Read Chimborazo Highland Quichua 1 REYES 10 Bible Online

1 REYES 10 - Chimborazo Highland Quichua bible

1 REYES 10

¹Sabá llajtata jatun mandaj huarmica, Salomonca Mandaj Dios paiman yachaita cujpi yallitaj yachaisapa cashcata yachashpami, mana cutichi tucuipaj tapunacunata tapunaman shamurca.

²Chai huarmica paita cuidaj achca runacunandijmi Jerusalenman shamurca. Mishquijllata ashnacujtapish, achca curitapish, sumaj rumicunatapish camellocunapi apachishcami shamurca. Salomonpajman shamushpaca, paipaj shungupi tucui imallata yuyacushcatami tapurca.

³Jatun mandaj Salomonca tucui pai tapushcatami cutichirca. Shuj tapunallapish pai mana cutichi tucuipajca mana tiyarcachu.

⁴Sabá llajtata jatun mandaj huarmica Salomonpaj yachai ima shina cashcatapish, pai mandashpa tiyana huasita ima shinalla rurashcatapish,

⁵paipaj mezapi micunacunatapish, paipajta rurajcuna causana ucucunatapish, paipajta rurajcuna ima shina cashcatapish, paicuna churarishca ima shina cashcatapish, paipaj micunata pasachijcuna ima shina cashcatapish, Mandaj Diospaj huasipi Diosman cushpa ima shina tucui rupachij cashcatapish ricushpaca yallitajmi mancharirca.

⁶Chaimi jatun mandajtaca: “Can yallitaj yachaisapa cashcatapish, imalla rurashcacunatapish ñuca llajtapi cashparaj uyashca shinaca chashnatajmi cashca.

⁷Ñuca caiman manaraj shamushpaca, chashnataj canataca mana crircanichu. Cambaj yachaitapish, imalla rurashcacunatapish cunan ñuca ñahuihuantaj ricujpica, ñuca uyashca shinaca chaupillatapish mana huillashcacunachu.

⁸Canhuan caj runacunapish, cambajta ruraj cai runacunapish, yachaisapa shimicunata rimajta punllanta uyashpaca cushijllami cangacuna.

⁹Mandaj cambaj Taita Diosca, alli nishca cachun. Canca pai munashca cajpimi israelcunata mandaj cachun churarca. Mandaj Diosca israelcunata c'uyacujlla cashcamantami cashcata rurashpa paicunata mandachun cantaca churashca” nircami.

¹⁰Chai huarmica jatun mandajmanca 120 talento curita, mishquijllata ashnacujcunata, sumaj rumicunatapish achcatami curca. Sabá llajtata jatun mandaj huarmi cushca shina yallitaj achca mishquijllata ashnacujcunataca pi manaraj Salomonpajca apamurcachu.

¹¹Ofir llajtamantapish Hirampaj jatun barcopimi, curita apamushcacuna carca. Ofir llajtallamantatajmi achca sándalo caspicunatapish sumaj rumicunatapish apamurcacuna.

¹²Jatun mandajca sándalo caspicunataca balaustrecunata rurashpami Mandaj Diospaj huasipipish, pai mandashpa tiyana huasipipish churarca. Chai caspitaca tocanata yachajcunapajpish arpacunata, salteriocunatami rurarca. Jerusalenmanca sándalo caspicunataca chai shina yallitaj achcataca cutinca mana apamuncunachu, cunancama mana ricunchijllapishchu.

¹³Jatun mandaj Salomonca Sabá llajtata jatun mandaj huarmimanca tucui imallata ña cushca cashpapish, chai huarmi ashtahuan mañajpica, pai imata nishcata tucui imata mañashcatami curca. Chai q'uipaca chai huarmica paipajta rurajcunandij paipaj llajtaman tigrarcallami.

¹⁴Salomonca huatantami, 666 talentota pezaj curita chasquij carca.

