Read Chimborazo Highland Quichua 1 REYES 7 Bible Online

1 REYES 7 - Chimborazo Highland Quichua bible

1 REYES 7

¹Chai q'uipaca Salomonca, paipaj quiquin huasitami shayachirca. Chunga quimsa huatapimi tucuitaca tucuchirca.

²Shinallataj Líbano nishca huasitapishmi shayachirca. Chai huasica sunimanca chuscu chunga pichca metro, anchomanca ishqui chunga ishqui metro ishqui chunga pichca centimetromi carca. Altomanca chunga quimsa metro pichca chunga centimetromi carca. Chai huasita rurangapajca chuscu filatami cedro caspi pilarcunata shayachirca. Chai jahuapica cedro caspicunallatatajmi quinriman sirichishpa churarca.

³Chaipica quimsa fila pilarcunami carca. Cada filami chunga pichca, chunga pichca pilarcunata charirca. Tucuimantaca chuscu chunga pichca pilarcunami carca. Chai pilarcuna jahuapimi, caishuj pilarmanta caishuj pilarcama racu caspicunata quinriman quinriman sirichishpa chai jahuataca cedro tablacunata churarca.

⁴Chai huasica quimsa fila ventanacunayujmi carca. Chai ventanacunaca quimsa filataj ch'imbapura, ch'imbapura rurashcami carca.

⁵Chai pungucunata charij caspicunapish chuscundij ladotaj chai shinallataj racumi carca. Ventanacunapish, quimsa filataj ch'imbapura, ch'imbapurami carca.

⁶Shinallataj pilarcunallahuanmi shujtaj huasita rurarca. Chai huasica sunimanca ishqui chunga ishqui metro pichca chunga centimetromi carca. Anchomanca, chunga quimsa metro pichca chunga centimetromi carca. Chai huasica punta shayachishca huasi ñaupajpimi shujtaj pilarcunahuan shujtaj caspicunahuan ch'icanta shayachishca carca.

⁷Pi imata allichichun huillanaman shamujpi allichishpa tiyanapajpish shujtaj ucutami shayachirca. Chai huasitaca ucu pambamanta jahua c'atacamami tucuita cedro tablacunahuan churashca carca.

⁸Salomonca pai causangapajpish chai huasi ucunij pambapimi, chai huasita shinallataj shujtaj huasita pilarcunallahuantaj shayachirca. Shinallataj faraonpaj ushushi paipaj huarmipajpish chai huasi shinallatataj shujtaj huasitami rurarca.

⁹Tucui chai huasicunaca, callaripi churashca rumicunamantapacha, jahua tucuchinapi churashca rumicunacamami ucu ladopish, canlla ladopish achca valij rumicunahuan pircashca carca. Chai rumicunataca medishpa, sierracunahuan p'itishpa maipi churana cashcapi alli churashcami carca. Canllamanta callarishpaca, jatun patiocamami chashna rumicunahuan rurashca carca.

¹⁰Callaripi churashca rumicunaca achca valij, jatun rumicunami carca. Chai rumicunaca sunimanca, maijanca chuscu metro, pichca chunga centímetro, maijanca quimsa metro sujta chunga centimetromi carca.

¹¹Chaimanta ashtahuan jahuacamapish achca valij rumicunata medishpa maillapi churana cashcapi churashcami carca. Chai jahuapica cedro caspicunahuan churashcami carca.

¹²Chai jatun patio muyundijtaca Mandaj Diospaj huasi patio ucu lado pircata shinallataj labrashca rumicunahuan quimsa filata pircashcami carca. Shuj filataca cedro caspicunata churashcami carca. Chai huasi canllapi tiyaj huasipaj patiopish chai shinallatajmi carca.

¹³Jatun mandaj Salomonca, Tiro pueblopi causaj Hiram runatami pushanaman cacharca.

¹⁴Hiramca, Neftalí aillupuramanta caj viudapaj churimi carca. Paipaj yayaca bronceta rurajmi carca. Paica Tiromantami carca. Chaimi Hirampish bronceta rurangapaj yachaisapa, alli yuyaiyuj yachaj carca. Jatun mandaj Salomonpajman Hiram shamushpaca, pai imalla rurachun nishcatami rurarca.

¹⁵Paica ishqui jatun bronce pilarcunatami rurarca. Chai pilarcunaca sunimanca pusaj metro chunga centimetromi carca. Racumanca pichca metro, chuscu chunga centimetromi carca.

¹⁶Chai pilarcuna umapi churangapajpish bronce ishqui capitelcunatami rurarca. Chaicunaca altomanca, ishqui metro ishqui chunga pichca centimetromi carca.

