Read Chimborazo Highland Quichua 1 REYES 21 Bible Online

1 REYES 21 - Chimborazo Highland Quichua bible

1 REYES 21

¹Tucui chaicuna tucushca q'uipaca cashnami tucurca: Jezreel pueblopi causaj Nabotca Jezreel pueblollapitajmi Samariata jatun mandaj Acabpaj huasi c'uchullapi uva chagrata charirca.

²Acabca Nabottaca: — Ñuca huasi c'uchullapi caj cambaj uva chagrayuj allpata ñucaman cui. Chaipi yacu granocuna tarpuna huertata rurangapaj. Chai allpamantaca ashtahuan alli uva chagrayuj allpatami cusha. Mana cashpaca canpi ashtahuan alli cana cajpica, chai allpamanta mashna cullquita nishcatami cusha — nircami.

³Shina nijpimi Nabotca Acabtaca: — ¡Ñuca yayapajta japishca allpata canman cunamantaca Mandaj Dios huaquichichun! — nirca.

⁴Jezreelpi causaj Nabot runa ñuca yayacunapajta japishca allpataca mana cushachu nishcamantami Acabca llaquilla, p'iña paipaj huasiman shamushpa, camapi siririshpa ñahuita pataman churashpa mana micurca.

⁵Paipaj huarmi Jezabel paipajman shamushpaca: — ¿Ima nishpataj yallitaj llaquilla cangui? Mana micungui — nircami.

⁶Chaimi Acabca: — Jezreelpi causaj Nabottamari, paipaj uva chagrayuj allpata ñucaman cui ñucaca cullquita cusha nircani. Mana cashpaca chai allpapaj randica uva chagrayuj ñuca allpata cusha nircanimi. Shina nijpi paica: Ñuca uva chagrayuj allpataca mana cushachu ninmari — nircami.

⁷Paipaj huarmi Jezabelca: — ¡Canca israelcunata jatun mandajtaj shina cangui! Jatari, micui, cushicui. ¡Jezreelpi caj Nabotpaj uva chagrayuj allpataca ñucami canman cusha! — nircami.

⁸Chashna nishcahuan, Acabpaj shutipi quillcacunata rurashpami, jatun mandajpaj sortijashuan sellota churashpa, quillcacunataca, Nabot causacun Jezreel pueblota mandajcunamanpish, cunaj yuyajcunamanpish cuchun cacharca.

⁹Chai quillcacunapica cashnami carca: “Ayunangapaj nishpa tucuicunata tandachichij. Nabottaca tucuicunapaj ñaupajpi churashpa,

¹⁰Taita Diostapish jatun mandajtapish c'amircanguimi nichun ishqui millai runacunata paipaj ñaupajpi churanguichij. Chashna nijpica, paitaca pueblomanta canllaman llujshichishpa, rumicunahuan shitanguichij huañuchun” nircami.

¹¹Chai pueblopi causajcunaca, cunaj yuyajcunahuan, chai pueblopi causaj mandajcunahuan tucushpami, Jezabel huarmi ima shinalla quillcashpa cachashca shinallataj rurarcacuna.

¹²Ayunangapaj nishpa tandachishpaca, Nabottaca tucuicunapaj ñaupajpimi churarcacuna.

¹³Ishqui millai runacuna shamushpaca Nabotpaj ñaupajpimi tiyarircacuna. Chai millai runacunaca tucuicunapaj ñaupajpimi: “Nabotca Taita Diostapish, jatun mandajtapish c'amircami” nishpa juchachishpa huillajpi, Nabottaca pueblomanta canllaman llujshichishpa rumicunahuan shitajpi huañurca.

¹⁴Chashna rurashpami Jezabel huarmimanca: “Nabotca rumicunahuan shitajpi ñami huañun” nishpa huillachun cacharcacuna.

¹⁵Nabotca rumicunahuan shitajpi ñami huañun nijta Jezabel uyashpami Acabtaca: — Jezreelpi caj Nabotpaj uva chagrayuj allpata cullquipi canman mana cusha nij Nabotca mana causacunchu huañushcamari. Cunanca jatari chai allpata japigrilla — nirca.

¹⁶Acabca Nabot huañushcata uyashpami, Nabotpaj Jezreelpi caj uva chagrayuj allpata japingapaj jatarishcahuan utca rirca.

¹⁷Chaimi tisbita Eliastaca Mandaj Diosca:

¹⁸“Jatari Samariapi causashpa israelcunata jatun mandaj Acabhuan tupangapaj uriyai. Paica cunanca Nabotpaj uva chagrayuj allpapimi. Chaita japingapajmi paica Jezreelman uriyarca.

¹⁹Paitaca cashna ningui: Mandaj Diosca cashnami nin: ¿Nabotta huañuchishpami paipaj allpataca can japircangui? Can chaita rurashcamantaca, paipaj yahuarta allcucuna lambishca cai pamballapitajmi cambaj yahuartapish allcucunallataj lambinga ninmi Mandaj Diosca ningui” nircami.

²⁰Acabca Eliastaca: — Ñucata p'iñaj runamari ñucata caipi japinaman shamushcangui — nijpimi Eliasca: — C'aturij shina Mandaj Diospaj ñaupajpi millaita ruracujpimari canhuan tupaj shamuni.

²¹Mandaj Diosca cashnami nin: Cambaj jahuamanca jatun llaquitami apamuni. Acabpaj huahua huahuacunataca shuj c'arillatapish mana saquishpami, paipaj huasi familiacunataca tucuita chingachisha. Israelpica shujtajpajta rurashpa causajcuna cachun, mana rurashpa causajcuna cachunpish tucuitami chingachisha.

²²Ñucata mana cazushpa israelcunata millaita rurachishpa, ñucata p'iñachishcamantaca cambaj huasi ucu familiacunataca, Nabotpaj churi Jeroboampaj familiata, Ahiaspaj churi Baasapaj familiata shinallatajmi ruragrini ninmi.

²³Mandaj Diosca, Jezabel ima shina tucunatapish cashnami nin: Jezabeltaca Jezreel pueblo pirca muyundijpimi allcucuna micunga.

²⁴Acabpaj familiapura maijanpish pueblopi huañujcunataca, allcucunami micunga. Pueblomanta carupi huañujcunataca, ullahuangacunami micunga ninmi — nircami.

²⁵Acab shinatajca pi mana millaita rurarcachu. Paica paipaj huarmi Jezabel yuyaita cujpimi, c'aturij shina tucushpa Mandaj Diospaj ñaupajpi yallitaj millaita rurarca.

²⁶Acabpaj rurashcacunaca yallitaj millanayajmi carca. Paica amorreocuna ima shinalla ruraj cashca shina manapish dioscunata catishpami chashna tucurca. Amorreocunataca, chashna millaita rurajcuna cajpimi, Mandaj Diosca israelcunapaj ñaupajmanta anchuchishca carca.

²⁷Chashna nishcacunata Acab uyashpaca, pai churarishca churanataca lliquishpa cañamazuta churarishpa, ayunashpami, cañamazullapitaj dormishpa llaquilla purirca.

²⁸Chaimi Mandaj Diosca tisbita Eliastaca:

²⁹“¿Ñuca ñaupajpi Acab llaquirishpa cutirishca cajtaca ricunguichu? Chashna ñuca ñaupajpi cutirishcamanta pai causacujpirajca mana llaquichishachu. Paipaj churi mandacui punllapimi paipaj huasi familiataca llaquichisha” nircami.