Read Chimborazo Highland Quichua GÉNESIS 44 Bible Online

GÉNESIS 44 - Chimborazo Highland Quichua bible

GÉNESIS 44

¹Chai q'uipami, Joseca paipaj mayordomotaca: — Cai runacunapaj costalcunapica, mashnata apashcata tucui costalcunapi trigota jundachi. Trigomanta pagashca cullquitapish tucuicunapaj costal shimipi churangui.

²Tucuicunapaj q'uipa huauquipaj costal shimipica ñuca cullqui copata, trigomanta pagashca cullquindij churangui — nijpica, chai mayordomoca José mandashca shinallatajmi rurarca.

³Cayandij tutamantaca Josepaj huauquicunaca caya minchacama nijpica paicunapaj burrocunandij rircallacunami.

⁴Paicunaca ñami pueblomanta llujshishcacuna carca. Shina cajpipish manaraj achcata caruyajpimi, Joseca paipaj mayordomotaca cashna nirca: — Chai runacunata catishpa ri. Paicunata cati japishpaca cashna ningui: Cancunapaj allita rurashca jahuamari ñucataca cashna mana allita ruramunguichij. ¿Ima nishpataj ñuca amopaj cullqui copata shuhuamunguichigari?

⁵Ñuca amoca chai copapimi ubyaj carca. Adivinangapajpishmari chai copataca charirca. ¡Chai copata shuhuamushpamari, jatun mana allita ruramushcanguichij! ningui — nircami.

⁶Shina nijpi Josepaj mayordomo rishpa cati japishpaca, José imallata nishca shinallatajmi nirca.

⁷Chaimi paicunaca: — Ñucanchij amitolla ¿ima nishpataj ñucanchijtaca chashna nihuanguiyari? Cambajta ruraj ñucanchijca manataj chashna rurajcuna canchijchu.

⁸Ñucanchij costal shimicunapi japishca cullquicunatapish, Canaanmanta apamushpami canllamantaj tigrachircanchij. Chashna cushca jahuaca ¿maitataj cambaj amopaj huasimantaca cullquitapish, curitapish shuhuamunchijman carcari?

⁹Cambajta ruraj maijanpajpi chai copata japishpaca huañuchihuanguilla. Ñucanchijpish tucuicunami cambajta rurajcuna tucushun — nircacuna.

¹⁰Chaimi mayordomoca: — Cancuna nishcapish allitajmari, shina cajpipish maijan chai copata charicujllami ñucapajta ruraj canga. Caishujcunaca ima juchachina illajllami saquiringuichij — nirca.

¹¹Shina nijpimi, tucuicuna paicunapaj costalcunata uricuchishcahuan cada quiquin pascarcacuna.

¹²Chaimi mayordomoca punta huauquipaj costalmanta callarishpa mashcashpaca, tucuicunapaj q'uipa huauqui Benjaminpaj costalpi chai copataca japirca.

¹³Chaimi paicunaca achcata llaquirishpa paicunapaj churanacunata lliquirircacuna. Chai q'uipaca burrocunaman costal granocunata apachishpami, chai puebloman cutinllataj tigrarcacuna.

¹⁴Judaca paipaj huauquicunandijmi, Josepaj huasiman yaicurca. Paicuna chayanapajca, Joseca chaipiraj cajpimi, paicunaca Josepaj ñaupajpi pambaman tupajta cumurircacuna.

¹⁵Chaimi Joseca paicunataca: — ¿Ima ruranatataj rurashcanguichijchu, imamí? Ñuca shina mandajca imatapish yachai tucuj cashcataca ¿manachu yacharcanguichij? — nirca.

¹⁶Shina nijpimi Judaca: — Ñucanchij amo quiquintaca ¿imatataj nishunri? ¿Ima shinataj mana juchachinayujca ricurishunri? Cambajta ruraj ñucanchij mana alli cashcataca, Taita Diosmi ricuchin. Cunanca ñucanchijpish, copata apacujpish cambajta rurangapaj cambaj maquipimi canchij — nircami.