¹⁷Pilar umapi churashca capitelcunata pilluchingapajpish linchitajllata ch'imbashcami carca. Chai linchitajlla filota huarcuchishcapish cadenacunatajllami carca. Chaicunaca cada capitelcunapajmi canchis carca.

¹⁸Pilarcuna uma jahuapi churashca capitelcunata pilluchingapajca, granadacunatami linchi muyundijpi ishqui filata rurarca. Caishuj capitelpajpish chashnallatajmi rurarca.

¹⁹Diospaj huasi canllapi rurashca huasi pilar puntapi churashca capitelcunaca shuj metro, pusaj chunga centimetromi carca. Chaicunaca lirio sisatajllami carca.

²⁰Chai ishqui pilar umapi churashca capitelcunaca 200 granadacunata linchi jahuapi ishqui filata muyuchishpa churashcami carca. Caishuj capitelpish chashnallatajmi carca.

²¹Chai pilarcunataca, Diospaj huasi canllapimi shayachirca. Alli ladoman shayachishca pilartaca, Jaquín shutitami shutichirca. Lluqui ladoman shayachishca pilartaca Boaz shutitami shutichirca.

²²Chai pilarcuna uma jahuapica, lirio sisatajllata labrashpami churarca. Chashnami chai pilarcunata ruranataca tucuchirca.

²³Chai q'uipaca yacuta churangapajmi, broncemanta shuj pailata rurarca. Chai pailaca anchomanca, chuscu metro chaupimi carca, muyujta medijpica chunga quimsa metro chaupimi carca. Altomanca ishqui metro, ishqui chunga pichca centimetromi carca.

²⁴Chai paila filo uranij tucui muyundijtami calabazatajllata ishqui filata rurashca tiyarca. Chai calabazatajllacunaca, cada metropimi ishqui chunga ishqui bolacuna tiyarca. Chaicunaca bronceta chai pailallahuantaj shujllata rurashcami carca.

²⁵Chai jatun pailaca, broncellamantataj rurashca chunga ishqui c'ari huagracunapaj jahuapimi tiyacurca. Chai huagracunaca quimsaca, huichiman ñahui, quimsaca uriman ñahui, quimsaca inti llujshin ladoman ñahui, quimsaca inti huashicun ladoman ñahuimi shayacurcacuna. Chai huagracunaca chai jatun paila paicunapaj jahuapi tiyacujpimi, umacunalla canllaman ricuricurca.

²⁶Chai pailaca, canchis centímetro chaupihuan racumi carca. Chai pailapaj shimica, lirio sisatajllata rurashcami carca. 2.000 bato yacutami apaj carca.

²⁷Shinallataj chunga bronce carretacunatami rurarca. Chaicunaca anchomanpish, largomanpish shuj metro, pusaj chunga pichca centimetromi carca. Altomanca shuj metro, quimsa chunga pichca centimetromi carca.

²⁸Chai carretacunaca cashnami carca: Chuscundij lado bronce marcocunata rurashpa chai jahuapica tablajlla broncecunata churashcami carca.

²⁹Carretacunapaj marcocunapi churashca tablajlla broncecunapica leoncunatajllata, huagracunatajllata, querubincunatajllatami rurashca carca. Chai marcocunapi leoncunatajllata, huagracunatajllata rurashca jahua ladomanpish ucu ladomanpish sisacunatajllata rurashcami tiyarca.

³⁰Chai carretacunaca chuscu esquinapimi bronceta rurashca chuscu ruedacunata charirca. Chai ruedacunapaj ejecunapish broncellatataj rurashcami carca. Chai chuscu isquinapica, broncellatataj rurashpa huichiman pasajta rurashcami carca. Chaicunataca tanqueta tiyachijpi ama huashicuchunmi chashna rurarca.

³¹Chai tanquepaj shimica, chuscu chunga pichca centimetrohuan huichiman llujshirishca redondo shimimi carca. Chaimantami tanque shimi anchoca sujta chunga canchis centímetro chaupita charirca. Chai tanque shimitaca cuadrado marcocunahuan churashcami carca. Chai marcocunaca mana redondochu carca, cuadradomi carca. Chai marcocunapica sumaj ricunacunata rurashcami carca.

³²Carretapaj ruedacunaca carretapaj chuscu esquina ucu ladopimi carca. Chai ruedacunapaj ejecunaca moldepi rurashca cashcamanta carreta ucu ladollapitaj rurashcami carca. Ruedacunaca altomanca, sujta chunga canchis centímetro chaupitami charirca.