¹⁵Chaica c'atushpa randishpa causajcunatapish, shujtaj llajtamanta apamushpa c'atujcunatapish, Arabia llajtata jatun mandajcunatapish, pai mandacun llajtapi churashca punta mandajcunatapish impuestota japishcata mana yupashcami chaica caj carca.

¹⁶Jatun mandaj Salomonca 200 jatun escudocunatami curimanta rurachirca. Cada escudopimi, 600 siclo curita churachirca.

¹⁷300 uchilla escudocunatapish curillamantatajmi rurachirca. Chai escudocunapica cada escudopi quimsa libra curitami churachirca. Jatun mandajca chai escudocunataca, Líbano nishca huasipimi churarca.

¹⁸Jatun mandajca jatun tiyarinatapish marfilmantami rurachirca. Chaitaca alli curihuanmi jahuata llihuichirca.

¹⁹Chai tiyarinaca sujta gradacunatami charirca. Chai tiyarinapi tiyarishpa huashaman arrimarina ladoca redondomi carca. Chai tiyarinapica shuj ladomanpish, caishuj ladomanpish rigracunatajllatami charirca. Chai rigratajllacunapica ishquindij ladoman shuj shuj leontajllacunata churashcami carca.

²⁰Gradacunapipish, ishquindij lado uripi chunga ishqui leontajllacunata churashcami carca. Shujtaj llajtacunapaj mandana huasicunapica, chai shina jatun tiyarinaca mana tiyarcachu.

²¹Jatun mandaj Salomón ubyana vasocunapish, Líbano nishca huasipi tiyaj tucui platocunapish curimanta rurashcami carca. Cullquimanta rurashcacunaca ima mana tiyarcachu. Salomón mandacui punllacunapica cullquica yanga shinallami carca.

²²Jatun mandajca Tarsisman purij barcocunatami Hirampaj barcocunahuan tandalla mama cuchapi charirca. Chai barcocunapimi Tarsismantaca cada quimsa huatapi shuj cutin curita, cullquita, marfilta, monocunata, pavo realcunatapish apashpa shamujcuna carca.

²³Chashnami jatun mandaj Salomonca, tucui shujtaj llajtacunata jatun mandajcunata yalli charijpish, jatun yachajpish tucushpa catirca.

²⁴Salomonpaj shungupi Taita Dios yachaita churashcahuanca ima shina rimaj cashcata uyangapajca, tucui llajtapi causajcunami Salomonpaj ñahuita ricunata munarcacuna.

²⁵Salomonman cungapaj rijcunaca huatantami curimanta, cullquimanta rurashca charinacunata, churanacunata, macanacunacunata, mishquijllata ashnacujcunata, caballocunata, machucunata apajcuna carca.

²⁶Salomonca carrocunata, caballopi tiyarij gentecunatapish ashtahuanmi tandachirca. Paica, 1.400 carrocunata, caballopi tiyarijcunatapish 12.000 gentecunatami charirca. Chaicunamanta shujcunataca carrocunata maillapi huaquichishca pueblocunapimi churarca. Caishujcunataca Jerusalenpimi pai jatun mandajta cuidachun churarca.

²⁷Jatun mandajca Jerusalenpica, yallitaj cullquiyujmi tucushpa catirca. Paipajca cullquica rumicuna shina yallitajmi tiyarca. Cedro caspicunatapish, Sefela pambapi tiyaj sacha higo yuracuna shina yallitaj achcatami charirca.

²⁸Jatun mandaj Salomonpaj randishpa c'atushpa purijcunaca caballocunatapish, linsocunatapish randishpa purijcuna cashcamantami, Egiptomantapish caballocunata, linsocunata Salomonpajca apamurcacuna.

²⁹Egipto llajtapica carroca, 600 cullquimi valij carca, caballoca 150 cullquimi valij carca. Chaicunataca Salomonpaj randishpa, c'atushpa purijcuna Egiptomanta apamujpimi heteocunata, Siriocunata jatun mandajcunaca paicunaman randijcuna carca.