Read Chimborazo Highland Quichua 1 REYES 14 Bible Online

1 REYES 14 - Chimborazo Highland Quichua bible

1 REYES 14

¹Chai punllacunallatajmi Jeroboampaj churi Abiasca ungurca.

²Jeroboamca, paipaj huarmitaca: — Jatari, Jeroboampaj huarmi cajta ama rijsichunca shujtaj huarmi shina churarishpa Silo puebloman ri. Chaipimi ñuca cai llajtata jatun mandaj tucunata huillaj profeta Ahiasca causan.

³Cai ñucanchij huahua ima tucunata huillachunca paipajman ri. Paiman cungapajca chunga tandata, mishqui tandata, sacha chuspipaj mishquitapish shuj mangapi apashpa ri — nircami.

⁴Jeroboampaj huarmica pai ima shina nishca shina rurashpami, Silo puebloman rishpa Ahiaspaj huasiman chayarca. Ahiasca yallitaj yuyaj cashcamantami, ña mana alli ricui tucurca.

⁵Ashtahuanpish Mandaj Diosmi Ahiasmanca: “Jeroboampaj huarmica, ungushca siricuj paipaj huahua ima tucuna cashcata tapungapajmi shujtaj shina churarishpa shamunga. Pai shamujpica, cashna chashna nishpa cutichingui” nircami

⁶Ahiasca chai huarmi paipaj huasi punguta yaicugrishpa paipaj chaquicuna sarushcata uyashpami: — Jeroboampaj huarmi, yaicui. ¿Ima nishpataj shujtaj huarmi shina churarishpa shamungui? Ñucaca canmanca jatun llaqui huillanata huillachishcatami huillagrini.

⁷Jeroboampajman rishpa cashna nigri: Israelcunata Mandaj Taita Diosca cashnami nin: Cantaca ñucami israelcunapuramanta agllashpa ñuca agllashca israelcunata mandaj cachun churarcani.

⁸Davidpaj huahua huahuapura mandacushcata quichushpami canman curcani. Canca manamari ñucapajta ruraj David shina rurashcanguichu. Paica tucui shunguhuanmi ñucata catirca. Paica ñuca ñahuimanta maiman mana anchurishpa ñuca mandashcacunata tucuita allita rurashpami causarca.

⁹Ashtahuanpish canca cambaj ñaupa tiyaj mandajcunata yalli millaita rurashpami, ñucamanta anchurishpa shujtajcunapaj dioscunata rurashcangui. Canca curimantami, shujtajcunapaj dioscunatajllata rurashcangui. Chashna rurashpami ñucata p'iñachishpa ñucamanca cambaj huashata ricuchishcangui.

¹⁰Chaimantami Jeroboampaj huahua huahuacunapajca jatun llaquita cachagrini. Jeroboampaj huasi ucu familiacunatapish paicunapajta rurajcuna cachunpish, mana rurajcuna cachunpish tucui c'aricunatami israelcunapuramanta chingachisha. Paicunataca jatun mapata p'ichashpa shitaj shinami tucuicunata chingachisha.

¹¹Jeroboampaj huahua huahuacunataca pueblopi huañujpica, allcucunami micunga. Pueblomanta carupi huañujpica, ullahuangacunami micunga. Mandaj Diostajmi chashna tucuchun nini ninmi nishpa huillangui.

¹²Canca jatarishpa, cambaj huasiman rilla. Puebloman can ña yaicugrijpica, huahuaca ña huañungallami.

¹³Paitaca tucui israelcunami yupashpa yupashpa huacashpa pambangacuna. Israelcunapaj Mandaj Diospaj ñaupajpica, Jeroboampaj huahua huahuacunapuramantaca paillami maijan maijan allicunata rurashca. Chaimanta paillatami Jeroboampaj huahua huahuataca huañujpi pambashca canga.

¹⁴Israelcunata Mandaj Diosca pai Mandaj Diospaj randi mandachunca, shujtaj jatun mandajtami churanga. Chai mandajca Jeroboampaj huahua huahuacunataca, shuj punllallapimi tucuicunata huañuchinga. Chaitaca cunanllatajmi Mandaj Diosca ruranga.

