Read Chimborazo Highland Quichua 1 REYES 3 Bible Online

1 REYES 3 - Chimborazo Highland Quichua bible

1 REYES 3

¹Salomonca Egiptota jatun mandaj Faraonpaj familiapurami tucurca. Paica Faraonpaj ushushita paipaj huarmi cachun japishpami, Davidpaj puebloman pusharca. Chai punllacunallatajmi paipaj huasitapish, Mandaj Diospaj huasitapish, Jerusalén muyundij jatun pircacunatapish tucui rurarca.

²Chai huatacunacamaca Mandaj Diospaj huasi manaraj tiyajpimi, israelcunaca lomacunapi rurashca altarcunapi sacrificiota Diosman cujcuna carca.

³Salomonca paipaj yaya David chaitataj pajtachichun nishca shinallataj causashpami Mandaj Diostaca c'uyarca. Shina cashpapish lomacunapi rurashca altarcunapimi sacrificiotapish inciensotapish Diosman cushpa rupachirca.

⁴Jatun mandajca Gabaonmanmi rirca. Chai lomapimi tucuimanta yalli alli nishca altar tiyarca. Chai altarpimi Salomonca huaranga animalcunata Mandaj Diosman cushpa tucui rupachij carca.

⁵Gabaonpi Salomón cajpimi Mandaj Diosca shuj tuta muscuipi paiman ricurishpaca: “Can imata nishcata mañailla, ñucaca cushallami” nirca.

⁶Shina nijpi Salomonca: “Cambajta ruraj ñuca yaya Davidca cambaj ñaupajpica mana nij tucushpalla, cashcatataj rurashpa, mana caita chaita yuyashpami cambaj ñaupajpi causarca. Chaimantami paitaca yallitaj c'uyashcangui. Chashna llaquij cashcataca pai mandashpa tiyanapi paipaj shuj churi tiyarichun saquishpami ricuchishcangui. Chaica cunan punllami pajtashca.

⁷Jatun Mandaj ñuca Dioslla cunanca cambajta ruraj ñucataca canmari ñuca yaya Davidpaj randi jatun mandaj cachun churarcangui. Ñucaca huambraraj cashcamanta mandaj ima shina canataca mana yachanichu.

⁸Cambajta rurajca can agllashcacunapaj chaupipimi. Paicunaca yallitaj achcacunami. Yallitaj achca cashcamanta pi mana yupai tucuipajmi.

⁹Can agllashca yallitaj achcacunataca pitaj mandai tucungari. Can agllashcacunapajca maijanpajlla alli cashcata, mana alli cashcata alli ricushpa mandangapajca cambajta rurajmanca yachaita cuhuayari” nircami.

¹⁰Salomón chashna mañashcaca Jatun Diospajca pai munashcami carca.

¹¹Chaimi Taita Diosca: “Unita causanatapish, achcata charij canatapish, canta p'iñajcunata chingachichunpish mana mañashcanguichu. Chashna mañashpaca canca pi mana mañashcatami mañashcangui. Ashtahuanpish imata nicujta alli uyarashpa allichingapaj alli yuyaiyuj canatami mañashcangui.

¹²Can shinaca cambaj ñaupapish pi shujtajca mana tiyashcachu. Cambaj q'uipapish can shina shujtajca pi mana tiyangachu. Chaimanta can mañashca shinallatajmi curcani. Alli yuyaiyuj, yachaisapa canatami curcani.

¹³Can mana mañajpipish achca charinacunata, jatunyachishca canatami curcani. Jatun mandajcunapurapica cambaj tucui causaipi can shina pi shujtajca mana tiyangachu.

¹⁴Cambaj yaya David causashca shinallataj chaitataj pajtachingui nishcacunata pajtachishpa, ñuca mandashcacunata cazushpa causajpica cambaj causaitapish mirachishami” nircami.

¹⁵Salomón rijcharishpaca muscucushcatami entendirca. Chaimi Jerusalenman rishpa Mandaj Dioshuan ari ninacushca quillcata huaquichina arca ñaupajpi Mandaj Diosman cushpa tucui rupachirca. Paihuan alli cangapajpish sacrificiocunatami curca. Paipajta ruraj tucuicunahuanpish jatun micuitami rurarca.

¹⁶Chai punllacunami jatun mandajpajmanca huainayashcahuan causaj ishqui huarmicuna shamurca.

¹⁷Paicunamanta shujmi: — ¡Aij, ñuca amito! Ñucapish, cai huarmipish chai huasillapitajmi causanchij. Chai huasipi cashpami ñucaca shuj huahuata huacharcani.

¹⁸Ñuca huachashca quimsa punlla q'uipami cai huarmipish huacharca. Ñucanchij ishquillami chai huasipica causanchij. Pi shujtajca chai huasipica mana causanchu.

¹⁹Shuj tutami cai huarmipaj huahuaca dormicushpa mamallataj llapijpi huahuaca huañushca carca.

²⁰Chaimi paica chaupi tutata jatarishpa, cambajta ruraj ñuca dormicujpi ñuca c'uchupi siricuj ñuca huahuata japishpa paipaj huañushca huahuataca ñuca c'uchupi sirichishpa ñuca huahuataca paipaj c'uchupi sirichishpa siririshca carca.

²¹Ña pacaricujpi jatarishpa ñuca huahuata chuchuchisha nijpica, huañushca huahuallami cashca carca. Ña pacarijpi alli ricujpica, mana ñuca huachashca huahuachu cashca carca — nircami.

²²Shina nijpimi caishuj huarmica: — Mana chashnachu. Causaj huahuaca ñucapajmi. Huañushca huahuami cambaj — nijpimi caishuj huarmica cutinllataj: — Mana chashnachu. Huañushca huahuami cambaj. Causaj huahuaca ñucapajmi — nishpa jatun mandajpaj ñaupajpi rimanacucurcacuna.

²³Chaimi jatun mandajca: “Cai huarmica: Causaj huahuaca ñucapajmi, huañushca huahuami cambaj ninmi. Shinallataj caishujpish: Mana chashnachu huañushca huahuami cambaj, causaj huahuaca ñucapajmi” ninmi.

²⁴Chashna nishpaca jatun mandajca: — Shuj espadata apamuichij — nijpimi, jatun mandajpajmanca shuj espadata apamurcacuna.

²⁵Espadata apamuncami jatun mandajca: — Causaj huahuata chaupita p'itishpa shuj chaupitaca shujman, caishuj chaupitaca caishujman cuichij — nirca.

²⁶Shina nijpi causaj huahuapaj mamaca: — ¡Paipaj huahuamanta tucui shungumanta llaquirishpami jatun mandajtaca: ¡Aij, ñuca amito. Causaj huahuataca cai huarmiman cuilla. Ama huañuchichu! — nirca. Ashtahuanpish caishujca: — Ñucapajpish paipajpish ama cachun chaupilla! — nircami.

²⁷Chaimi jatun mandajca: — Causaj huahuataca ama huañuchichu nicuj huarmiman cui. Paimi paipaj mama — nirca.

²⁸Jatun mandaj chai p'iñanacuita chashna allichishcataca tucui israelcunami uyarcacuna. Imatapish cashcata rurashpa allichichun jatun mandajman Taita Dios yachaita cushcata ricushpami jatun mandajtaca mancharcacuna.