Read Chimborazo Highland Quichua 2 SAMUEL 5 Bible Online

2 SAMUEL 5 - Chimborazo Highland Quichua bible

2 SAMUEL 5

¹Tucui Israel aillucuna Hebronman Davidpajman shamushpaca: “Caipi cajcunaca tucuicunami cambaj tullu, cambaj aicha canchij.

²Saúl ñucanchijpaj jatun mandaj cajpipish, israelcunataca canmari macanacuiman pushaj carcangui. Canllatajmari tigrachimuj carcangui. Mandaj Diosmi cantaca: Ñuca israelcunataca can michingui. Canmi tucui israelcunata mandaj cangui nishcami carca” nircami.

³Israelcunata tucui cunaj yuyajcunapish Hebronmanmi jatun mandajpajman shamurcacuna. Chaipimi jatun mandajca paicunahuanpish Hebronpica Mandaj Diospaj ñaupajpi ari ninacurcacuna. Chaipimi paicunaca tucui israelcunata jatun mandaj cachun Davidtaca aceitehuan churarcacuna.

⁴Davidca mandai callarinapajca quimsa chunga huatayujmi carca. Paica chuscu chunga huatacunatami mandarca.

⁵Davidca canchis huata sujta quillacunataca Hebronpica judacunallatami mandarca. Quimsa chunga quimsa huatacunataca tucui israelcunata, judacunatapishmi Jerusalenpi mandarca.

⁶Jatun mandajca paipaj runacunandij Jerusalenman rishpaca, chaipi causaj jebuseocunahuan macanacungapajmi rirca. Paicunaca Davidtaca: “Caimanca mana yaicunguichu. Ñahui mana ricujcuna, patojocunapish can caiman yaicuchunca mana saquingacunachu” nircami. Davidca caimanca mana yaicui tucungachu yuyashpami chashna nircacuna.

⁷Chashna nicujpipish Davidca, sinchi pircayuj Siontaca paimi japirca. Chai puebloca cunanca Davidpaj pueblomi.

⁸Chai punllallatajmi Davidca: “Jebuseocunata maijanpish huañuchisha nijcunaca yacu rina larca ucuta rishpa, ñahui mana ricujcunata, patojocunata huañuchigrichij. Chaicunataca Davidca shungumantatajmi p'iñani” nircami. Chaimantami: “Mandaj Diospaj huasimanca ñahui mana ricujcuna, patojocunapish mana yaicunachu” nishca tiyan.

⁹Davidca chai sinchi pircayuj pueblopimi causarca. Chaitaca: “Davidpaj pueblo” nishpami shutichirca. Chai pueblo muyundijtaca allpata jundachishcamanta callarishpa, pai mandashpa tiyana huasicamami muyundijta jatun pircata rurachirca.

¹⁰Tucuita Mandaj Diosca Davidhuanmi carca. Davidca tucuipimi ñaupajman rirca. Tucuicuna jatunyachishcami carca.

¹¹Tiro pueblota jatun mandaj Hiramca, paipaj randi parlanacuj cachunmi maijancunata Davidpajman cacharca. Cedro caspicunatapish, carpinterocunatapish, rumicunata labrajcunatapishmi cacharca. Paicunami Davidpaj huasita rurarcacuna.

¹²Chaimi Davidca israelcunata jatun mandaj cachun Mandaj Dios churashca cashcata yacharca. Pai agllashca israelcunata Mandaj Dios c'uyashcamanta David tucui mandacunca ashtahuan jatunyacushcatapishmi yacharca.

¹³Davidca Hebronmanta Jerusalenman rishpaca paipaj quiquin huarmi cachun, paipaj caishuj huarmicuna cachunpish ashtahuan japircarajmi. Chai huarmicunaca c'ari huahuacunatapish, huarmi huahuacunatapishmi Davidpajta huacharca.

¹⁴Jerusalenpi huacharishca Davidpaj churicunaca: Samúa, Sobab, Natán, Salomón,

¹⁵Ibhar, Elisúa, Nefeg, Jafía,

¹⁶Elisama, Eliada, Elifelet shuticunami carcacuna.

¹⁷Tucui israelcunata jatun mandaj cachun Davidta aceitehuan churashcatami filisteocunaca yachaj chayarcacuna. Chaimi tucui filisteocuna Davidta mashcanaman huichiyarcacuna. David chaita yachashpaca alli pacatucunapimi pacatucunaman uriyarca.

¹⁸Filisteocuna shamushpaca, Refaim pugru pambapimi rigarishpa tiyarircacuna.

¹⁹Chaimi Davidca Mandaj Diostaca: — ¿Filisteocunahuanca macanacugrishachu? ¿Paicunataca ñuca maquipi churanguichu? — nishpa tapujpi Mandaj Diosca Davidtaca: — Rilla, filisteocunahuanca macanacugrilla. Paicunataca cambaj maquipi churashatajmi — nirca.

²⁰Shina nijpi David rishpaca, Baal-perazim pambapi macanacushpa paicunata mishashpami Davidca: “Mandaj Diosca jatun yacu jatun pircata t'unij shinami ñucata p'iñajcunataca ñuca ñaupajmanta anchuchin” nishpa, chai pambataca Baal-perazimta shutichirca.

²¹Filisteocunaca paicunapaj rurashcalla dioscunataca chaipi shitashpami rircacuna. Chaicunataca Davidca paipaj runacunandij tucushpami rupachircacuna.

²²Filisteocunaca cutinllataj shamushpami, Refaim pugru pamballapitaj rigarishpa tiyarircacuna.

²³Davidca cutinllataj Mandaj Diosta tapujpi, Mandaj Diosca: — Ch'imbapura macanacungapajca ama huichiyaichu. Ashtahuanpish bálsamo yuracuna tiyan ch'imbanijta muyushpa paicunataca cungaillapi japingui.

²⁴Bálsamo yuracuna puntacunata puricuj shinata uyashpaca, macanacunaman puri callaringuilla. Chaica Mandaj Diosmi filisteocunapaj carpa huasicunapi macanacungapaj canta ñaupashpa ricunga — nircami.

²⁵Davidca Mandaj Dios mandashca shinami rurarca. Chashnami filisteocunataca Gebamantaca Gezercama catishpa huañuchirca.