata apashpa rishpa,

³⁴cancunapaj q'uipa huauquita pushamuichij. Chaipimi purij shinalla ricujcuna mana cashcata, mana allita mana rurajcuna cashcata yachashpa, cancunapaj huauquitaca tigrachisha. Cai llajtapica randishpa puri tucunguichijllami nircami — nishpami parlarcacuna.

³⁵Chaipipish cashnami tucurca. Costalcunamanta granocunata tallicushpaca, tucuicunapaj costalpimi cullqui muchilacunata ricurcacuna. Chaimi paicunapish, paicunapaj yayapish tucuicuna achcata mancharircacuna.

³⁶Chaimi yaya Jacobca: — Cancunaca ñucataca huahuacuna illajtamari saquigringuichij. Josepish ñami chingarirca, Simeonpishmari ña illan. Cunancarin Benjamintapishmari pushashun ninguichij. Tucui chaicunaca ñucatamari tucuchigrin — nirca.

³⁷Rubenca paipaj yayataca: — Benjamintaca ñucahuan cachahuailla, tigrachimushallami. Ñuca mana tigrachimujpica, ñuca ishqui churicunata huañuchingui — nircami.

³⁸Shina nijpi Jacobca: — Ñuca churica cancunahuanca manataj ringachu. Paipaj huauqui Josepish huañujpi, paillami saquirirca. Cancuna Benjaminta pushashpa ricujpi ñanpi ima llaquipish tucujpica, ñucaca yuyaj cashcamanta seolman utca rijpica cancunapaj jahuami canga — nircami.