Read Chimborazo Highland Quichua 2 REYES 11 Bible Online

2 REYES 11 - Chimborazo Highland Quichua bible

2 REYES 11

¹Ocoziaspaj mama Ataliaca paipaj churi huañushcata yachashpa jatarishpaca, jatun mandajpaj tucui huahua huahuacunatami chingachirca.

²Chaimi jatun mandaj Jorampaj ushushi Ocoziaspaj pani Josabaca jatun mandajpaj caishuj churicunata Atalía huañuchicujpi Ocoziaspaj churi Joastaca pacalla llujshichirca. Huahuata huiñachicuj huarmindij dormina ucupi pacajpimi paicunataca mana huañuchirca.

³Chai huahuaca paita huiñachij huarmindijmi Mandaj Diospaj huasipi sujta huatata pacashca carca. Chai punllacunapica Atalía huarmimi chai llajtataca mandacurca.

⁴Ña canchis huata tucujpimi, Joiada curaca patsaj soldadocunata mandajcunata, soldadocunata mandajcunata, cuidaj soldadocunatapish cayachishpa Mandaj Diospaj huasipi paicunahuan tandanacurca. Mandaj Diospaj huasi ucupi paicunata shuj yuyailla tucunata ari nichishpami, jatun mandaj Ocoziaspaj churitaca paicunaman ricuchirca.

⁵Chaipimi paicunataca: “Samana punllapica cancunaca cashnami rurana canguichij. Cancunapuramanta quimsapi ch'icanchishca shuj mirgaca, mandana huasipimi cuidana canguichij.

⁶Caishuj mirgaca, Shur pungupimi cuidana canguichij. Chaishuj mirgaca, cuidaj soldadocunapaj huasi huashanijman caj pungupimi cuidana canguichij. Mandana huasita pi ama imata rurachunmi chashna cuidana canguichij.

⁷Samana punllapi jatun mandajpaj huasita mana cuidacuj caishuj ishqui mirgaca, Mandaj Diospaj huasita jatun mandajndijmi cuidana canguichij.

⁸Chaipica tucuicuna macanacunacunata maquipi aisashca jatun mandajpaj muyujta shayaringuichij. Maijanpish cancunapaj chaupiman yaicusha nijpica, huañuchinguichijlla. Jatun mandaj maiman llujshijpipish, tigrashpa yaicujpipish paihuan puringuichij” nircami.

⁹Chashna mandajpica patsaj soldadocunata mandajcunaca, Joiada cura mandashca shinallatajmi rurarcacuna. Soldadocunata mandajcunaca, cada shujmi samana punllapi maijanlla cuidana cashcatapish, chai punllapica maijanlla llujshina cashcatapish pushashca Joiada curapajman rircacuna.

¹⁰Chaipimi Joiada curaca, Mandaj Diospaj huasipi huaquichishca tiyacuj jatun mandaj Davidpaj lanzacunatapish, escudocunatapish patsaj soldadocunata mandajman curca.

¹¹Cuidaj soldadocunaca macanacunacunata paicunapaj maquipi aisashcami, Diospaj huasi ucupica, alli lado patamantaca, lluqui lado patacama altar c'uchupi shayarishpa jatun mandajtaca muyunchishpa cuidacurcacuna.

¹²Chaipimi Joiada curaca, jatun mandaj Ocoziaspaj churita llujshichishpa coronata churachishpa, jatun mandaj ima shina canata, ima shina mandana cashca quillcata cushpa, paipaj umapi aceiteta churashpa, jatun mandaj cachun churarca. Chai q'uipaca tucuicunami maquicunata huaracashpa: “¡Viva jatun mandaj!” nircacuna.

¹³Tucui chaipi cajcuna bullacujta uyashpami, Atalía huarmi callpashpa rishpaca Mandaj Diospaj huasiman yaicushpa tucuicuna maipi canman chayarca.

¹⁴Chaipica jatun mandajta churacujpi jatun mandaj shayana pilar c'uchupi jatun mandaj shayacujta, shujtaj mandajcunapish paipaj c'uchupi shayacujta, trompetapi tocajcunapish paipaj c'uchupi tocacujta, tucui chaipi cajcunapish cushicushpa trompetacunapi tocacujtami ricurca. Chaimi Atalía huarmica paipaj churanata lliquirishpa: — ¡Huashallamari ñucata surcushcacuna! — nishpa caparirirca.

¹⁵Ashtahuanpish Joiada curaca, patsaj soldadocunata mandajcunataca: — Mandaj Diospaj huasimanta chai huarmita canllaman llujshichichij. Maijanpish paita mitsajtaca espadahuan huañuchichij. Mandaj Diospaj huasipica, ama huañuchichijchu — nircami.

¹⁶Chaimi Atalía huarmita japishpa jatun mandajpaj caballocunahuan chayana punguman chayachishpa chaipi huañuchircacuna.

¹⁷Chai q'uipami Joiadaca, jatun mandajtapish, tucui gentecunatapish Mandaj Dios nishcata pajtachishpa causanata ari nichirca. Paicunaca Dios agllashca pueblo nishca cachunmi chashna ari nichirca. Jatun mandajpish ima shinalla mandanata, gentecunapish ima shina jatun mandajta cazunatami ari nichirca.

¹⁸Chai llajtapi tucui causajcuna Baalpaj huasiman yaicushpaca, tucuitami urmachircacuna. Altarcunatapish, chaipi tiyaj dios nishcacunatapish tucuitami ñuturcacuna. Baalpaj Matán nishca curatapish chai altar ñaupajpimi huañuchircacuna. Joiada curaca Mandaj Diospaj huasipi cuidachun mirga soldadocunata chaipi saquishpaca,

¹⁹patsaj soldadocunata mandajcunata, pichca chunga soldadocunata mandajcunata, cuidaj soldadocunata, tucui chai llajtapi cajcunatapishmi pusharca. Paicunami Mandaj Diospaj huasimanta jatun mandajtaca jatun mandajpaj huasita cuidajcuna yaicuna ñanta pushashpa jatun mandaj mandashpa tiyana huasiman chayachirca. Chaipimi jatun mandajca jatun mandajcuna mandashpa tiyanapi tiyarirca.

²⁰Chaipica tucui chai llajtapi causajcunami jatunta cushicurcacuna. Atalía huarmitaca jatun mandajpaj huasi c'uchupimi huañuchircacuna. Pai huañujpica, tucui chaipi causajcunami sumaj causaita charircacuna.

²¹Joasca canchis huatayuj cashpami mandai callarirca.