Read Chimborazo Highland Quichua 2 SAMUEL 19 Bible Online

2 SAMUEL 19 - Chimborazo Highland Quichua bible

2 SAMUEL 19

¹Chaimi Joabmanca: Jatun mandajca llaquilla cana cashca shinallataj tucushpami, Absalonmantaca huacacun nishpa huillarcacuna.

²Jatun mandaj David chashna llaquilla cana cashca shina tucushpa huacacushcamantami, chai punllaca mishashcamanta tucuicuna cushicuna cashca cashpapish cushicunaca llaquilla canaman tigrarca.

³Chaimantami, chai punllaca Davidpaj soldadocunaca macanacuipi perdishpa miticushpa, shamucuj shina pingaihuan upajlla pacajlla chai pueblomanca yaicurcacuna.

⁴Jatun mandajca ñahuita taparishcami, yallitaj caparishpa: “Ñuca huahua Absalonlla, Absalón ñuca huahualla, ñuca huahualla” nishpa huacacurca.

⁵Joabca jatun mandaj maipi tiyacun huasiman yaicushpaca: — Cunanca canca cambaj causaitapish, cambaj churicunapaj causaitapish, cambaj ushushicunapaj causaitapish, cambaj huarmicunapaj causaitapish, cambaj caishuj huarmicunapaj causaitapish quishpichij cambajta rurajcunatamari jatunta pingaichingui.

⁶Chashna rurashpaca canta p'iñajcunataca c'uyacushcata, canta c'uyajcunataca p'iñacushcatami ricuchingui. Mandajcunapish, cambajta rurajcunapish cambajca ima mana cashcatami ricuchingui. Tucui ñucanchij huañushca cajpipish Absalón causaj cashca cajpica, cunan punllaca cambajca cushicui cana cashcatami ricuchingui.

⁷Cunanca jatarishpa canllaman llujshishpa cambajta rurajcunata imallatapish nishpa cushichi. Can mana chashna ninaman llujshijpica, Mandaj Diospish ricucunmi. Ricungui cunan tutallataj, shuj runallapish canhuanca manataj saquiringachu. Uchillamanta cunan caicama llaquicunata apashcata yalli llaquicunatami apangui — nircami.

⁸Shina nijpi jatun mandajca jatarishcahuanmi puebloman yaicuna pungupi tiyarirca. Chaimi chai pueblopi tucui causajcunamanca: Jatun mandajca puebloman yaicuna pungupimi tiyacun nishpa huillajpi, tucui chai pueblopi cajcunaca jatun mandajpaj ñaupajman shamurcacuna. Absalonhuan caj israelcunaca paicunapaj carpa huasicunapimi miticugrishca carcacuna.

⁹Israel aillucunaca tucuicunami achcata cashna parlanacurcacuna: “Jatun mandaj Davidca p'iñajcunapaj maquimantapish, filisteocunapaj maquimantapish ñucanchijtaca quishpichircami. Chashna cashca cashpapish Absalonta manchashcallamantami, cai llajtamantaca miticushpa rirca.

¹⁰Ñucanchijta jatun mandaj cachun aceitehuan churashca Absalonca macanacuipimari huañushca. Jatun mandaj Davidllatataj mandaj cachun tigrachimunata saquishpaca, ¿maitataj upallaca tiyacushunllari?” nircacunami.

¹¹Jatun mandajta paipaj mandana huasiman tigrachishun nishpa parlanacucujtaca, jatun mandajmanpish ñami yachaj chayachishcacuna carca. Chaimi jatun mandaj Davidca Sadoc curatapish Abiatar curatapish: “Jatun mandajta paipaj mandana huasiman tigrachinataca ¿ima nishpataj cancunaca q'uipayacunguichij?” nishpa Judá llajtata cunaj yuyajcunaman huillachun cacharca.

¹²“Cancunaca ñuca tullu, ñuca aicha, ñuca huauquicunamari canguichij. Chashna cashca jahuamari jatun mandajta tigrachishunchij ninataca, q'uipayacunguichij nigrichun cacharca.

¹³Amasa runatapish: ¿Manachu canpish ñuca tullu, ñuca aicha cangui? Cantaca Joabpaj randi tucui cambaj causaipi ñuca soldadocunata mandaj cachunmi churagrini. Mana chashna rurajpica ñucataca, Taita Dios jatunta llaquichichun ninmi nichij” nircami.

