Read Chimborazo Highland Quichua 2 SAMUEL 14 Bible Online

2 SAMUEL 14 - Chimborazo Highland Quichua bible

2 SAMUEL 14

¹Sarviapaj churi Joabca, jatun mandaj David Absalonta yallitaj ricunaihuan cashcatami yacharca.

²Joabca yachaj tucushca shuj huarmita Tecoamanta pushamuchishpami chai huarmitaca: “Huañushcamanta churarinata churarishpa huañushcamanta llaquilla caj shina tucui. Mishquijllata ashnacujhuanpish ama churaringui. Maijan huañushcamanta achca huatacunata llaquilla cashca huarmi shina tucui.

³Chashna tucushpa jatun mandajpajman yaicushpa ricurigrichunmi rogani. Chaipica caicunata cashna ningui” nishpami Joabca chai huarmitaca jatun mandajpaj ñaupajpi imallata nina cashcataca cutin cutin yachachishpa cacharca.

⁴Tecoamanta caj huarmi jatun mandajpajman yaicushpaca, paita alli nishcata ricuchingapaj pambaman tupajta cumurishpami: — ¡Jatun mandajlla, ñucata ayudahuai! — nirca.

⁵Chaimi jatun mandajca: — ¿Imataj tucungui? — nijpi, chai huarmica: — Ñuca cusaca huañurcami. Ñucaca viudamari cani.

⁶Cambajta ruraj ñucaca ishqui churicunatami charircani. Chagrapi paicunapura p'iñanacushpa macanacushpami, pi mana ch'ichanchij tiyajpi shujca caishujta huañuchishca.

⁷Cambajta ruraj ñucataca tucui ñuca familiacuna ñucata p'iñashpa jatarishpami, huauquita huañuchishcamanta paitapish huañuchingapaj huauquita huañuchijta ñucanchijman cui. Imalla charishcata japina cashcata japij canamantapish anchuchishun nicuncuna. Paicuna chashna rurashpaca rupacuj carbonta huañuchij shinami, ñuca cusapaj huahua huahuacuna tiyanata chingachishpa, ñuca cusapaj shutita chingachinga — nircami.

⁸Chaimi jatun mandajca chai huarmitaca: — Cambaj huasiman rilla, canta ama llaquichichun ñami mandagrini — nirca.

⁹Shina nijpipish, Tecoamanta caj huarmica jatun mandajtaca: — Jatun mandaj ñuca amito, imapish mana allica, ñuca jahua ñuca yayapaj huasi familia jahua cachun. Ashtahuanpish jatun mandaj, pai mandashpa tiyanaca ima juchachina illaj cachun — nircami.

¹⁰Chaimi jatun mandajca: — Canta p'iñashpa rimajtaca ñucapajman pushamui. Cantaca mana ashtahuan p'iñachingachu — nirca.

¹¹Shina nijpipish chai huarmica: — Huañuchishcamanta huañuchishpa ama ashtahuan millaita rurashpa, ñuca churita ama chingachichun cambaj Mandaj Diosta mañachunmi rogani — nijpimi jatun mandajca: — Mandaj Diosca causajmi, cambaj churipaj uma ajchaca shujllapish pambamanca mana urmangachu — nirca.

¹²Chaimi chai huarmica: — Ñuca amo jatun mandajlla, shuj shimillahuan cambajta ruraj ñuca rimachun saquichunmi rogani — nijpi jatun mandajca: — Rimailla — nirca.

¹³Shina nijpi chai huarmica: — ¿Ima nishpataj Diospaj agllashcacunata llaquichingapaj chashna yuyarircangui? Jatun mandaj chashna chai shimicunata rimashpaca, pai juchachishca canapajllatajmari chashna rimarin. Llajtamanta llujshichishpa cachashcata llajtaman tigrachun mana saquishpami chashna ruran.

¹⁴Allpapi yacu tallirijpica, pi mana tandai tucunchu. Chashnallatajmi tucuicuna huañunataj canchij. Shina cajpipish Taita Diosca pita mana causaita quichunllachu. Ashtahuanpish llajtamanta llujshichishpa cachashcatapish paimanta ama ashtahuan caruyachun tigrachimunatami munan.

¹⁵Tucuicuna ñucata manchachicujpimi ñuca amo jatun mandajtaca cai shimicunata ningapaj shamurcani. Caicunata cambajta ruraj huarmi mañashcata jatun mandajca uyashpa rurangapishchari nishpami shamurcani.

¹⁶Ñucatapish ñuca churitapish Dios cushca llajtamanta ishquindijta chingachisha nicuj runapaj maquimanta, cambajta ruraj huarmi mañashcata uyashpa jatun mandajca quishpichingatajmi ninimi.

