Read Chimborazo Highland Quichua 2 SAMUEL 16 Bible Online

2 SAMUEL 16 - Chimborazo Highland Quichua bible

2 SAMUEL 16

¹Davidca urcu jahuapi cashpa ashtahuan chaininijllaman rijpimi, Mefi-bosetpajta ruraj Siba runaca ishqui burrota parejashcapi 200 tandata, 100 huangu chaquichishca uvata, chaquichishca 100 higotapish, shuj capachu vinotapish apachishca Davidta tupanaman llujshirca.

²Chaipimi jatun mandajca Sibataca: — ¿Imapajtaj caicunaca? — nijpi Siba runaca: — Burrocunaca, jatun mandajpaj familiacuna tiyarishpa rinapajmi. Tandacunapish, chaquichishca uvacunapish jatun mandajpajta rurajcuna micunapajmi. Vinopish shitashca pambapi shaicujcuna ubyanapajmi — nirca.

³Chaimi jatun mandajca: — ¿Cambaj amopaj nietoca maipitaj? — nijpi, Siba runaca: — Paica: Ñuca abuelo mandanataca cunan punllami tucui israelcuna ñucaman tigrachinga nishpami Jerusalenpi saquirirca — nircami.

⁴Shina nijpimi jatun mandajca Siba runataca: — Mefi-boset tucui imalla charishcacunaca cunanca cambajmi — nijpi Siba runaca pambaman tupajta cumurishpa: — Jatun mandaj, ñuca amito cambaj ñaupajpica allimi ricurishcani — nirca.

⁵Jatun mandaj Davidca, Bahurim llajtamanmi shamurca. Chaipica Saulpaj familiapuramanta shuj runami tupanaman llujshirca. Paica Gera runapaj churi Simei runami carca. Pai tupanaman llujshishpaca llaqui tucushca canman nishpami,

⁶Davidtapish, paipajta rurajcunatapish, rumicunahuan shitarca. Jatun mandajhuan cajcunaca tucui gentecuna, tucui c'ari c'ari cajcunami, shujcunaca paipaj alli ladoman caishujcunaca paipaj lluqui ladoman carcacuna.

⁷Chashna cajpipish Simei runaca llaqui tucushca canman nishpami: — ¡Huañuchij millai runa, caimanta llujshishpa ri nirca!

⁸Saulpaj randi mandangapajmi paipaj tucui huasi familiata yahuarta jicharcangui. Chaimantami Mandaj Diosca cantapish chashnallataj llaquichicun. Cunanca Mandaj Diosmi can mandanataca, cambaj churi Absalonpaj maquipi churashca. Canca huañuchij cashcamanta llaquita apanallatatajmi apacungui — nircami.

⁹Chaimi Sarviapaj churi Abisaica jatun mandajtaca: — Cai huañushca allcutajlla runaca ¿ima nishpataj jatun mandaj ñuca amotaca cashna llaqui tucushca canman nicunchu imamí? Paipaj umata cunantaj p'itingapaj ñucata cachai — nirca.

¹⁰Jatun mandajca: — Sarviapaj churicuna, cancunaca mana chashna rurai tucunguichijchu. Mandaj Diosllataj Davidtaca llaqui tucushca canman nigri nijpi, llaqui tucushca canman nicungallatajmari. Chashna cajpica ¿pitaj paitaca imapajtaj chashna nicungui ni tucungari? — nircami.

¹¹Davidca Abisaitapish, tucui paipajta rurajcunatapish: — Ñucamanta llujshishca ñuca churillataj ñucata huañuchisha nishpa puricujpica, Benjaminpaj aillucarin chashna ningallatajmari. Llaqui tucushca canman nichun saquichijlla, Mandaj Diosllatajmi mandashca canga.

¹²Pai llaqui tucushca canman nicujpipish, ñuca llaquita apacujta Mandaj Dios ricushpa pai llaquishpa, llaqui tucushca canman nishcataca alliman tigrachingapishchari — nircami.

¹³Davidpish, paihuan cajcunapish paicuna ricushca ñanta ricujpica. Simei runaca, David ricun caishuj lado urcu quinritami imapish tucushca canman nihuan rumicunata, ñutu allpata shitaihuan rirca.

¹⁴Jatun mandajpish tucui paihuan cajcunapish Jordán yacuman shaicushca chayashpami, chaipi samarircacuna.

¹⁵Absalonca tucui paita catijcunandij, Israel runacunandijmi Jerusalenman yaicurca. Ahitofelpish paihuanmi carca.

¹⁶Chaipimi Davidhuan alli apanacuj arquita Husai runaca Absalonta tupanaman llujshishpaca: — ¡Viva jatun mandaj, viva jatun mandaj! — nishpa caparirca.

¹⁷Chaimi Absalonca Husaitaca: — Canhuan alli apanacujtaca ¿chashnachu pagui ningui? ¿Ima nishpataj canhuan alli apanacujllahuantaj mana rircanguiyari? — nijpi,

¹⁸Husaica Absalontaca: — Paihuanca mana rishachu. Ñucaca Mandaj Diospish, tucui caipi cajcunapish, tucui Israel runacunapish agllashca jatun mandajhuanmi saquirisha.

¹⁹¿Ñucaca pipajtataj ruracurcaniyari manachu cunanpish paipaj churipajta rurana cani? Cambaj yayapajta ima shinami rurarcani chai shinallatajmi cambajtapish rurasha — nircami.

²⁰Chaimi Absalonca Ahitofeltaca: — Shinashpaca ¿cunanca ñucanchij imata rurana cashcata yuyaita cui? — nirca.

²¹Chashna nijpimi Ahitofelca, Absalontaca: — Tucui israelcuna cambaj yayata can p'iñashcatataj yachachunca, huasita cuidachun cambaj yaya saquishca paipaj caishuj huarmicunapi chayari. Chaimi tucui canta catijcunapish ashtahuan fuerzaringacuna — nirca.

²²Chaimi mandashpa tiyana huasi jahuata pambajllata rurashcapi Absalonpaj shuj carpa huasita shayachirca. Chaipimi Absalonca, paipaj yayapaj caishuj huarmicunahuanca tucui israelcuna ricucujpi chayarinacurca.

²³Chai punllacunapica, Ahitofelta imatapish tapujpi pai cutichishcacunaca, Mandaj Diostaj rimashpa cutichishca shinami carca. Ahitofel yuyaita cushcacunaca Davidpajpish, Absalonpajpish chashnami carca.