Read Chimborazo Highland Quichua 1 REYES 22 Bible Online

1 REYES 22 - Chimborazo Highland Quichua bible

1 REYES 22

¹Siriocunahuan, israelcunahuanca quimsa huatatami mana macanacushpa causarcacuna.

²Judá llajtata jatun mandaj Josafatca ña quimsa huatata mandacushpami, Israel llajtata jatun mandaj Acabta ricunaman rirca.

³Chaipimi Israel llajtata jatun mandajca paipajta rurajcunataca: — Galaadpi caj Ramot pueblo ñucanchijpaj cashcataca, yachanguichijmi. Shina cajpipish Siria llajtata jatun mandajpaj maquimanta quichungapajca ñucanchijca imata mana rurashcanchijchu — nircami.

⁴Chaipimi Josafattapish: — Galaadpi caj Ramotpi causajcunahuan macanacugringapaj, ñucahuan shamusha ninguichu — nijpi Josafatca Israel llajtata jatun mandajtaca: — Ñucapish canpish shuj shinallami canchij. Ñuca soldadocunapish, ñuca caballocunapish cambaj cashca shinallatajmi — nirca.

⁵Chai q'uipami Josafatca, israelcunata jatun mandajtaca: — Mandaj Dios imata nishcata tapuchunmi rogani — nirca.

⁶Chaimi israelcunata jatun mandajca, 400 shina profetacunata tandachishpa: — ¿Galaadpi caj Ramotpi causajcunahuanca macanacugrishachu, mana cashpaca saquishallachu? — nijpi paicunaca: — Macanacugrilla, Mandaj Diosmi cambaj maquipi churanga — nircacuna.

⁷Shina nijpipish Josafatca: — Cai llajtapica ¿manachu Mandaj Diospaj profeta shujtaj tiyan, paitapish tapushpa alli yachangapaj? — nircami.

⁸Josafat chashna nijpimi, israelcunata jatun mandajca: — Imlapaj churi Micaías profeta tiyanrajmi, paitapish Mandaj Dios imata nishcata tapuchinchijmanchari. Paica shuj cutinllapish ima allita manamari huillanchu, ashtahuanpish llaquillatamari huillan. Chaimantami paitaca p'iñani — nijpi Josafatca: — Jatun mandaj ama chashna rimaichu — nirca.

⁹Chaipimi israelcunata jatun mandajca paipajta ruraj shujta cayashpaca: — Imlapaj churi Micaiasta utca pushamugri — nirca.

¹⁰Israelcunata jatun mandajpish, Judá llajtata jatun mandaj Josafatpish mandajcuna churana churanata churarishcami, Samariaman yaicuna pungu c'uchullapi caj plazapi jatun mandajcuna tiyarinapi tiyacurcacuna. Profetacunaca tucuicunami paicunapaj ñaupajpi huillacurcacuna.

¹¹Quenaanapaj churi Sedequiasca, fierro gachucunatami rurachishca carca. Chaimantaca: “Mandaj Diosca cashnami nin: Siriocunataca cai gachucunahuan sagmashpami tucuicunata huañuchingui ninmi” nishpami caparirca.

¹²Profetacunapish tucuicunami chai shinallataj huillashpa jatun mandajtaca: “Galaadpi caj Ramotmanca huichiyailla. Mandaj Diosmari cambaj maquipi churashpa chai macanacuitaca mishachinga” nircacuna.

¹³Micaiasta pushagrij huillaj runaca paitaca: — Caishuj profetacunaca tucuicunami jatun mandajtaca, mishanguimi nishpa cushichicuncuna. Canpish jatun mandajtaca, paicuna nishca shinallataj mishanguitajmi nishpa ashtahuan cushichingui — nircami.

¹⁴Shina nijpimi Micaiasca: — Mandaj Diosca causajmi. Ñucaca Mandaj Dios imata huillachun nishcallatami huillasha — nirca.

¹⁵Micaías jatun mandajpajman shamujpi jatun mandajca: — Micaías, Galaadpi caj Ramotpi causajcunahuan ¿macanacungapajca huichiyashunchu mana cashpaca saquishunllachu? — nijpimi Micaiasca: — Macanacungapaj huichiyailla mishanguichijmi. Mandaj Diosmi paicunataca can jatun mandajpaj maquipi churanga — nircami.

¹⁶Chaimi jatun mandajca: — ¿Mashna cutincamataj imatapish chashnataj cana cajllapi Mandaj Diospaj shutipica huillangui nicushallari? — nirca.

