Read Chimborazo Highland Quichua 2 SAMUEL 23 Bible Online

2 SAMUEL 23 - Chimborazo Highland Quichua bible

2 SAMUEL 23

¹Cai shimicunaca ultimota David rimashcami: “Davidca Isaipaj churimi. Paica tucuicunapaj jahuapi churashca runami. Paitaca Jacobpaj Taita Diosmi mandaj cachun churarca. Israelcunapurapi mishqui cantota cantajca cai shimicunatami nin:

²Mandaj Diospaj Espiritumi ñucataca rimachin. Paipaj shimica ñuca c'allupimi.

³Israelcunapaj Taita Diosmari rimashca. Israelcunapaj pacatucuna Rumimi ñucaman cashna riman: Runacunapaj chaupipica, cashcata rurashpa mandajmi tiyanga. Taita Diosta manchashpami mandanga.

⁴Tutamantapi achijlla luz shinami canga. Shuj tutamanta p'uyu illajpi inti lamyacuj shinami canga. Allpapi q'uihuata tamya huiñachij shinami canga ninmi.

⁵Ñuca huasi familiaca Dioshuanca manamari chashnachu. Chashna cajpipish Mandaj Diosca ñucapajca huiñaipajmari ari nirca. Ñuca quishpirinata ñuca yuyashca shinaca manaraj sisachinchu. Chashna cashpapish tucui imapish ima shinalla canataca chashnataj tucuchun huaquichishcami.

⁶Millaicunaca cashacunata p'itishpa shitashca shinami canga. P'itishca cashataca pi mana maquihuan japi tucunchu.

⁷Maijanpish japisha nishpaca fierrohuan, mana cashpaca lanzahuanmi japincuna. Mana cashpaca chaillapitajmi tucui rupachincuna” nircami.

⁸Davidpaj c'ari c'ari runacunapaj shuticunaca caicunami: Tacmonita Joseb-basebetca soldadocunata mandajcunata mandajmi carca. Paimi shuj cutinca 800 runacunata huañuchirca. Chaimi paitaca, Adino-eznita nijcuna carca.

⁹Chaipaj q'uipaca ahohitita, Dodo runapaj churi Eleazarmi carca. Paica filisteocunahuan David macanacungapaj tandanacushca cajpi israelcuna Davidta shitarijpipish Davidhuan saquirij quimsa c'ari c'ari runacunapuramanta shujmi carca.

¹⁰Chaipimi Eleazar jatarishpaca filisteocunata paipaj maqui shaicungacama huañuchirca. Paipaj maquica espadata lutsashcapimi saquirirca. Chai punllapica Mandaj Diosmi paitaca jahualla mishachirca. Israelcunaca paicunata p'iñajcunata Eleazar imallata quichushcata japingapajllami, paipajman tigrarcacuna.

¹¹Eleazarpaj q'uipaca araritita Age runapaj churi Samami carca. Filisteocunaca ashalla allpa lentejacunahuan junda Lehipimi tandanacushca carca. Chaipipish israelcunaca filisteocunapaj ñaupajmanta miticushpa rircallami.

¹²Chaipica Sama runami lenteja chagra chaupipi shayarishpa paica mana cuyurishpa jarcashpa filisteocunata huañuchirca. Paitapish Mandaj Diosmi jahualla mishachirca.

¹³Quimsa chunga mandajcunamanta quimsami uriyamurcacuna. Paicunaca cozicha punllacunapi Adulam jutcupi David cajpi tupangapajmi shamurcacuna. Chai punllaca filisteocunapaj carpa huasicunaca Refaim pugru pambapimi carca.

¹⁴Chaimi Davidca peña jutcupi miticushca carca. Filisteocunapaj cuidaj soldadocunami Belenpi carca.

¹⁵Chaipi David yacunaihuan huañucushpami: “Belén pueblo pungu c'uchupi tiyaj pugyumanta yacuta maijan apamushpa ubyachijpichari alli canman” nirca.

