Read Chimborazo Highland Quichua GÉNESIS 6 Bible Online

GÉNESIS 6 - Chimborazo Highland Quichua bible

GÉNESIS 6

¹Tucui cai pachapi gentecuna achcata mirari callarishpaca ushushicunatapishmi charircacuna.

²Taita Diospaj churicunaca chaicunapaj ushushicunaca sumaj cajta ricushpami tucuimanta yalli sumaj cajcunata agllashpa paicunapaj huarmi cachun japirca.

³Chaimi Mandaj Diosca: “Ñuca espirituhuan causashpa huiñaipaj millaita ruracuchunllaca mana saquigrinichu. Paicunaca huañujlla aichayujmi. Chaimanta cunanmantaca, 120 huatayujcamallami causangacuna” nirca.

⁴Taita Diospaj churicuna runacunapaj ushushicunahuan chayarinacujpi chai huachashca huahuacunami, chai punllacunapipish, q'uipa punllacunapipish yallitaj jatun c'ari c'ari runacuna tiyarca. Paicunaca alli macanacuj millai runacunami carca.

⁵Cai pachapi causajcunapaj ruraicunaca yallitaj millai cashcatami Mandaj Diosca ricurca. Paicunapaj shungupica yallitaj millaita ruracunalla yuyaihuan jundami carca.

⁶Mandaj Diosca runata rurashpa cai pachapi churashcamantaca, shungu nanarishpami llaquirirca.

⁷Chaimi Mandaj Diosca: “Cai pachapi causachun rurashpa churashcacunataca gentecunatapish, animalcunatapish, llucaj animalcunatapish, huairata purij alasyuj animalcunatapish tucuita chingachisha. Paicunataca mana ruranatami rurashcani” nishpa yallitaj llaquirirca.

⁸Shina cajpipish Mandaj Diospaj ñahuipica, Noellami allita ruraj cashca ricurirca.

⁹Noepaj huahua huahua callari yayacunaca caicunami: Noé causai punllacunapica, Noellami cashcata ruraj, ima juchachina illajlla carca. Noeca Taita Dioshuanmi purirca.

¹⁰Noeca Sem, Cam, Jafet quimsa churicunatami charirca.

¹¹Taita Diospaj ñaupajpica cai pachaca yallitaj llaqui, millanana ruraicunahuan jundami carca.

¹²Taita Diosca cai pachata ricushpaca, cai pachaca yallitaj millanana cashcatami ricurca. Cai pachapi causajcuna tucuicuna paicunapaj quiquin ñanta purishpa yallitaj millanana tucushcamantami chashna carca.

¹³Chaimi Taita Diosca Noetaca: “Cai pachapi causajcuna yallitaj millaita rurana yuyailla millaita rurajpi, cai pachaca yallitaj millanana cashcamanta cai pachapi causaiyuj tucuicunandij, cai pachandijmi chingachinata yuyarircani.

¹⁴Cunanca canca gofer caspicunahuan jatun huambuj huasita ch'ican ch'ican ucucunayujta rurangui. Chai huasiman yacu ama yaicuchunca jahuatapish, ucutapish breahuan tucuita llihuingui.

¹⁵Chai jatun huambuj huasitaca cashnata rurangui: Sunimanca 135 metrota, anchomanca ishqui chunga ishqui metro chaupita, altomanca chunga quimsa metro chaupita rurangui.

¹⁶Chai jatun huambuj huasitaca, quimsa altibajoyujta rurangui. Jahua c'atamanta uriman chaupi metro shinata medishpa ventanata rurangui. Shuj ladomanca punguta rurangui.

¹⁷Ñucaca cai pachapi causaiyuj caj tucuicunata chingachingapajca cai pachamanca yacu juillutami cachagrini. Cai pachapi tucui ima tiyajcunami huañunga.

¹⁸Ashtahuanpish canhuanca shuj ruranatami callarichigrini. Chaimanta canpish, cambaj churicunapish, cambaj huarmipish, cambaj churicunapaj huarmicunapish chai jatun huambuj huasiman yaicunguichij.

¹⁹Cai pachapi causaj tucui animalcunamantaca, chaipurallataj caj shuj c'arita shuj huarmita ishqui ishquita jatun huambuj huasiman yaicuchingui. Chaipi cashpami cancunapish, paicunapish mana huañunguichij.

²⁰Alasyuj animalcunapish chaipurallataj caj ishqui ishqui, jatun animalcunapish chaipurallataj caj ishqui ishqui, llucashpa purij animalcunapish chaipurallataj caj ishqui ishquimi cambajman shamushpa mana huañungapaj canhuan yaicungacuna.

²¹Cancuna micunapajpish tucui laya micunata, animalcunaman caranapajpish tucui laya micunata achcata huaquichingui. Chashnami yaricaihuan mana huañunguichij” nircami.

²²Noeca, chashnatajmi rurarca. Taita Dios mandashca shinami tucuita rurarca.