Read Chimborazo Highland Quichua 2 SAMUEL 22 Bible Online

2 SAMUEL 22 - Chimborazo Highland Quichua bible

2 SAMUEL 22

¹Davidca tucui paita p'iñajcunapaj maquimantapish, Saulpaj maquimantapish quishpichishcamantami Mandaj Diostaca cai cantohuan,

²cashna alabarca: “Mandaj Diosca ñuca miticuna jatun rumimari. Ñucata huaquichijmari, ñucata quishpichijmari.

³Ñuca Taita Dioslla, ñuca pacatucunalla, paipimi shunguta churani. Paica ñuca escudomi. Tucuita rurai tucujhuan ñucata quishpichijmi. Tucuimanta yalli jahuaman ñuca miticunami. Ñuca quishpichijmi cangui. Llaquihuan cajpica canmi ñucata quishpichircangui.

⁴Mandaj Diostami mañasha. Paica alabana cajmi. Canmantami ñucata p'iñajcunamantaca quishpirisha.

⁵Yacu jahuajta jatarishpa tapaj shinami huañuica ñucataca pilluchirca. Millaicunaca jatun huaicuta yacu t'imburicuj shinami manchachirca.

⁶Seolpaj laziyanaca, lazyashpami charicurca. Huañuipaj laziyanataca ñuca jahuapimari shitarca.

⁷Chai llaquipi cashpami, Mandaj Diosta mañarcani. Ñuca Diostami caparircani. Ñuca caparishcataca paica paipaj huasimantami uyarca. Ñuca caparishcaca paipaj rinrincunamanmi chayarca.

⁸Pambapish cuyurcami. Allpapish chujchurcami. Jahua pachata aparijcunapish cuyurircami. Pai p'iñarijpica tucuimi cuyurirca.

⁹Paipaj singamantaca cushnimi llujshirca, paipaj shimimantaca tucuchij nina t'itacujmi llujshirca. Carboncunapish pai japichishcami lunyacurca.

¹⁰Jahua pachata cumurichishpami uriyamurca. Paipaj chaqui ucupica, amsa amsami carca.

¹¹Paica shuj querubinpi tiyarishpami volarca. Huairapaj alaspi tiyarishpami volarca.

¹²Paica paipaj muyundijta amsata churashpami pacatucurca. Yana yacu sangu p'uyumi muyushpa paitaca jarcarca.

¹³Paipaj ñaupajmantaca achijnicujmi llujshirca. Chai achijnicujca carboncunata japichishpami nina lunyacujta rurarca.

¹⁴Mandaj Diosca jahua pachamantami c'ulun nirca. Jahua pacha Diosca chashnami rimarca.

¹⁵P'iñajcunataca paipaj puntajlla caspita shitashpami caita chaita cacharca. Paipaj relampacunata cachashpami chingachirca.

¹⁶Mandaj Dios p'iñarishpa rimajpi pai singahuan p'ucujpica, mama cucha yacu asientopish, ricurircami. Cai pacha allpapaj shungupish ricunallami tucurca.

¹⁷Diosmi ñucataca jahuamanta maquita chutashpa japihuarca. Millpucuj jatun yacumantami llujshichihuarca.

¹⁸Ñucata p'iñaj c'ari c'aricunamantami quishpichirca. Ñucata p'iñajca ñucata yalli c'ari c'aricunami carca.

¹⁹Paicunaca ñuca llaquihuan cai punllamari japishpa llaquichircacuna. Ashtahuanpish Mandaj Diosmi ñucataca ayudahuarca.

²⁰Ñucataca canmi jatun pambaman llujshichij shina quishpichircangui. Can munashca cajpimi quishpichircangui.

²¹Ima shinami cashcata rurarcani, chai shinallatajmi Mandaj Diosca curca. Ñuca chuya maqui cashca shinallatajmi, paipish ñucaman cuna cashcata curca.

²²Ñucaca Mandaj Diospaj ñanpimi purircani. Millaita rurashpa Diosmantaca mana caruyashcanichu.

²³Tucui imalla pai mandashcacunaca ñuca ñaupajpimi. Can mandashcacunamantaca manataj caruyarcanichu.

²⁴Mana allita ruranamantaca huaquichirircanimi. Paipaj ñaupajpica ima pandata mana rurarcanichu.

²⁵Ñuca ima shinami cashcata rurarcani, chai shinallatajmi Mandaj Diosca ñucaman cuna cashcataca curca. Paipaj ñaupajpi ima shinami ñuca maqui chuya carcani, chai shinallatajmi cun.