¹⁷Shina nijpi Micaiasca: “Tucui israelcunatami michij illajlla ovejacuna shina urcucunapi caita chaita puricujta ricurcani. Chaimi Mandaj Diosca: Caicunaca mandaj illajllamari puricuncuna. Tucuicuna imata mana manchashpa paicunapaj huasicunaman tigrachunlla nirca” nircami.

¹⁸Israelcunata jatun mandajca Josafattaca: — Chai runaca ñucapajca ima alli cana cashcataca mana huillangachu, ashtahuanpish llaqui cana cashcallatami huillanga nircanimi. ¿Manachu chashnallataj huillan? — nircami.

¹⁹Chaimi Micaiasca: — Mandaj Dios imata nishcata uyayari. Mandaj Diostaca paipaj jatun tiyarinapi tiyacujtami ricurcani. Jahua pachapi paipajta rurajcunapish alli ladomanpish, lluqui ladomanpish paipaj c'uchupi cajtami ricurcani.

²⁰Mandaj Diosca paicunataca: Galaadpi caj Ramotman huichiyashpa Acab llaqui tucugrichunca ¿maijantaj chaipi macanacugrina yuyaita cushpa umanaman risha ninguichij? nijpi shujca shujta, caishujca shujtajtami ninacurca.

²¹Mandaj Diospaj ñaupajman shuj espíritu shamushpami: Ñuca chai yuyaita cugrisha nijpi, Mandaj Diosca: ¿Ima shinataj umagringui? nirca.

²²Shina nijpi chai espirituca: Ñuca rishpaca, tucui profetacunatami llullachishpa huillachigrini nijpimi Mandaj Diosca: Can nishca shinallataj rurashpa umagrilla. Paitaca umai tucunguimi nirca.

²³Mandaj Diosmi cambaj tucui profetacunapaj shimiman llullachij espíritu richun saquirca. Mandaj Diosllatajmi can llaqui tucuchunpish nirca — nircami.

²⁴Chaimi Quenaanapaj churi Sedequiasca Micaiasta quijaduspi huajtashpaca: — Ñucapi caj Mandaj Diospaj Espirituca ¿maitataj cambajman rishpaca chashnaca huillachingari? — nirca.

²⁵Shina nijpimi Micaiasca: — Miticungapaj caishuj ucuman chaishuj ucuman huasi ucupi puricui punllami chashnataj cashcataca yachangui — nirca.

²⁶Chaimi israelcunata jatun mandajca: — Micaiasta japishpa pueblota mandaj Amonpajman, jatun mandajpaj churi Joaspajman apashpa,

²⁷cashna ninguichij: Cai runataca carcelpi churashpa macanacuita mishashpa ñuca tigramungacama, ashitajllata carashpa, yacutapish p'ichijllata cushpa huanachicuichij ninmi jatun mandajca nigrichij — nircami.

²⁸Shina nijpipish Micaiasca: “Macanacuita mishashpa alli can tigramushpaca, ñucaca Mandaj Dios manapish chashna huillachijpi chashna huillashcata yachangui” nircami. Chashna nishcahuanmi: “Tucuicunami cai nishcataca uyanguichij” nirca.

²⁹Israelcunata jatun mandajhuan, Judá llajtata jatun mandaj Josafathuanca Galaadpi caj Ramotmanmi huichiyarca.

³⁰Israelcunata jatun mandajca Josafattaca: — Ñucaca shujtaj churanata churarishpami macanacungapaj risha. Canca cambaj churanallatataj churarishca ringui — nishpaca israelcunata jatun mandajca, shujtaj churanata churarishpami macanacunaman rirca.

³¹Siria llajtata jatun mandajca carrocunapi purij quimsa chunga ishqui paipaj soldadocunata mandajcunataca: “Israelcunahuanca soldadocunahuanpish, soldadocunata mandajcunahuanpish ama macanacunguichijchu. Ashtahuanpish paicunata jatun mandajllahuan macanacunguichij” nircami.

³²Siria llajtapaj carro soldadocunata mandajcuna Josafatta ricushpaca: “Caitajmari israelcunata jatun mandaj” ninacushpami paihuan macanacungapaj paipajman shamujpi, Judá llajtata jatun mandaj Josafatca caparirirca.

³³Siria llajtapaj carro soldadocunata mandajcunaca israelcunata jatun mandaj mana cashcata ricushpami, paitaca saquishpa rircallacuna.

³⁴Ashtahuanpish shuj soldadomi puntajlla caspita arcohuan yangalla shitajpi chai caspica israelcunata jatun mandaj churarishca fierro churana chaupita yaicushpa chugrichirca. Chaimi paipaj carrota apajtaca: — Chugrichishcamari cani. Carrota muyuchishpa cai macanacuimanta ñucata llujshichi — nirca.

