Read Chimborazo Highland Quichua 1 REYES 20 Bible Online

1 REYES 20 - Chimborazo Highland Quichua bible

1 REYES 20

¹Siria llajtata jatun mandaj Ben-adadca, paipaj tucui soldadocunatapish, paihuan alli apanacuj quimsa chunga ishqui jatun mandajcunatapish paicunapaj caballocunandij, carrocunandijmi tandachirca. Ña tandachishpaca, Samaria puebloman huichiyashpami, chai pueblo muyundijta shayarishpa macanacunalla tucurcacuna.

²Ben-adadca, Israel llajtata jatun mandaj Acab maipi causacun puebloman huillashpa purijcunata cachashpaca:

³“Ben-adadca: Cambaj cullquipish, cambaj curipish, cambaj huarmicunapish, cambaj ashtahuan alli churicunapish ñucapajmi” nichunmi cacharca.

⁴Chaimi israelcunata jatun mandajca: “Can jatun mandaj ñuca amo nishca shinallataj ñucapish, ñuca tucui imalla charishcacunapish cambajmi” nirca.

⁵Huillashpa purijcuna Ben-adadpajmanta, Acabpajman cutin tigrashpaca: “Ben-adadca: Cambaj cullquita, cambaj curita, cambaj huarmicunata, cambaj churicunata, paiman cuchunmi cambajman cacharcani” ninmi nircacunami.

⁶Caya cai horasllatajmi, ñucapajta rurajcunata cambajman cachasha. Paicunami cambaj huasipi imalla cajcunata, cambajta rurajcunapaj huasicunapi imalla cajcunata, quillcangacuna. Tucui can imalla charishca achca valijcunatapish japishpami apamungacuna ninmi nircacunapishmi.

⁷Shina nijpi israelcunata jatun mandaj Acabca, chai llajtapi causaj tucui cunaj yuyajcunata cayachishpami: — Cai runaca ñuca huarmicunata, ñuca churicunata, ñuca cullquitapish, curitapish paiman cuchun nishpami paipaj runacunata cachashca carca. Chaita ari nishca jahuamari cunanca ashtahuan bullata mashcacun. Chaitaca ima shina canata alli yuyarishpa ricuichij — nircami.

⁸Shina nijpimi cunaj yuyajcunapish, tucui chaipi cajcunapish: — Pai ima nishcataca ama uyaichu. Paiman cuchun nishcatapish ama cuichu — nircacuna.

⁹Chaimi Acabca, Ben-adad cachashcacunataca: — Jatun mandaj ñuca amomanca: Cambajta ruraj ñucata ñaupaman mandashcataca rurashami. Ashtahuan shujtajtaca mana rurai tucunichu ninmi nigrichij — nircami. Chashna nijpi chai cachashcacuna rishpaca, pai nishca shinallatajmi huillagrircacuna.

¹⁰Ben-adadca, cutinllatajmi Acabtaca: “Cai Samaria pueblota mana tucui chingachishpa ñuca soldadocuna lutsaj lutsaj ñutu allpata apanapajllapish saquijpica, ñucataca ñuca dioscuna jatunta llaquichichun ninmi nigrichij” nishpami cacharca.

¹¹Shina nijpimi israelcunata jatun mandajca: “Macanacuipaj allichirishca shayacushpallaca ama ña mishashca shina cushicuichu ninmi nigrichij” nishpa cacharca.

¹²Chashna nijta uyashpami, Ben-adadca carpa huasicunapi caishuj jatun mandajcunahuan ubyashpa tiyacushpaca, paipajta rurajcunataca: — Allichirichij — nirca. Chaimi paicunaca Samariapi causajcunahuan macanacungapaj allichirircacuna.

¹³Chashna allichiricujpimi israelcunata jatun mandaj Acabpajman shuj profeta shamushpaca: — Mandaj Diosca cashnami nin: Canta p'iñajcunaca achca cashcatami ricungui. Chashna cajpipish paicunamanca Mandaj Diosca Diostaj cashcata ricuchingapajmi, cunanca paicunataca cambaj maquipi churagrini ninmi — nishpami huillarca.

¹⁴Chaimi Acabca: — ¿Paicunataca picunahuantaj ñuca maquipi churagrin? — nijpi chai profetaca: — Mandaj Diosca: Cai llajtacunapi caj mandajcunapajta ruraj soldadocunahuanmi cambaj maquipi churasha ninmi — nijpimi Acabca: — Macanacuitaca ¿maijantaj callarina? — nijpi chai profetaca: — Canmi callarina cangui — nirca.