³³Carretapaj ruedacunaca, macanacuna carrocunapaj ruedacuna shinami carca. Ruedacunapish, ruedacunapi churashca rayos nishcacunapish, ruedacuna chaupipi caj cubo nishcacunapish, ejecunapish moldellapitaj bronceta rurashcami carca.

³⁴Tanqueta charichun chuscu esquinapi huichiman churashcacunaca, carretallapitaj shujllata rurashcami carca.

³⁵Chai tanque shimita quichquiyachinapaj marcocunaca chai tanquellamantataj moldepi rurashcami carca. Chai redondo shimi altoca, ishqui chunga ishqui centimetromi carca.

³⁶Chai tanque muyundij tablacuna shinapica, querubincunatajllata, leoncunatajllata, palmera yuracunatajllatami labrarca. Maillapi chashna ruranallapica tucuipimi chashna rurarca. Chai muyundijpipish, shujtaj ricunacunatami rurarca.

³⁷Chai chunga carretacunatami chai shinallatataj, chai medidallatataj chashnallataj labradota rurarca.

³⁸Broncellatatajmi chunga tanquecunatapish rurarca. Chai tanquecunaca cada tanquemi chuscu chunga bato yacuta apaj carca. Chaicunaca altomanca, shuj metro pusaj chunga centimetrotami charirca. Chai tanquecunataca chunga carretacunapimi shuj shuj churarca.

³⁹Chashna churashpaca chai tanquecunataca, Diospaj huasi c'uchupimi pichcataca alli ladoman, pichcataca lluqui ladoman churarca. Jatun pailataca, inti llujshin ura ladomanmi churarca.

⁴⁰Chai Hiram runaca pailacunatapish, tenazacunatapish, tazacunatapish broncellatatajmi rurarca. Mandaj Diospaj huasipaj chai charinacunataca tucuitami Salomón mandashca shinallataj tucuita rurashpa tucuchirca.

⁴¹Ishqui pilarcunapish, chai pilar jahuapi churashca capitelcunapish, chaicunapi pilluchishpa churashca ishqui linchicunapish, pilarcunapaj umacunapi churana ishqui capitelcunapish,

⁴²pilarcuna uma jahuapi tiyaj capitelcuna umapi pilluchingapaj ishqui linchicunapi churashca 400 granadacunapish, cada linchipi ishqui filata huarcuchishca granadacunapish,

⁴³chunga cajoncunapish, chai cajoncunapi churashca chunga tanquecunapish,

⁴⁴jatun pailapish, chai pailata aparij chunga ishqui huagracunapish,

⁴⁵mangacunapish, palacunapish, tazacunapish jatun mandaj Salomonpaj Hiram rurashcami carca. Mandaj Diospaj huasipaj imalla charinacunapaj rurashcami carca. Tucui chaicunaca bronceta llambujllata rurashcami carca.

⁴⁶Tucui chaicunataca jatun mandajca Jordán yacu pambapi tiyaj Sucot pueblohuan Saretán pueblohuan chaupipi caj arcilla allpatami rurachirca.

⁴⁷Bronceta rurashca chai tucui charinacuna yallitaj achca cajpimi, Salomonca chaicuna mashnata pizashcataca mana yachasha nirca.

⁴⁸Salomonca, Mandaj Diospaj huasipi imalla cana cashcacunataca caicunatami rurachirca: Shuj curi altartapish, Diospajlla ch'icanchishca tandata churana shuj curi mezatapish,

⁴⁹Diospajlla ch'icanchishca ch'imbapurapi churangapajpish alli curimantami pichca candelerocunata rurachirca. Chaicunataca pichcataca alli ladoman, caishuj pichcataca lluqui ladomanmi churarca. Chai curi candelerocunapica sisatajllacunata, lamparacunatajllata, tenazacunatajllata curimanta rurashcami carca.

⁵⁰P'unducunatapish, rupashca mechacunata anchuchinacunatapish, tazacunatapish, uchilla cucharacunatapish, inciensota rupachinacunatapishmi alli curillamantataj rurachirca. Diospaj huasi ucupi caj Diospajlla ch'icanchishca ucuman yaicuna pungu quisyucunapish, Diospaj huasi ucuman yaicuna pungu quisyucunapish alli curihuan churashcami carca.

⁵¹Mandaj Diospaj huasipi imalla tiyanacunataca jatun mandaj Salomón ima shina yuyarishca shinallatajmi, tucuita rurashpa tucuchirca. Salomonca, paipaj yaya David Mandaj Diosman cushca cullquitapish, curitapish, ima shujtajcunatapish Mandaj Diospaj huasiman apashpami, chaipi caj huaquichinapi huaquichirca.