¹⁷Cambajta ruraj ñucaca cashnapish ninimi: “Jatun mandaj ñuca amo ñuca mañashcata uyashpa ñucata cushichingami. Jatun mandaj ñuca amoca Diospaj ángel shina allitapish, mana allitapish alli ricushpa allichijmi. Chaimanta Mandaj Diosca canhuan cachun ninimi” nircami.

¹⁸Chaimi Davidca chai huarmitaca: — Ñucami canta tapugrini. Chaitaca imata ama pacashpa chaitataj huillachunmi rogani — nijpi chai huarmica: — Tapuilla jatun mandaj ñuca amito — nirca.

¹⁹Shina nijpi jatun mandajca: — Caicunataca ¿manachu Joabllataj yachachishpa cachajpi cashna nicungui? — nijpimi chai huarmica: — Jatun mandaj ñuca amo canca causacunguimi. Jatun mandaj ñuca amo nishcacunaca, ni alli ladoman ni lluqui ladoman mana pandachu. Cambajta ruraj Joabtajmari tucui caicunataca cutin cutin rimachishpa alli yachachishpa cambajta ruraj huarmitaca cambajman cacharca.

²⁰Can jatun mandajpaj yuyaita shujtajyachingapajmi cambajta ruraj Joabca chashna rurashpa cacharca. Cai pachapi ima tucucujta yachaj chayangapajca, ñuca amoca Diospaj ángel shina yachajmari cangui — nircami.

²¹Chaimi jatun mandajca Joabtaca: — Ñucatajmi caitaca ruragrini. Cunanca ri, Absalón huambrata tigrachimugri — nirca.

²²Shina nijpi Joabca jatun mandajta, alli nishcata ricuchingapajmi pambaman tupajta cumurirca. Taita Dios allicunata cuchun nishpaca: — Cambajta ruraj ñucaca cambaj ñaupajpi alli ricurishcatami yachani. Jatun mandaj ñuca amoca cambajta ruraj ñuca, ima nishcatami rurashcangui — nircami.

²³Joabca jatarishcahuan rishpami, Absalontaca Gesur pueblomanta Jerusalenman pushanaman rirca.

²⁴Jatun mandajca Absalontaca: “Ñuca ñahuita ama ricuchun paipaj huasiman richun” nishpa huillachijpimi Absalonca jatun mandajpaj ñahuita mana ricushpa paipaj huasiman tigrarca.

²⁵Tucui Israelpica Absalón shina sumaj runaca mana tiyarcachu. Paica chaquimanta umacama ima mana allica mana carcachu.

²⁶Absalonca paipaj uma ajchataca yallitaj llashajllapimi, huata tucuripi huata tucuripi rutuchij carca. Chai ajchata jatun mandajpaj pezanapi pezajpica, ishqui kilo shinatami pezarca.

²⁷Absalonca quimsa churita, Tamar shuti shuj ushushitami charirca. Tamarca sumaj ñahui huarmimi carca.

²⁸Absalonca Jerusalenpi ishqui huatacunata cashpapish jatun mandajpaj ñahuitaca mana ricurcachu.

²⁹Absalonca jatun mandajpajman cachangapaj Joabta cayanaman cachajpica, paica mana shamusha nircachu. Absalón cutin cayanaman cachajpipish, Joabca mana shamusha nircachu.

³⁰Absalonca paipajta rurajcunataca: — Joabpaj chagraca ñuca chagra c'uchullapimari, paica chaipimi cebada chagrata charin. Chaiman rishpa ninata japichigrichij — nijpimi Absalonpajta rurajcunaca, Joabpaj chagrapi ninata japichinaman rircacuna.

³¹Chaimi Joabca jatarishcahuan Absalonpaj huasiman rishpaca: — Cambajta rurajcunaca ¿ima nishpataj ñuca chagrapi ninata japichincunari? — nijpi,

³²Absalonca: — Ñucaca cantaca jatun mandajpajman rishpa cashna nichunmi cayaj cacharcani. Jatun mandaj: “¿Imapajtaj ñucataca Gesur pueblomanta pushanaman cacharcangui? Cashnalla canapaj randica ñucapajca chaillapitaj canami alli canman carca. Jatun mandajpaj ñahuitatajmi ricusha nini. Ñucapi ima mana alli tiyajpica huañuchi” ninmi nichunmi cantaca paipajman cachasha nircani — nircami.

³³Chaimi Joabca, jatun mandajpajman rishpa chaita yachaj chayachirca. Jatun mandajca Absalonta cayachijpi paica jatun mandajpajman shamushpami paipaj ñaupajpi pambaman tupajta cumurijpi jatun mandajca Absalontaca mucharca.