¹⁵Asera huarmi diostajllata rurashpa Mandaj Diosta p'iñachishcamantaca israelcunataca yacupi tiyaj carrizota shina caiman chaiman cuyuchishpami, paicunapaj ñaupa yayacunaman cushca allpamanta anchuchishpa Éufrates yacu chaininijman caita chaita cachanga.

¹⁶Mandaj Diosca Jeroboampaj juchacunamantami israelcunataca chashna shujtajcunapaj maquipi churanga. Jeroboamca pai millaita rurashpami israelcunatapish millaita rurachirca — nircami.

¹⁷Shina nijpica, Jeroboampaj huarmica jatarishcahuan rishpami, Tirsa puebloman shamurca. Ña huasiman chayashpa pungu chaqui caspipi sarushpa yaicugrijpica huahuaca huañurcallami.

¹⁸Chai huañushca huahuataca Mandaj Dios paipajta ruraj profeta Ahiasman huillachishca shinallatajmi tucui israelcunaca yupashpa yupashpa huacashpa pambarcacuna.

¹⁹Jeroboam ashtahuan imallata rurashcata, macanacuita ima shinalla rurashcata, Israel llajtata ima shina mandashcata ashtahuan yachasha nishpaca, israelcunata jatun mandajcuna imallata rurashcata quillcashca libropimi ricuna.

²⁰Jeroboamca, ishqui chunga ishqui huatatami israelcunataca mandarca. Paipaj ñaupa yayacunahuan pai dormijpica, paipaj randica paipaj churi Nadabmi mandarca.

²¹Salomonpaj churi Roboamca, Judá llajtatami mandarca. Paica chuscu chunga shuj huatayuj cashpami mandai callarirca. Mandaj Dios paipaj shutita chaipi churangapaj tucui Israel aillucunapuramanta agllashca Jerusalenpimi, chunga canchis huatata mandarca. Roboampaj mamaca, Amón llajtamanta Naama shutimi carca.

²²Judá llajtapi causajcunaca, Mandaj Diospaj ñaupajpica millaitami rurarcacuna. Paicunapaj ñaupa yayacuna rurashca juchacunatapish yalli juchacunata rurashpami Taita Diostaca p'iñachircacuna.

²³Tucui lomacunapi, tucui p'angasapa yura ucucunapimi, altarcunata, rumimanta imamanpish rijchajcunata, Asera huarmi diosman rijchajcunatapish rurarcacuna.

²⁴Mandaj Diosca sodomitacuna shinallataj millaita ruraj llajtacunataca israelcunapaj ñaupajmantami llujshichishpa cacharca. Israelcunapish paicuna shinallataj c'aricunapurallataj siririshpa millaita rurajcunami tucurca.

²⁵Jatun mandaj Roboam ña pichca huatacunata mandacujpimi, Egiptota jatun mandaj Sisac runaca Jerusalenpi causajcunahuan macanacungapaj huichiyashpaca,

²⁶Mandaj Diospaj huasipi tiyaj achca valij huaquichishcacunata, mandashpa tiyana huasipi tiyaj achca valij huaquichishcacunata tucuita llujshichishpa aparca. Salomón rurachishca curi escudocunatapish tucuitami aparca.

²⁷Jatun mandaj Roboamca, chai escudocunapaj randica bronce escudocunata rurachishpami, mandashpa tiyana huasi pungupi cuidaj soldadocunaman cuidachun curca.

²⁸Mandaj Diospaj huasiman yaicungapaj jatun mandaj rijpica, cuidaj soldadocunaca chai escudocunata apashpami, paihuan rijcuna carca. Chaimanta tigrashpaca cuidajcuna cuidacun ucullapitajmi churaj carca.

²⁹Roboam ashtahuan imalla rurashcata, tucui pai imalla rurashcata yachasha nishpaca, Judá llajtata jatun mandajcuna imalla rurashcata quillcashca libropimi ricuna.

³⁰Roboamhuan, Jeroboamhuanca tucui paicunapaj causaipimi macanacucujlla carca.

³¹Roboam paipaj ñaupa yayacunahuan dormijpica, Davidpaj pueblopi paicunapaj ñaupa yayacunata churashcallapitajmi paitapish churarcacuna. Paipaj mamaca, Amón llajtamanta Naama shutimi carca. Roboampaj randica paipaj churi Abiammi mandarca.