Read Chimborazo Highland Quichua GÉNESIS 8 Bible Online

GÉNESIS 8 - Chimborazo Highland Quichua bible

GÉNESIS 8

¹Chai q'uipami Taita Diosca Noetapish, paihuan caj animalcunatapish huambuj huasipi cashcata yuyarirca. Chaimi Taita Diosca huairata cachashpa cai pachapi junda tiyacuj yacutaca chaquichishpa catirca.

²Ucujmanta llujshicuj jatun yacucunatapish huichcarcami. Jahua pacha lliquirishcatapish huichcajpimi, jahua pachamanta tamyacujca usyarirca.

³Cai pachapi tiyaj yacuca, asha ashami chaquirishpa catirca. 150 punllacuna tucujpica, yacuca ashtahuanmi chaquirirca.

⁴Chai huatapaj canchis quillapi, chai quillapaj chunga canchis punllapimi chai huambuj huasica Ararat urcucuna jahuapi tiyarirca.

⁵Yacu ashtahuan chaquirijpimi, chunga quilla callari punllapica urcucunapaj puntacuna ricurirca.

⁶Chai urcucuna ricurishca punllamanta chuscu chunga punllacuna tucujpimi Noeca, pai rurashca huambuj huasi ventanata pascashpa,

⁷shuj cuervota cacharirca. Chai cuervo rishpaca, yacu chaquiringacama huairapi caiman chaiman puricurcallami.

⁸Chai q'uipaca Noeca, cai pachapi yacu ña chaquirishcata yachangapajmi shuj palomata cacharirca.

⁹Ashtahuanpish chai palomaca, cai pachapi yacu manaraj chaquirijpimi, maipi mana tiyari tucushpa huambuj huasillamantaj tigrarca. Chaimi Noeca paipaj maquita chutashpa chai palomata japishpa, huambuj huasillamantaj yaicuchirca.

¹⁰Noeca shujtaj canchis punllacunata shuyashpami, huambuj huasimantaca palomata cutinllataj cacharishpa cacharca.

¹¹Chai palomaca ña tutayacuitami, olivo p'angata apashpa tigramurca. Chaimi Noeca cai pachapi tiyaj yacuca ña ashtahuan chaquiricushcata yacharca.

¹²Noeca shujtaj canchis punllahuan shuyashpami, palomataca cutinllataj cacharirca. Chai palomaca ña mana tigrarcachu.

¹³Noeca 601 huatayujmi carca. Chai huata callaripaj punta quillapi, chai quillapaj punta punllapimi yacuca ña tucui chaquirirca. Chaimi Noeca, huambuj huasi c'atata pascashpa ricushpaca, cai pacha allpaca chaquishca cashcata ricurca.

¹⁴Chai huatapaj ishqui quilla, chai quillapaj ishqui chunga canchis punllapica, cai pacha allpaca ashtahuan chaquishcatajmi carca.

¹⁵Chaipimi Taita Diosca, Noetaca:

¹⁶“Canpish, cambaj huarmipish, cambaj churicunapish, cambaj churicunapaj huarmicunapish huambuj huasimanta llujshichij.

¹⁷Canhuan caj tucui laya animalcunataca, huairata purij animalcunatapish, sacha animalcunatapish, llucaj animalcunatapish tucui cai pachata rishpa mirarishpa jundarichun llujshichi” nirca.

¹⁸Noeca paipaj huarmindij, paipaj churicunandij, churicunapaj huarmicunandijmi llujshirca.

¹⁹Allpapi purij animalcunapish, llucaj animalcunapish, huairata purij alasyuj animalcunapish tucui laya animalcunami huambuj huasimantaca llujshircacuna.

²⁰Chai q'uipaca Noeca, Mandaj Diospaj shuj altarta rurashpami, chuya animalcunataca alasyuj tucui chuya animalcunatapish, tucui caishuj chuya animalcunatapish Taita Diosman cushpa altar jahuapi tucuita rupachirca.

²¹Mandaj Diosca chai cushcacuna paipajca mishquijlla cajta chasquishpami, paipaj shungupica cashna nirca: “Cunanca cai pachapi causajcuna millaita rurashcamantaca cunan llaquichishca shinaca mana llaquichishachu. Cai pachapi causajcunaca huambramanta pachami millaita rurana yuyailla causancuna. Chashna cajpipish cunan llaquichishca shinaca causaiyuj caj tucuicunataca mana chashnaca llaquichishachu.

²²Cai pacha tiyashcacamaca tarpui punllacunapish, cozicha punllacunapish manataj illangachu. Chiri punllacunapish, rupaj punllacunapish tiyangami. Tamya punllacunapish, usya punllacunapish tiyangami. Punllapish tutapish tiyangami” nircami.