³⁵Chai punllaca chai macanacuica ashtahuanmi sinchiyarca. Jatun mandajca paipaj carro jahuapimi siriocunapaj ñaupajpi carca. Ña chishiyaitaca huañurcallami. Chugrimantaca yahuarca carro cajonpi cuchayajtami llujshirca.

³⁶Inti ña huashicugrijpimi, carpa huasimanta shuj caparishpaca: “¡Tucuicuna quiquin pueblocunaman, quiquin llajtacunaman tigrashunchij!” nirca.

³⁷Jatun mandaj huañujpica, Samaria puebloman apamushpami Samariapi pambarcacuna.

³⁸Chai carrotaca Samariapi caj tanque yacupimi maillarcacuna. Acabpaj yahuartaca allcucunami lambirca. Chai tanque yacupica huainayashcahuan causaj huarmicunami armaj carca. Mandaj Dios ima shina huillachishca shinallatajmi tucurca.

³⁹Acab ashtahuan imallata rurashcata, tucui imallata rurashcata, pai mandana huasita marfilhuan rurashcata, maijanlla pueblocunata rurashcata ashtahuan yachasha nishpaca, israelcunata jatun mandajcuna imallata rurashcata quillcashca libropimi ricuna.

⁴⁰Acab huañushpa paipaj ñaupa yayacunahuan dormijpica, Acabpaj randica paipaj churi Ocoziasmi mandarca.

⁴¹Israelcunata Acab chuscu huatata ña mandacujpimi Asapaj churi Josafatca, Judá llajtata mandai callarirca.

⁴²Mandai callaringapajca Josafatca quimsa chunga pichca huatayujmi carca. Jerusalenpica ishqui chunga pichca huatatami mandarca. Paipaj mamaca, Silhi shuti runapaj ushushi Azuba shutimi carca.

⁴³Josafatca Mandaj Diospaj ñaupajpica imata mana pandashpami, paipaj yaya Asa purishca shinallataj mana maiman anchurishpa chai ñancunallapi purirca. Chashna ruraj cashpapish lomacunapi tiyaj altarcunapi israelcuna sacrificiota ruracushcamanta, inciensota rupachicushcamantaraj mana anchuchi tucurcachu.

⁴⁴Josafathuan israelcunata jatun mandajhuanca, mana p'iñanacushpa causanatami ari ninacurcacuna.

⁴⁵Josafat ashtahuan imalla rurashcata, pai c'ari c'ari cashcata, jatun macanacuicunata rurashcata ashtahuan yachasha nishpaca, Judá llajtata jatun mandajcuna imallata rurashcata quillcashca libropimi ricuna.

⁴⁶Josafatca paipaj yaya Asa mandacui punllacunapi saquirishca c'aripurallataj siririjcunataca p'ichajtami anchuchirca.

⁴⁷Chai huatacunaca Edom llajtapica jatun mandajca mana tiyarcachu. Jatun mandajpaj randi churashca mandajllami tiyarca.

⁴⁸Josafatca Tarsisman purij jatun barcocunatami rurarca. Chai barcocunapimi Ofir llajtamanta curita apanaman rina carca. Ashtahuanpish barcocuna Ezión-geberpi p'aquirijpimi mana rircacuna.

⁴⁹Chaimi Acabpaj churi Ocoziasca Josafattaca: “Ñucapajta rurajcunahuan, cambajta rurajcunahuan jatun barcocunapi cachashun” nircami. Ashtahuanpish Josafatca mana chaita rurasha nircachu.

⁵⁰Josafat huañushpa paipaj ñaupa yayacunahuan dormijpica, paipaj ñaupa yaya Davidpaj pueblopimi pambarcacuna. Paipaj randica paipaj churi Jorammi mandarca.

⁵¹Judá llajtata ña chunga canchis huatata jatun mandaj Josafat mandacui huatami, Acabpaj churi Ocoziasca, israelcunata mandai callarirca. Paica ishqui huatatami, Samariapi mandarca.

⁵²Ocoziasca, Mandaj Diospaj ñaupajpica mana allitami rurarca. Paipaj yaya purishca ñanllapitaj purishpa, paipaj mamapaj ñanllatataj catishpa, Nabatpaj churi Jeroboam purishca ñanllapitaj purishpami, israelcunataca juchallichirca.

⁵³Paica paipaj yaya shinallataj Baalpajta rurashpa chaita adorashpami israelcunapaj Mandaj Diostaca yallitaj p'iñachirca.