Read Chimborazo Highland Quichua GÉNESIS 7 Bible Online

GÉNESIS 7 - Chimborazo Highland Quichua bible

GÉNESIS 7

¹Mandaj Diosca Noetaca cashnami nirca: “Cai punllacunapi causajcunapurapica, canllatami ñuca ñaupajpi cashcata ruraj cashcata ricuni. Chaimanta canpish, cambaj tucui familiacunapish jatun huambuj huasiman yaicuichij.

²Chuya animalcunataca canchis c'arita, canchis huarmita yaicuchingui. Ashtahuanpish mapa animalcunataca shuj c'arita, shuj huarmillata yaicuchingui.

³Huairata purij alasyuj animalcunatapish canchis c'arita canchis huarmita yaicuchingui. Chaimi cai pachapica paicunaca chaipurallataj mirarishpa causangacuna.

⁴Cunanmanta canchis punlla q'uipaca, ñucaca cai allpapica chuscu chunga punllata chuscu chunga tutatami tamyachisha. Chashnami cai pachapi causaj tucui imallata ñuca rurashcataca chingachigrini” nircami.

⁵Noeca Taita Dios mandashca shinami tucuita rurarca.

⁶Cai pachapi yacu juillu callarinapajca Noeca, 600 huatayujmi carca.

⁷Yacu juillumanta quishpiringapajmi, Noeca paipaj huarmindij, paipaj churicunandij, paipaj churicunapaj huarmicunandij huambuj huasiman yaicurca.

⁸Chuya animalcunapish, mapa animalcunapish, huairata purij alasyuj animalcunapish, allpa jahuata purij animalcunapish,

⁹ishqui ishquillami Noehuanca huambuj huasiman yaicurcacuna. Mandaj Dios Noeta mandashca shinallataj shuj c'ari shuj huarmimi yaicurcacuna.

¹⁰Ña canchis punlla tucujpimi cai pachapica, yacu juillu callarirca.

¹¹Noeca, 600 huatayujmi carca. Chai huatapaj ishqui quillapi, chai quillapaj chunga canchis punllapimi ucujman caj jatun yacucunapish t'imburishpa llujshirca. Jahua pachapish lliquirijpimi, yallitaj tamyarca.

¹²Cai pachapica chuscu chunga punllata, chuscu chunga tutatami tamyacurcalla.

¹³Chai punllallatajmi Noeca Sem, Cam, Jafet shuti paipaj churicunandij, paipaj huarmindij, paipaj quimsa churicunapaj huarmicunandij huambuj huasiman yaicurca.

¹⁴Paicunahuanca sachapi causaj animalcunapish chaipurallataj caj, charina animalcunapish chaipurallataj caj, llucaj animalcunapish chaipurallataj caj, alasyuj animalcunapish chaipurallataj caj, pajarocunapish chaipurallataj caj tucuicunami yaicurcacuna.

¹⁵Causaiyuj caj animalcunaca ishqui ishquimi Noehuanca huambuj huasiman yaicurcacuna.

¹⁶Chaipurallataj caj shuj c'ari, shuj huarmi animalcuna Taita Dios mandashca shinallataj huambuj huasiman ña yaicujpimi, Mandaj Diosca punguta huichcarca.

¹⁷Cai pachapica chuscu chunga punllata yallitaj tamyajpimi, yacucuna yallitaj jundashpa huambuj huasitaca huambuchirca.

¹⁸Cai pachapi yacu ashtahuan ashtahuan jundashpa huichiman catijpimi, huambuj huasica yacu jahuapi huambucurcalla.

¹⁹Yacu ashtahuan ashtahuan huichiman jundashpaca, cai pachapi tiyaj ashtahuan jatun urcucunatapish tucuitami taparca.

²⁰Chai urcucunata ña tapashpapish canchis metrohuan yalli ashtahuan jahuatami yacuca jundarca.

²¹Chaimi cai pachapi causaiyuj caj tucuicunaca huairata purij alasyuj animalcunapish, charina animalcunapish, sacha animalcunapish, llucaj tucui animalcunapish, tucui gentecunapish huañurcacuna.

²²Samaita aisashpa allpapi causajcunaca tucuicunami huañurca.

²³Cai pachapi causaiyuj caj tucuicunataca chashnami chingachirca. Gentecunamanta callarishpaca, tucui animalcunatapish, llucaj animalcunatapish, huairata purij alasyuj animalcunatapish tucuitami chingachirca. Huambuj huasipi Noehuan tucui cajcunallami saquirircacuna.

²⁴Yacuca, 150 punllacunacamami cai pachapica junda tiyacurcalla.