Read Chimborazo Highland Quichua 1 REYES 4 Bible Online

1 REYES 4 - Chimborazo Highland Quichua bible

1 REYES 4

¹Jatun mandaj Salomonca tucui israelcunatami mandarca.

²Pai churashca mandajcunaca caicunami: Sadoc curapaj churi Azariasca curami carca.

³Sisa runapaj churicuna Elihorefpish, Ahiaspish quillcajcunami carca. Ahiludpaj churi Josafatca quillcashcacunata huaquichijmi carca.

⁴Joiadapaj churi Benaiaca, soldadocunata jatun mandajmi carca. Sadocpish, Abiatarpish curacunami carca.

⁵Natanpaj churi Azariasca pueblocunapi churashca mandajcunata mandajmi carca. Natanpaj churi Zabudca curami carca. Jatun mandajman yuyaita cujmi carca.

⁶Ahisar runaca mayordomomi carca. Abdapaj churi Adoniramca, sinchi trabajopi trabajajcunata mandajmi carca.

⁷Salomonca tucui Israel llajtapica chunga ishqui mandajcunatami charirca. Paicunami jatun mandajpajpish paipaj huasi familiapajpish causanapajca apamujcuna carca. Paicunaca cada quillami huashan huashan apamunataj cajcuna carca.

⁸Chaicunapaj shuticunaca caicunami: Hurpaj churitaca Efraín urcupi caj llajtata mandachunmi churarca.

⁹Decarpaj churitaca Macaz llajtata, Saalbim llajtata, Bet-semes llajtata, Elón llajtata, Bet-hanán llajtata mandachunmi churarca.

¹⁰Hesedpaj churitaca, Arubot llajtata mandachunmi churarca. Soco llajtatapish, Hefer tucui llajtatapish paillataj mandachunmi churarca.

¹¹Abinadabpaj churitaca, Dor llajtapi tiyaj tucui llajtacunata mandachunmi churarca. Paipaj huarmica Salomonpaj ushushi Tafatmi carca.

¹²Ahiludpaj churi Baanataca Taanac llajtata, Meguido llajtata, Bet-seanpi caj tucui llajtacunata mandachunmi churarca. Chai llajtacunaca Jezrelmanta ura ladoman caj Saretán llajta c'uchullapimi carca. Bet-seanmanta callarishpaca Abelmeholacama caishuj ladoman caj Jocmeamcamami carca.

¹³Geberpaj churitaca Galaadpi caj Ramot llajtata mandachunmi churarca. Galaad llajtallapitaj caj Manasespaj churi Jairpaj pueblocunatapish paillataj mandachunmi churarca. Basán llajtapi caj Argob llajtatapish paillataj mandachunmi churarca. Chai llajtaca sinchi pircacunayuj bronce aldabacunayuj canchis chunga jatun pueblocunayujmi carca.

¹⁴Iddopaj churi Ahinadabtaca Mahanaim llajtata mandachunmi churarca.

¹⁵Ahimaastaca Neftalí llajtata mandachunmi churarca. Paipish Salomonpaj ushushi Basemattami paipaj huarmi cachun japirca.

¹⁶Husaipaj churi Baanataca Aser llajtata, Alot llajtata mandachunmi churarca.

¹⁷Paruapaj churi Josafattaca, Isacar llajtata mandachunmi churarca.

¹⁸Elapaj churi Simeitaca Benjamín llajtata mandachunmi churarca.

¹⁹Uripaj churi Gebertaca, Galaad llajtapi caj llajtata, amorreocunata jatun mandaj mandacushca Sehón llajtapi caj llajtata, jatun mandaj Og mandacushca Basan llajtatapish paillataj mandachunmi churarca. Chai llajtapica, chai Geberllami mandaj carca.

²⁰Judacuna, israelcunaca mama cucha c'uchupi tiyaj t'iyu allpa shina yallitaj achcacuna micushpa, ubyashpa cushicujcunami carca.

²¹Salomonca Éufrates yacumantaca filisteocunapaj llajtacamami tucui chai llajtacunata mandarca. Chai lindeca Egiptohuan tupanacuncamami carca. Tucui chai llajtacunami Salomonpaj tucui causaipi imalla cuna cashcata cushpa, paipajta rurashpa causarcacuna.

²²Salomón mandacui punllacunapica micunacunataca, punllantami quimsa chunga coro alli cutata, sujta chunga coro yangalla cutata,

²³huirayashca chunga huagracunata, michina ishqui chunga huagracunata, patsaj ovejacunata micungapaj allichijcuna carca. Tucui chaicunaca ciervo tarugacunata, gacela tarugacunata, corzo tarugacunata, huirayashca atillpacunata mana yupashcami chashna caj carca.

²⁴Salomonca Éufrates yacumanta inti huashicun ladoman caj llajtacunataca Tifsamanta callarishpa Gaza pueblocamami mandarca. Éufrates yacumanta inti huashicun ladoman caj tucui llajtata jatun mandajcunaca Salomonpaj ucupimi carca. Chai tucui muyundij llajtacunahuan macanacui mana tiyashcamantami cushicuihuan causarcacuna.

²⁵Salomón mandacui punllacunapica, judacunapish, israelcunapish Danmantaca, Beersebacamami tucuicuna uva chagracunayuj, olivos chagracunayuj imata mana manchashpa causarcacuna.

²⁶Salomonca paipaj caballocuna shayanapica, carrocunata aisachun 4.000 caballocunatami charirca. Caballocunapi tiyarij 12.000 soldadocunatapishmi charirca.

²⁷Jatun mandaj Salomonpajpish, paihuan micungapaj mezapi tiyarijcuna micuchunpish cada quilla huashan huashanmi jatun mandaj churashca mandajcunaca imalla cuna cashcata apamujcuna carca. Chaimi paica ima mana illaj carca.

²⁸Caballocunapajpish, aparij animalcunapajpish cebadata, ujshatami Salomón maipi canman apamuchij carca. Paicunaca maijanpaj apamuna tucujpica huashan huashanmi apamujcuna carca.

²⁹Taita Diosca Salomonmanca yachaisapa canata, imata rurangapajpish jahualla allita yuyarij canatami curca. Chaimi paipaj shungupi yuyaicunaca mama cucha uripi tiyaj t'iyu shina yallitaj achca carca.

³⁰Salomonpaj yachaica inti llujshin ladoman caj jatun yachajcunapaj yachaitapish yalli, egipciocunapaj tucui jatun yachajcunapaj yachaitapish yallimi carca.

³¹Salomonca tucui yachaisapacunatapish, ezraitapura caj yachaisapa Etan runatapish, Hemán, Calcol, Darda shuti Maholpaj yachaisapa churicunatapish yallitaj yachaisapami carca. Chaitaca tucui muyundij llajtacunapi causajcunami yacharcacuna.

³²Salomonca, 3.000 proverbios nishca shimicunata, 1.005 cantocunatami quillcarca.

³³Salomonca yuracunamantapish libanopi tiyaj cedro yuramanta callarishpaca, pata quinricunapi huiñaj hisopo yura ima shina cashcacamami yachachirca. Animalcunamantapish, tucui alasyuj animalcunamantapish, llucashpa purij animalcunamantapish, chalhuacunamantapishmi ima shina cashcata yachachirca.

³⁴Salomón yachaj cashca maillapi uyarishca llajtacunamantaca llajtapi causajcunapish, jatun mandajcunapish tucuicunami pai yachaj cashcata uyangapaj shamurcacuna.