¹⁴Chaita huillajpimi Judá llajtapi causajcunaca tucuicuna shuj shinalla shungu tucushpa, jatun mandajpajmanca: “Canpish, cambajta rurajcunapish tigramuichijlla” nishpa huillachun huillajcunata cacharca.

¹⁵Jatun mandaj tigramushpaca, Jordán yacucamami shamurca. Judacunaca jatun mandajta tupashpa, Jordán yacuta ch'imbachingapajmi Gilgalman shamurcacuna.

¹⁶Benjamín aillumanta caj Gera runapaj churi Bahurimmanta caj Simeipish, judacunandij utca uriyashpami jatun mandaj Davidta tupagrirca.

¹⁷Semeihuanca Benjamín aillumanta caj 1.000 runacunapishmi shamurca. Saulpaj huasi familiapajta ruraj Siba runapish paipaj chunga pichca churicunata, paipajta ruraj ishqui chungacunata pushashcami Jordán yacuman chayarca. Paicunaca jatun mandaj manaraj ch'imbajpimi chai yacutaca ch'imbarcacuna.

¹⁸Paica jatun yacu ricun maitami ch'imbanallata ch'imbashpami, jatun mandajpaj familiata ch'imbachishpa jatun mandajpi alli ricuringapaj ch'imbarca. Jordán yacuta jatun mandaj ña ch'imbajpica, Gera runapaj churi Simeica Davidpaj ñaupajpi cungurishpami,

¹⁹jatun mandajtaca: — Jatun mandaj ñuca amo, can Jerusalenmanta llujshicui punlla cambajta ruraj ñuca mana allita rurashcataca cambaj yuyaipi ama charingui. Mana allita rurashcataca perdonapangui.

²⁰Cambajta ruraj ñucaca mana allita rurashcata rijsirinimi. Chaimi Josepaj huahua huahuapuramantaca, ñucaraj jatun mandaj ñuca amota tupanaman punta shamurcani — nircami.

²¹Chaimi Sarviapaj churi Abisaica: — Mandaj Dios churashca jatun mandajta llaqui tucushca canman nishcamantaca, cai Simei runaca ¿maitataj mana huañuna cangari? — nirca.

²²Shina nijpi, Davidca: — Sarviapaj churicuna, cancuna ñucata p'iñajcuna tucuchunca cancunapajca ¿ima mana allitataj rurashcaniyari? Manachari ñucaca tucui israelcunata jatun mandaj cani. Chashna cajpica israelcunaca maijanpish mana huañungachu — nircami.

²³Chashna nishpaca jatun mandajca Simei runataca: — Canca mana huañunguichu. Chaica chashnatajmi canga — nircami.

²⁴Saulpaj churi Mefi-bosetpish, jatun mandajta tupanaman uriyarcami. Paica jatun mandaj Jerusalenmanta llujshishpa rishca punllamanta jatun mandaj ima mana tucushca alli tigrangacama chaquicunatapish mana maillashcachu, barbastapish mana p'icharishcachu, paipaj churanacunatapish mana tajshashcachu carca.

²⁵Mefi-boset jatun mandajta chasquingapaj Jerusalenman chayajpica jatun mandajca: — Mefi-boset ¿ima nishpataj mana ñucahuan rircangui? — nircami.

²⁶Chaimi Mefi-bosetca jatun mandajtaca: — Jatun mandaj, ñuca amito. Cambajta ruraj ñucaca cojo cashcamantamari burropi tiyarishpa can jatun mandajta tupangapaj risha nishpa burrota parejai nishpa mandarcani. Ñucapajta rurajmari ñucataca umarca.

²⁷Umashpa rishpamari cambajta ruraj ñucataca jatun mandaj ñuca amoman yanga llullashca. Chashna cajpipish jatun mandaj ñuca amoca, Taita Diospaj ángel shinami cangui. Canpi ima shinami alli chaita rurapailla.

²⁸Ñuca yayapaj huasi ucupuracunaca, tucuicunamari jatun mandaj ñuca amopaj ñaupajpica, huañuchishca canapajlla carcanchij. Chashna cajpipish cambajta ruraj ñucataca cambaj cajcunahuan micuj cachunmi cayashcangui. Chaimanta can jatun mandajtaca, sinchi shimihuan imata mana ashtahuan mañai tucunichu — nircami.

