Read Chimborazo Highland Quichua 1 REYES 2 Bible Online

1 REYES 2 - Chimborazo Highland Quichua bible

1 REYES 2

¹Davidca ña huañunalla cashpami paipaj churi Salomontaca cashna mandarca:

²“Ñucaca cai allpamanta tucuicunallataj rina ñantami ña rigrini. Canca c'ari c'ari sinchi cangui.

³Ima shina causanata Mandaj Taita Dios yachachishcacunataca paipaj ñanpi purishpa pajtachingui. Chaicunataca chaitataj pajtachichun nishcata pajtachishpa, mandashcapi nishcacunata, pajtachinguitaj nishca shinataj rurashpa, Dios ima shina cashca shina causachun nishcacunatapish alli ricurashca pajtachingui. Can imata rurajpipish maiman rijpipish tucui alli llujshichun,

⁴Mandaj Dios ñucaman pai imallata cusha nishcata pajtachichunpishmi chashna rurana cangui. Paica ñucamanca: Cambaj huahuacuna tucui shunguhuan, tucui almahuan ñuca ñaupajpi chaitataj pajtachishpa ñuca ñanpi purijpica, cambaj huahua huahuacunaca israelcunata mandashpa tiyanapica mana illangachu nircami.

⁵Sarviapaj churi Joab ñucata ima shina llaquichishcataca canllataj yachanguimi. Paica Israel soldadocunata mandaj ishqui runacunatami huañuchirca. Paicunaca Nerpaj churi Abner, Jeterpaj churi Amasami carca. Paicunataca Joabca macanacui punllapi huañuchishcamantami manapish macanacui punllapi, macanacui punllapi shina yahuarta jichachishpa huañuchirca. Chai yahuarhuanmi pai chumbillirishca carapish, paipaj chaquipi churashca pargatepish mapayarca.

⁶Chashna rurashcamantaca alli yuyarishpa canpi ima shina alli cashcata ricushpa rurangui. Paitaca yuyajcama causashpa sumajta huañushpa Seolman uriyachunca ama saquingui.

⁷Ashtahuanpish Galaadita Barzilaipaj churicunataca llaquishpa canhuan micuchun cayashpa cambaj mezapi carashpa charingui. Cambaj huauqui Absalonta miticushpa ñuca ricujpica paicunami ñucata llaquishpa ñucaman cararcacuna.

⁸Bahurimmanta caj Benjaminpaj churi Gerapaj churi Simeipish canhuanmi. Paica Mahanaimman ñuca ricui punllami llaqui tucushca canman nishpa sinchita rimarca. Shina cashpapish paillatajmi Jordán yacupi ñucata tupanaman uriyarca. Chaipimi ñucaca paitaca Mandaj Diospaj shutipi: Manataj huañuchishachu nircani.

⁹Ashtahuanpish paita llaquichinataca amataj saquingui. Canca yachaj runa cashcamanta paita imata rurana cashcataca yachanguimi. Pai puzujlla uma tucungacama causajpipish yahuaryachishpataj Seolman uriyachun saquingui” nircami.

¹⁰David paipaj ñaupa yayacunahuan dormijpica, paipaj pueblollapitajmi pambarca.

¹¹Davidca israelcunataca chuscu chunga huatacunatami mandarca. Canchis huatacunataca Hebronpimi mandarca. Quimsa chunga quimsa huatacunataca Jerusalenpimi mandarca.

¹²Salomonca paipaj yaya David mandashpa tiyarinapimi tiyarirca. Pai mandacujpica pi mana cuyuchipajmi carca.

¹³Haguit huarmipaj churi Adoniasca, Salomonpaj mama Betsabeta ricunaman shamujpimi paica: — ¿Macanacuipajchu shamungui, allipajchu shamungui? — nijpi Adoniasca: — Ari, allipajmi shamuni — nirca.

¹⁴Shina nishcahuanmi: — Shuj shimita ninatami charini — nijpi Betsabeca: — Imata cashpapish nilla — nirca.

¹⁵Chaimi paica: — Mandaj canaca ñucapaj cashcataca yachanguimi. Tucui israelcunapish ñuca paicunata mandaj cachun chaparacujtaca yachanguimi. Mandaj Dios munashpa mandanata ñuca huauquiman cujpimi, mandaj canaca paipaj tucushca.

¹⁶Cunanca ñucaca shuj mañanatami mañagrini, ama mana ninguichu — nijpi Betsabeca: — Imata cashpapish nilla — nirca.