¹⁵Shina nijpi Acabca, llajtacunapi mandajcunapajta ruraj soldadocuna mashna cashcatami ricurca. Chaicunaca 232 soldadocunami cashca carca. Chai q'uipaca tucui israelcuna mashna cashcatami ricurca. Paicunaca 7.000mi cashca carca.

¹⁶Ben-adadca paita ayudanaman shamushca quimsa chunga ishqui jatun mandajcunahuanmi carpa huasicunapi ubyashpa machashpa tiyacurcacuna. Acabca Ben-adadhuan macanacungapajca paipaj soldadocunandijmi chaupi punllata llujshirca.

¹⁷Llajtacunata mandajcunapajta ruraj soldadocunami puntashpa llujshircacuna. Ben-adad cachashca chapajcunaca: “Samariamantaca soldadocunami llujshimucuncuna” nishpami huillarcacuna.

¹⁸Chaimi Ben-adadca: “Ñucahuan alli tucungapaj shamucujpipish, causajta japishpa apamunguichij. Macanacunaman shamucujpipish, causajta japishpa apamunguichij” nirca.

¹⁹Llajtacunata mandajcunapajta ruraj soldadocuna ñaupashca llujshijpica, caishuj soldadocunapish paicunata catishcami llujshircacuna.

²⁰Israel soldadocunaca, paicunahuan macanacungapaj shamuj soldadocunataca tucuicunami shuj shuj huañuchircacuna. Siriocuna miticushpa callpajpipish israelcunaca catirashcami rircacuna. Siria llajtata jatun mandaj Ben-adadca, shuj caballopi tiyarishcami, caballocunapi tiyarij maijan soldadocunandij miticushpa rirca.

²¹Shina cajpipish israelcunata jatun mandajca cati japishpami caballocunapi purij soldadocunatapish, carrocunapi purij soldadocunatapish huañuchishpa siriocunataca yallitaj jatunta llaquichirca.

²²Chai q'uipami israelcunata jatun mandajpajman profeta shamushpaca: — Riqui, Siria llajtata jatun mandajca, caimanta shuj huatapica cutinllatajmi canhuan macanacunaman shamunga. Chaimanta ima shina ruranata alli yuyarishpa alli allichirishpa sinchi tucui — nircami.

²³Siria llajtata jatun mandajpajta rurajcunaca: — Israelcunapaj dioscunaca urcucunapimari caj cashca. Chaimari ñucanchijtaca mishancuna. Paicunahuanca pambacunapi macanacushpaca ricunguichij ñucanchijmi mishashun — nircacunami.

²⁴Cunanca cashna rurai: Jatun mandajcunataca paicuna mandacushcamanta anchuchishpa paicunapaj randica soldadocunata mandajcunata jatun mandajcuna cachun churai.

²⁵Macanacuipi chingachishca achca soldadocuna valillatataj achca soldadocunata tandachi. Caballocunatapish, carrocunatapish chai valillataj tandachi. Chashna allichirishpa pambacunapi macanacushpaca ricungui israelcunataca ñucanchijmi mishashun — nircacunami. Chaita uyashpaca Ben-adadca paicuna yuyachishca shinami rurarca.

²⁶Shuj huata q'uipami, Ben-adadca pai mandacun Siria llajtapaj soldadocunaca mashna cashcata ricushpa, israelcunahuan macanacungapaj Afec pambaman shamurca.

²⁷Israelcunapish paicunapaj soldadocuna mashna cashcata ricushpami, paicuna imalla apana cashcata apashpa siriocunahuan macanacungapaj tupagrircacuna. Israelcunaca ishquipi chaupirishpami, carpa huasicunata shayachishpa siriocunapaj ch'imbapurapi ishqui canlla chivocuna valilla tiyarircacuna. Siriocunaca chai tucui pamba jundami carca.

²⁸Chaipimi israelcunata jatun mandajpajman Diospaj runa shamushpaca: — Mandaj Diosca cashnami nin: Siriocunaca ñucataca Mandaj Diosca, urcucunapi causaj Diosmi, mana pambacunapi causaj Dioschu nincunami. Chaimantami cai yallitaj achcacunataca cambaj maquipi churagrini. Chashna rurajpimi ñucataca Mandaj Diostaj cashcata yachangui ninmi — nircami.