²⁹Chaimi jatun mandajca: — Ñucaca imata mana ashtahuan ni tucunichu. Canhuan Sibahuan chai allpacunataca ñuca nishca shinallataj chaupinacuichijlla — nirca.

³⁰Mefi-bosetca jatun mandajtaca: — Siba tucuita japichun saquilla. Jatun mandaj ñuca amo paipaj huasiman ima mana tucushca alli tigrashcami ñucapajca ashtahuan alli — nircami.

³¹Galaadita Barzilaipish, Rogelimmantami uriyamurca. Paica Jordán yacu caishuj ladoman jatun mandajta minchacama ningapajmi jatun mandajhuan Jordán yacuta ch'imbarca.

³²Barzilaica 80 huatacunayuj yuyajmi carca. Paica yallitaj charij cashpami jatun mandaj Mahanaimpi cajpica, tucui imalla minishtirishcacunahuan ayudarca.

³³Jatun mandajca Barzilaitaca: — Ñucahuan jaculla. Jerusalenpica ñucapaj shinallataj cambajca ima mana illangachu — nircami.

³⁴Chaimi Barzilaica jatun mandajtaca: — Jatun mandajhuan Jerusalenman ñuca huichiyanapajca, achca huatacunallatapish causana cashpachu huichiyasha.

³⁵Ñami ñucaca 80 huatata charini. Ima alli cashcatapish ima mana alli cashcatapish ña mana yachai tucujmari cani. Cambajta ruraj ñucaca imata micushpapish, imata ubyashpapish alli cashcata mana alli cashcata mana yachai tucujmari cani. Cantaj c'aricuna, cantaj huarmicuna cantashcatapish mana alli uyanichu. Chashnaca cambajta ruraj ñucaca jatun mandaj ñuca amo llaquita apanapajllaca ¿maitataj rishari?

³⁶Cambajta ruraj ñucaca Jordán yacuta ch'imbancamallami, jatun mandajhuanca risha. ¿Ima nishpataj jatun mandajca chai tucuicunataca ñucapajca rurasha ninguichu imamí?

³⁷Cambajta ruraj ñucataca ñuca causashca puebloman tigrachun saquilla. Ñuca huañujpica ñuca yayata, ñuca mamata maipi churashcallapitaj churachuncuna. Cambajta ruraj ñuca churi Quimam caipimi. Can jatun mandaj ñuca amoca paita pushahuai. Can imalla allita rurasha nicushcataca paipaj rurapai — nircami.

³⁸Shina nijpi jatun mandajca: — Shinashpaca Quimam ñucahuan cachun. Tucui imalla allicunata cambaj rurasha nicushcataca paipaj rurasha. Can paipaj rurachun nishpa mañashcamantami paipaj ruragrini — nircami.

³⁹Tucuicunami Jordán yacuta ch'imbarcacuna. Jatun mandajpish ch'imbarcami. Chaipimi Barzilaitaca jatun mandajca muchashpa Dios allicunata cuchun nijpi, Barzilaica paipaj huasiman tigrarca.

⁴⁰Jatun mandajca Gilgalmanmi rirca. Quimampish paihuanmi rirca. Tucui judiocunami jatun mandajhuan rircacuna. Israelcunapish shuj chaupimi jatun mandajhuan rircacuna.

⁴¹Tucui Israel runacunapish jatun mandajpajman shamushpaca: — ¿Ima nishpataj ñucanchij huauqui judacunalla can jatun mandajtapish, cambaj familiacunatapish, cambajta rurajcunatapish Jordán yacuta ch'imbachishpa pusharca? — nircami.

⁴²Shina nijpi tucui judacunaca tucui israelcunataca: — Jatun mandajca ñucanchij c'uchulla familiallataj cajpimi, chashna rurarcanchij. Chaita rurashcamantachu cancunaca ¿p'iñaringuichij? ¿Ñucanchijca jatun mandajpajtachu imata micushcanchij? ¿Ima convidanatachu paipajta japishcanchij? — nircacunami.

⁴³Chaimi israelcunaca judacunataca: — Ñucanchijca chunga aillucuna cashcamantaca jatun mandajtaca ñucanchijmari yalli cuidana canchij. Chashna cashca jahuachu ñucanchijtaca ashallacunata shina yangapi churanguichij. Jatun mandajta tigrachimunataca ñucanchijmari punta parlanacurcanchij — nircacunami. Shina nijpipish judacunaca, israelcuna p'iñarishcata yalli p'iñarishpami paicunataca rimarcacuna.