¹⁷Chaimi Adoniasca: — Jatun mandaj Salomontaca sunamitapura Abisag shuti huarmitaca ñuca huarmi cachun ñucaman cuchun nigrichunmi rogani. (Can chashna nijpica paica ari ningallami) — nirca.

¹⁸Shina nijpi Betsabeca: — Allimi, can nishcata jatun mandajhuan rimashallami — nircami.

¹⁹Betsabeca Adoniasmanta jatun mandaj Salomonhuan rimangapajmi shamurca. Jatun mandajca Betsabeta chasquingapaj jatarishpami paipaj ñaupajpi cumurirca. Chai q'uipaca paipaj tiyarinapi tiyarishpami, paipaj mamata tiyachingapaj shuj tiyarinata apamuchun mandarca. Chaimi paipaj mamaca paipaj alli ladoman tiyarirca.

²⁰Chaipimi Betsabeca: — Cantaca shuj uchilla mañaitami mañagrini. Ama mana ninguichu — nijpi, jatun mandajca: — Ñuca mamitalla, can ima nishcata mañailla, cushallami — nirca.

²¹Chaimi Betsabeca: — Sunamitapura Abisag huarmita cambaj huauqui Adoniaspaj huarmi cachun paiman cui — nirca.

²²Shina nijpimi jatun mandaj Salomonca paipaj mamataca: — ¿Ima nishpataj sunamitapura Abisag shuti huarmitaca Adoniaspaj huarmi cachun mañangui? ¿Ñuca mandanatapishchu paiman cuchun ningui? Paica ñuca jatun huauquimi. Abiatar curatapish, Sarviapaj churi Joabtapish ñami paillataj charicun — nirca.

²³Jatun mandaj Salomonca: “Adonías caita mañashcamanta ñuca paita mana huañuchijpica, ñucataca Taita Dios jatunta llaquichichun. Mandaj Diospaj shutipimi nini. Chashnatajmi rurasha” nircami.

²⁴“Ñuca yaya Davidman cambaj huahua huahuacunatami mandaj cachun churasha nishca shinallatajmi Mandaj Diosca Davidpaj jatun tiyanapica pi mana cuyuchipajta ñucata churarca. Pai Mandaj Diosca causajmi. Adoniasca cunantajmi huañunga” nircami.

²⁵Shina nishpami jatun mandaj Salomonca Joiadapaj churi Benaiataca, Adoniasta huañuchichun cachajpi paica Adoniasta japishcahuan llaquichishpa huañuchirca.

²⁶Jatun mandajca Abiatar curatapish: “Canpish huañunatajmi carcangui. Mandaj Jatun Diospaj arcata ñuca yaya Davidpaj ñaupajpi apashpa shamushcamanta, ñuca yaya llaquicunata apashca shinallataj tucui laya llaquicunata apashcamanta cantaca cunanca manaraj huañuchinichu. Chaimanta Anatotpi caj can japishca allpaman ri” nircami.

²⁷Chashnami Salomonca Abiatar curataca, Mandaj Diospaj cura cashpa ruranamanta anchuchishpa cacharca. Mandaj Dios Silo pueblopi Elipaj huahua huahuacuna llaqui tucuna cashcata huillashca pajtachunmi chashna tucurca.

²⁸Chashna tucushcataca Joabmanmi yachaj chayachirca. Joabca Absalonhuan mana shuj yuyailla tucushca cashpapish, Adoniashuan shuj yuyailla tucushcamantami, Mandaj Diospaj carpa huasiman miticushpa callpashpa rishpa chaipi caj altar gachucunapi charirayacurca.

²⁹Mandaj Diospaj carpa huasiman miticushpa rishpa altar c'uchupi Joab cajtaca Salomonmanmi yachaj chayachircacuna. Chaimi Salomonca Joiadapaj churi Benaiataca: Chaiman chayashcahuan Joabta llujshichigri nishpa cachajpimi,

³⁰Benaiaca Mandaj Diospaj carpa huasiman yaicushpa Joabtaca: — Jatun mandajca caimanta llujshichun ninmi — nijpi Joabca: — Mana llujshishachu. Caipimi huañusha — nijpi jatun mandajpajman Benaía tigrashpaca: Joab ima nishcata huillarca.