¹⁶Chashna nijpimi chai quimsa c'ari c'ari runacunaca, filisteocunapaj carpa huasicuna chaupita pasashpa rishpa, Belén pueblo pungu c'uchupi tiyaj pugyu yacuta llujshichishpa japishpa Davidpajman apamurcacuna. Davidca mana ubyasha nircachu. “Cai yacutaca Mandaj Diosmanmi cuni” nishpa tallishpami:

¹⁷“Cai yacuta ñuca ubyanamantaca Mandaj Dios huaquichichun. Cai runacuna paicunapaj causaita cushpa, apamugrishca yacuta ubyashpaca, paicunapaj yahuarta ubyashca shinami canga” nishpami mana ubyasha nirca. Chai quimsa c'ari c'ari runacunami yacuta apamurcacuna.

¹⁸Sarviapaj churi Joabpaj huauqui Abisaica, soldadocunata mandaj quimsa chungacunata mandajmi carca. Paipaj lanzahuan 300 runacunata huañuchijmari paica. Chaimantami paica chai quimsa runacuna shinallataj alli nishca tucurca.

¹⁹Tucui caishujcunata yalli c'ari c'ari cashcamantami, chai quimsa chunga c'ari c'ari runacunata mandaj canata chasquirca. Chashna cashpapish puntapi caj caishuj quimsa c'ari c'aricuna shinatajca manataj cai tucurcachu.

²⁰Chai q'uipaca, Joiadapaj churi Benaiami carca. Joiadaca Cabseel pueblopi causaj imatapish mana manchashpa c'ari c'ari rurajmi carca. Benaiaca moabcunapaj ishqui leoncunatami huañuchirca. Paica rasucui punlla shuj jutcuman yaicushpami, shuj leonta huañuchirca.

²¹Paica egipcio shuj jatun runatapishmi huañuchirca. Egipcio runaca paipaj maquipica shuj lanzata aisashcami carca. Benaiaca shuj caspihuan egipciopajman uriyamushpaca paipaj lanzallatataj quichushpami paipaj quiquin lanzallahuantaj huañuchirca.

²²Chashna rurashpami Joiadapaj churi Benaiaca, quimsa c'ari c'ari runacunamanta alli nishca tucurca.

²³Paica quimsa chungacunata yalli alli nishca tucushpapish, puntapi caj caishuj quimsa c'ari c'aricuna shinatajca mana cai tucurcachu. Paitaca Davidca, paita cuidajcunata mandaj cachunmi churarca.

²⁴Joabpaj huauqui Asaelca, quimsa chunga runacunapurapimi carca. Belenmanta caj Dodopaj churi Elhananpish,

²⁵harodita Samapish, harodita Elicapish,

²⁶paltita Helespish, tecoita Iquespish,

²⁷anatotita Abiezerpish, husatita Mebunaipish,

²⁸ahohita Salmonpish, netofatita Maharaipish,

²⁹netofatita Baanapaj churi Helebpish, Benjamín aillupuramanta caj Gabaamanta caj Ribaipaj churi Itaipish,

³⁰piratonita Benaiapish, Gaas jatun yacu c'uchumanta caj Hidaipish,

³¹arbatita Abi-albonpish, Barhumita Azmavetpish,

³²saalbonita Eliabapish, Jasenpaj huahua huahuamanta Jonatanpish,

³³ararita Samapish, ararita Sararpaj churi Ahiampish,

³⁴Maacapaj churi Ahasbaipaj churi Elifeletpish, Gilomanta caj Ahitofelpaj churi Eliampish,

³⁵carmelmanta caj Hezraipish, arbitita Paaraipish,

³⁶Sobamanta caj Natanpaj churi Igalpish, gadmanta caj Banipishmi carca.

³⁷Amonita Selecpish, Beerotita Naharaipishmi carca. Paica Sarviapaj churi Joabpaj escudota apajmi carca.

³⁸Itritita Irapish, itritita Garebpish,

³⁹heteo Uriaspishmi carca. Tucui paicunaca quimsa chunga canchiscunami carca.