Read Chimborazo Highland Quichua GÉNESIS 48 Bible Online

GÉNESIS 48 - Chimborazo Highland Quichua bible

GÉNESIS 48

¹Tucui chaicuna q'uipaca cashnami tucurca. Josemanca: — Cambaj yayaca ungushcami — nijpimi Joseca Manasés, Efraín paipaj ishqui churicunata paihuan pushashpa rirca.

²Jacobmanca: “Cambaj churi Joseca cambajman shamushpa caipimi” nijpimi, Israelca huancarishpalla jatarishpa camallapitaj huichi tiyarishpa,

³Josetaca: — Pailla Tucuita Rurai Tucuj Taita Diosmi, Canaanpi caj Luz pueblopi ñucaman ricurishpa alli cashca cachun nishpaca,

⁴cashna nirca: Ñucami cantaca achca huahuacunayujta rurasha. Yallitaj achcatami mirachisha. Cambaj huahua huahuacunamantaca achca llajtacunami tucunga. Cai llajtataca cambaj huahua huahuacunapaj huiñaipaj cachunmi cusha nircami.

⁵Cunanca cai Egiptopi ñuca canhuan manaraj tandanacunaman shamujpi, caipi huacharishca Efraín, Manasés cambaj ishqui churicunaca ñuca churi Rubén, Simeón shinallataj ñuca quiquin churicunami.

⁶Efrainpaj, Manasespaj q'uipa huacharishca churicunami cambaj canga. Paicunaca paicunapaj huauquicunapaj shutipimi rijsishca canga.

⁷Padan-arammanta ñuca tigracujpimi cambaj mama Raquelca Canaanpi huañurca. Efrataman chayana ashalla illajpimi chaiman rina ñanpi huañurca. Chaimi paitaca chai ñan c'uchullapi pambarcani. Chai pueblotaca cunanca Belén nincunami — nircami.

⁸Israelca, Josepaj churicunata ricushpami: — ¿Caicunaca picunataj? — nijpi,

⁹Joseca paipaj yayamanca: — Taita Dios ñucaman caipi cushca ñuca churicunami — nirca. Chaimi Israelca: — Cunanca ñucapajman c'uchuyachi paicunata alli cashca cachun ningapaj — nirca.

¹⁰Israelca yallitaj yuyaj cashcamanta paipaj ñahuicunapish mana alli cashpa mana alli ricui tucurcachu. Chaimi Joseca paipaj churicunataca paipajman c'uchuyachijpi, yaya Israelca paicunataca ugllarishpa muchashpa,

¹¹Josetaca: — Ñucaca canta ricunataca ña mana yuyarcanichu. Ashtahuanpish Taita Diosmari cambaj huahuacunacama ricuchun saquihuashca — nircami.

¹²Joseca paipaj churicunata yayapaj changamanta anchuchishpaca, pambaman tupajtami cumurirca.

¹³Joseca, paipaj ishqui churicunataca Israelpaj ñaupajmanca Efraintaca alli maquihuan, Manasestaca lluqui maquihuan aisashcami c'uchuyarca. Chaipica Efrainca, Israelpaj lluqui maquimanmi tucurca, Manasesca alli maquimanmi tucurca.

¹⁴Israelca ashtahuanpish Manasés punta churi cajpipish maquicunata cruzashpami, Efrainpaj uma jahuapica alli maquita, Manasespaj uma jahuapica lluqui maquita churarca.

¹⁵Chaipimi Josetaca alli cashca cachun nishpaca: “Ñuca yaya Abraham, yaya Isaac paipaj ñaupajpi purishca Taita Dios. Ñuca tiyashca pachamanta cunancama ñucata cuidaj Taita Dios,

¹⁶tucui llaquicunamanta ñucata llujshichij Ángel, cai huahuacunataca alli cashca cachun nichun. Ñuca shutitaca paicunapi huiñaita rijsichun. Ñuca ñaupa yaya Abrahampaj, Isaacpaj shuticunatapish paicunapi huiñaipaj rijsichun. Cai pachapica achcacuna tucushpa yallitaj mirarishca cachun” nircami.

¹⁷Joseca paipaj yaya paipaj alli maquita Efrainpaj uma jahuapi churajta ricushpami, llaquirishpa paipaj yayapaj maquita japishpa Efrainpaj uma jahuamanta anchuchishpa Manasespaj uma jahuapi churasha nishpa,

¹⁸paipaj yayataca: — Yayito, ama chashna rurapaichu, caimari ñuca punta churi. Cambaj alli maquitaca paipaj uma jahuapi churapai — nirca.

¹⁹Ashtahuanpish paipaj yayaca mana chashna rurasha nishpami Josetaca: — Ari, huahua chaitaca yachanillatajmi, Manasespaj huahua huahuacunapish achcallataj miraringacunaca. Shina cajpipish paipaj q'uipa huauqui Efrainmi tucui imapipish yalli canga. Paipaj huahua huahuacunami ashtahuan mirarishpa jatun llajtacuna tucunga — nircami.

²⁰Chai punllallatajmi cai shimicunahuan alli nirca: Israelpurapi maijanta alli cashca cachun nicushpaca: Taita Dioslla Efrainta, Manasesta ima shinami alli cashca cachun ningui, chai shinallataj caicunatapish alli cashca cachun nipai ningacunami — nircami. Israelca chashnami Efraintaca Manasespaj ñaupa cachun churarca.

²¹Chai q'uipami Israelca, paipaj churi Josetaca: — Riqui, ñucaca ñami huañugrini. Taita Diosca cancunahuanmi canga. Paimi cancunataca ñaupa ñucanchij yayacuna causashca llajtaman tigrachinga.

²²Canmanca cambaj huauquicunapajta yallitami cuni. Chai llajtataca amorreocunapajtami ñuca espadahuan, ñuca arcohuan macanacushpa mishashpa quichurcani — nircami.