¹⁷Chaimi Joseca: — Maitataj chaitaca rurashari. Maijanmi copata apacushpa japi tucurca chaillami ñucapajta ruraj canga. Caishujcunaca ima manchai illajlla cancunapaj yayapajman tigraichijlla — nirca.

¹⁸Judaca Josepajman c'uchuyashpami: — ¡Aij, ñuca amitolla!, canca faraón shinallatajmari cangui. Cambajta ruraj ñucami, can amitollahuan parlasha nini. Cambajta ruraj ñucahuanca nina sindirij shinaca amataj p'iñaripangui.

¹⁹Can ñuca amitomi cambajta ruraj ñucanchijtaca: ¿Cancunaca yayata charinguichijchu, mana cashpaca shujtaj huauquita charinguichijchu? nishpa tapurcangui.

²⁰Chaimi ñucanchijca can ñucanchij amomanca: Yayatapish charinchijmi. Paica ña yuyajmi. Ñucanchij yaya ña yuyaj cajpi huacharishca, tucui ñucanchijpaj q'uipa huauquitapish charinchijmi. Paipaj quiquin mamamanta shuj huauquica ñami huañurca. Chaimanta pailla cajpi yayaca, paitaca achcatami c'uyan nircanchijmi.

²¹Chaimi cambajta ruraj ñucanchijtaca: Ñuca paita ricungapaj pushamugrichij nircangui.

²²Chaimi ñucanchijca can ñucanchij amotaca: Paica yayata saquishpaca, mana shamui tucunchu. Pai shamujpica yayaca huañungamari nircanchij.

²³Shina nijpipish cambajta ruraj ñucanchijtaca: Tucuicunapaj q'uipa huauqui cancunahuan mana shamujpica, ñuca ñahuipica amataj ricuringuichij nircanguimari.

²⁴Chaimi ñucanchij yayapajman chayashpaca, can ñucanchij amo imalla nishcata tucuita parlarcanchij.

²⁵Ñucanchij yayaca: “Granocunata randinaman cutinllataj richij” nircami.

²⁶Chaimi ñucanchijca ñucanchij yayamanca: Ñucanchij q'uipa huauqui Benjamín ñucanchijhuan mana rijpica mana rishunchu. Paita mana pushashpaca, chai amopica mana ricurigri tucunchijchu nircanchij.

²⁷Chaimi cambajta ruraj ñucanchij yayaca: Ñuca huarmi Raquelhuanca ishqui churicunallata charishcataca cancunallataj yachanguichijmi.

²⁸Shuj churica ñuca ñaupajmanta rishpa chingarijpi cunancama mana ricushpami paitaca sacha animalcunami ñutushpa micushca canga yuyani.

²⁹Cunanpish Benjaminta cancuna pushashpa ricujpi ima llaquipish tucujpica, ñucaca yuyaj cashcamanta seolman utca rijpica cancunapaj jahuami canga nircami.

³⁰Cunanca cambajta ruraj ñuca yayapajman tigrajpi Benjamín mana ñucahuan chayajpica, paica Benjaminhuan yallitaj amañado cashcamanta,

³¹Benjaminta mana ricushpaca huañungamari. Cambajta ruraj ñucanchij yaya ña yuyaj cashcamanta Benjaminmanta llaquirishpa seolman utca rijpica, cambajta ruraj ñucanchijpaj jahuamari canga.

³²Ñuca yayapaj ñaupajmantaca Benjamintaca cambajta ruraj ñucamari cashna nishpa pushamurcani: Benjamintaca ñucatajca tigrachimushatajmi. Paita mana tigrachimushpaca, cambaj ñaupajpica tucui causaipimi juchachishca casha nircanimi.

³³Chaimanta Benjaminpaj randi ñucanchij amo cambajta rurachunca ñucata saquichishpa, Benjamintaca huauquicunahuan tigrachishpa cachachunmi rogapani.

³⁴Ñucaca ñuca yayapajmanca Benjamín illajllaca maitataj tigrashari. Ñuca huauqui illajlla tigrajpi ñuca yaya llaquinayaj tucujtaca mana ricugrisha ninica — nircami.