³¹Chaimi jatun mandajca: — Pai nishca shina huañuchishpa pambai. Chashna rurashpami manapish huañuna cashcacunata Joab huañuchishpa yahuarta jichashcacunataca, ñucamantapish ñuca yayapaj huasi ucupuramantapish anchuchingui.

³²Chashna rurajpimi cashcata ruraj, paitapish yalli alli ishqui runacunata Joab huañuchishpa yahuarta jichashcataca Mandaj Diosca paipaj jahuallamantaj tigrachinga. Nerpaj churi Abnerca Israel soldadocunata mandajmi carca. Jeterpaj churi Amasaca Judapaj soldadocunata mandajmi carca. Paicunataca ñuca yaya David mana yachajllapimi espadahuan huañuchirca.

³³Chashna rurajpimi, chai ishqui runacunata huañuchishpa yahuarta jichashcaca Joabpaj jahuallamantaj tigranga. Paipaj huahua huahuacunapaj jahuapipish huiñaipajmi canga. Ashtahuanpish Davidpaj jahuapi, paipaj huahua huahuacunapaj jahuapi, paipaj huasi ucupuracunapaj jahuapi, paipaj mandana jahuapica Mandaj Diospaj sumaj causaimi huiñaita paicunahuan canga — nircami.

³⁴Shina nijpimi Joiadapaj churi Benaiaca huichi rishcahuan Joabta japishcahuan llaquichishpa huañuchirca. Paitaca shitashca pambapi caj paipaj huasipimi pambarcacuna.

³⁵Jatun mandajca, Joabpaj randi soldadocunata mandaj cachunca, Joiadapaj churi Benaiatami churarca. Abiatar curapaj randi cura cachunca, Sadoctami churarca.

³⁶Chai q'uipami jatun mandajca, Simei runata pushamuchishpaca: — Jerusalenpi shuj huasita rurashpa chaipi causai. Chaimantaca maiman ama llujshingui.

³⁷Chaimanta llujshishpa Cedrón yacuta ch'imbashpaca, chai punllallatajmi huañungui. Chaipi canta huañuchishpa yahuarta jichashcaca cambaj jahuallatajmi canga — nirca.

³⁸Chaimi Simeica jatun mandajtaca: — Can nishcaca allimi, jatun mandaj ñuca amo nishca shinallatajmi cambajta ruraj ñucaca rurasha — nircami. Simeica achca punllacunatami Jerusalenpi causarca.

³⁹Ña quimsa huatacuna q'uipami Simeipajta ruraj ishquicunaca jatun mandaj Aquis mandacun Gatpi miticugrircacuna. Aquisca Maacapaj churimi carca. Simei runamanca: “Cambajta rurajcunaca Gatpimi” nishpami huillarcacuna.

⁴⁰Chaimi Simeica paipaj burrota parejashpa paipajta rurajcunata mashcangapaj Gat pueblota jatun mandaj Aquispajman rirca. Pai rishpaca Gatpi caj paipajta rurajcunatami pushamurca.

⁴¹Chaitami Salomonmanca Simei runaca Jerusalenmanta Gatman rishpa ña tigrashcata huillarcacuna.

⁴²Chaimi jatun mandajca Simeita pushamuchishpaca: — ¿Manachu cantaca cai pueblomanta maiman ama llujshinata Mandaj Diospaj ñaupajpi ari nichircani? Caimanta llujshishpaca chai punllallatajmi huañungui nishpa mandajpica: Can nishcaca allimi, can imata nishcataca pajtachishami nircangui.

⁴³¿Ima nishpataj Mandaj Diospaj ñaupajpi ari nishcatapish, ñuca mandashcatapish mana pajtachircangui? — nircami.

⁴⁴Jatun mandajca, Simeitaca cashnapishmi nirca: — Tucui mana allita rurashpa ñuca yaya Davidta llaquichishcataca canllataj yachanguimi. Cambaj shungullatajpish huillacunmi. Chaitaca Mandaj Diosmi cambaj jahuallamantaj tigrachishca.

⁴⁵Ashtahuanpish jatun mandaj Salomonca alli nishcami canga. Davidpaj mandanaca Mandaj Diospaj ñaupajpica huiñaita pi mana cuyuchipajmi canga — nircami.

⁴⁶Shina nishpaca jatun mandajca Joiadapaj churi Benaiataca Simeita huañuchichunmi mandarca. Chaimi paica llujshishcahuan rishpa chugrichijpi, Simeica huañurca. Chashnami mandanaca Salomonpaj maquipi pi mana cuyuchipaj sinchi tucurca.