²⁹Canchis punllacamami, caishujcunapish caishuj ladoman chaishujcunapish chaishuj ladoman carpa huasicunata shayachishpa ch'imbapura tiyacurcacuna. Ña canchis punlla tucujpi macanacushpaca israelcunaca siriocunataca chaquillahuan purij, 100.000 runacunatami shuj punllallapi huañuchircacuna.

³⁰Chaipi mana huañuj maijancunaca Afec pueblopi miticugrijpimi, chai pueblo muyundij jatun pirca paicunapaj jahuapi urmashpa 27.000 siriocunata huañuchirca. Ben-adadpish chai pueblopi miticugrishpaca, shuj huasipi yaicushpami caishuj ucuman chaishuj ucuman miticushpa puricurca.

³¹Chaipimi paipajta rurajcunaca: — Israel llajtata jatun mandajcunaca llaquij cashcatami uyanchij. Cunanca cañamazuta churarishpa, huascahuan cungapi huatarishpa israelcunata jatun mandajpajman jacuchij. Chashna rijpica rogarinmi nishpaca cambaj causaita quishpichingapishchari — nircacunami.

³²Shina nishpaca, cañamazuta churarishpa, huascahuan cungapi huatarishpa israelcunata jatun mandajpajman shamushpaca: — Cambajta ruraj Ben-adadca ñucata ama huañuchihuaichu nipanmi — nircacunami. Shina nijpica Acabca: — ¿Paica causacunrajchu? Paica ñuca huauquimi — nircami.

³³Chashna nijpica, allitamari nicun yuyashpami paicunaca: — Ari, cambaj huauqui Ben-adadca causacunrajmi — nijpi Acabca: — Shinashpaca richij pushamugrichij — nirca. Ben-adad ña shamujpica, Acabca shuj carropimi huichiyachirca.

³⁴Chaipimi Ben-adadca Acabtaca: — Ñuca yaya cambaj yayata quichushca pueblocunataca canman tigrachishami. Samariapi ñuca yaya plazacunata rurashca shinallataj, canpish Damascopica plazacunata ruranguilla — nijpimi Acabca: — Chashnataj ruranata pajtachingapaj ari ninacushpa Ben-adadtaca richun — saquircalla.

³⁵Chaipimi profeta canata yachacuj Diospaj runaca caishuj runataca Diosllataj rimachijpi: — Ñucata chugrichi — nijpi caishuj runaca mana chugrichisha nirca.

³⁶Chaimi profeta canata yachacujca: — Mandaj Dios mandashcata mana cazushcamanta, cantaca ñucamanta anchurishpa rijpimi shuj león huañuchinga — nirca. Paimanta anchurishpa rijpica shuj león tupashpami paitaca huañuchirca.

³⁷Chai q'uipaca, profeta canata yachacujca shujtaj runahuan tupashpami: — Ñucata chugrichihuai — nijpi, chai runaca huajtashpa chugrichirca.

³⁸Profeta canata yachacujca, ama rijsichun linsohuan ch'ungullirishpami jatun mandaj Acabta ñanpi shuyagrirca.

³⁹Jatun mandaj paipaj chaita ña pasagrijpica: — Can jatun mandajpajta ruraj ñucaca macanacuipimi carcani. Chaipimi ñucanchijpura shuj soldadoca, shujtaj soldadota prezu japimushpa ñucaman cushpaca: Cai soldadota cuidangui. Ima shinamanta miticushpa rijpica canmi paipaj randi huañungui, mana cashpaca shuj talento cullquitami cuna cangui nircami nishpami sinchita caparirca.

⁴⁰Shina cajpipish cambajta ruraj ñuca caita chaita ruracujpimari, chai soldadoca ñapish mana ricurinlla — nijpimi israelcunata jatun mandajca: — Canllataj mana alli cuidashcamantaca, can huillashca shinallataj llaqui tucunguillatajchari — nirca.

⁴¹Ashtahuanpish ch'ungullirishca linsota anchuchijpimi israelcunata jatun mandajca, profetacunapuramanta shuj cashcata rijsirca.

⁴²Chaipimi profeta canata yachacujca Acabtaca: — Mandaj Diosca cashnami nin: Ñuca chingachina cashca runata cambaj maquimanta cacharishpa cachashcamantaca, canmi paipaj randi huañungui. Cambaj soldadocunami, paipaj soldadocunapaj randi huañungacuna ninmi — nircami.

⁴³Israelcunata jatun mandajca Samariapi caj paipaj huasimanmi llaquilla, p'iña rirca.