²⁶Llaquij runamanca canpish llaquij cashcallatatajmi ricuchingui. Tucuita alli rurajpajca canpish allita ruranguimi.

²⁷Chuya cajmanca canpish chuya cashcallatatajmi ricuchingui. Llaquichijcunapajca canpish llaquichij cashcallatatajmi ricuchingui.

²⁸Llaquihuan cajcunataca canmi quishpichingui. Jatun tucushcacunata cumurichingapaj paicunataca cambaj ñahuica ricuracunmi.

²⁹Mandaj Dioslla, canca ñuca lamparami cangui. Ñuca Dioslla amsapi cajpipish canmi achijyachingui.

³⁰Canhuanca achca soldadocunatapish urata janajta cachashallami. Ñuca Dioshuanca jatun pircacunatapish urmachishpa llaquichingapaj yaicushallami.

³¹Mandaj Diospaj ñanpica ima panda mana tiyanchu. Mandaj Diospaj shimica, rupachishpa tucui mapata anchuchishca cullqui shinami. Paipi shunguta churashpa shuyajcunapajca escudo shina pacajmi.

³²Mandaj Diosmanta shujtaj Diosca ¿pitaj tiyangari? Mandaj Diosllamari Diosca. ¿Pitaj rumica cangari? Ñucanchij Diosmari chai rumica.

³³Taita Diosmi paipaj poderhuan chumbillichin. Paimi ñuca ñantaca allichishcata charin.

³⁴Paimi ñuca chaquicunataca taruga chaqui shina callpajta ruran. Jahua urcucunapi cajpipish ima manchai illajllatami charihuan.

³⁵Macanacungapaj ñuca maquicunata yachachijpish paimari. Bronce arcota ñuca rigrahuan muyurijta chutachunpish paimi fuerzata cun.

³⁶Ñucata quishpichij escudotapish canmi cungui. Cambaj c'uyaihuanmi jatunyachishcangui.

³⁷Canmi ñuca purichunpish ñantaca purinajllata rurashcangui. Chaimi ñuca chaquicunapish mana lluchcarishca.

³⁸Ñucata p'iñajcunataca catirashpami llaquichigrisha. Tucuitami tucuchisha. Tucuita tucuchingacama mana tigrashachu.

³⁹Ñuca tucuchijpica, ñuca ñutuchijpica manataj jataringacunachu. Ñuca chaqui ucupimi urmangacuna.

⁴⁰Jatun macanacuipi macanacuchunpish, fuerzatami chumbillichishcangui. Ñucata p'iñajcunataca, cumurichishpami ñuca maquipi churashcangui.

⁴¹Ñucata p'iñajcunataca, tigrachishpami cacharcangui. Ñucata p'iñajcunata ñuca tucuchichunmi chashna rurarcangui.

⁴²Paicunaca caparicurcami. Pi mana quishpichircachu. Mandaj Diosta caparijpipish mana uyarcachu.

⁴³Ñutu allpa shina tucujtami cutarcani. Ñancunapi sirij lodota shinami sarurcani. Tucuimi ñutuchircani.

⁴⁴Ñuca llajtapi causajcuna p'iñacunmantapish quishpichircanguimi. Llajtacunata mandaj cachunmi ñucataca huaquichircangui. Mana rijsishca runacunami ñucapajta rurangacuna.

⁴⁵Mana rijsishcacunamari ñuca mandana ucupi tucungacuna. Ñuca rimajta uyashpaca cazungallacunami.

⁴⁶Mana rijsishcacunaca fuerza illajmi tucungacuna. Paicuna pacatucushca cashcamantapish chujchushpami llujshingacuna.

⁴⁷Mandaj Diosca, huiñaita causacuchunlla. Ñuca jatun rumica alli nishca cachun. Ñucata quishpichij Diosca jatunyachishca cachun.

⁴⁸Paica ñucata llaquichijcunata llaquichij Diosmi. Gentecunata ñuca ucupi churaj Diosmi.

⁴⁹Paica p'iñajcunapaj maquimanta ñucata quishpichijmi. Ñucata llaquichingapaj huaicashpa jataricujpipish ñucata paicunapaj jahuapi churajmi. Yallitaj millai runapaj maquimantami quishpichihuarcangui.

⁵⁰Mandaj Dioslla, chaimantaca tucui llajtacunapimi canmanta huillasha. Cambaj shutitaca cantacushallami.

⁵¹Pai churashca jatun mandajtaca cushicushpami quishpichin. Pai churashca mandajtaca llaquicunllami. Davidtapish, paipaj huahuacunatapish huiñaitami chashna pushanga” nircami.