Read Chimborazo Highland Quichua 2 REYES 13 Bible Online

2 REYES 13 - Chimborazo Highland Quichua bible

2 REYES 13

¹Ocoziaspaj churi Joas Judá llajtata ishqui chunga quimsa huatata ña mandacujpimi, Jehupaj churi Joacazca, Israel llajtata mandai callarirca. Paica chunga canchis huatatami Samariapi mandarca.

²Paica, Mandaj Diospaj ñaupajpica, millaitami rurarca. Nabatpaj churi Jeroboam juchallishpa israelcunata juchallichishca shina juchallinataca Joacazca mana saquircachu.

³Chashna rurajpimi Mandaj Diosca nina sindirij shina p'iñarishpa israelcunataca Siria llajtata jatun mandaj Hazaelpaj, paipaj churi Ben-adadpaj maquipi achca huatacunata llaquichichun churarca.

⁴Chaimi Joacazca Mandaj Diosta mañarca. Siria llajtata jatun mandaj, israelcunata llaquichicujpi israelcuna llaquihuan cajta ricushpami Mandaj Diosca Joacaz mañashcata uyarca.

⁵(Chaimi Mandaj Diosca Siria llajta runacuna llaquichicunmanta paicunata llujshichichunca shuj runata cacharca. Chai llaquimanta pai llujshichijpimi, israelcunaca paicunapaj quiquin huasicunapi ñaupa shinallataj sumajta causarcacuna.

⁶Chashna cashpapish israelcunata millaita rurachij Jeroboampaj familiacuna juchallishpa israelcunata juchallichishca shina juchallinataca mana saquishpami paicuna rurashca shinallataj rurarcacuna. Asera huarmi diosman rijchajta rurashcatapish Samariamantaca mana anchuchircacunachu).

⁷Siria llajtata jatun mandajmi Israel soldadocunataca, allpata shina rurashpa tucuchirca. Chaimantami Joacazpajca caballocunapi tiyarij pichca chunga soldadocuna, chunga carrocuna, chaquillahuan purij, 10.000 soldadocunalla saquirirca.

⁸Joacaz ashtahuan imalla rurashcata, tucui pai imalla rurashcata, pai c'ari c'ari cashcata ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

⁹Joacaz paipaj ñaupa yayacunahuan dormijpica, Samariapimi pambarcacuna. Paipaj randica paipaj churi Joasmi mandarca.

¹⁰Jatun mandaj Joás quimsa chunga canchis huatata Judá llajtata ña mandacujpimi, Joacazpaj churi Joasca israelcunataca Samariapi mandai callarirca. Paica chunga sujta huatatami mandarca.

¹¹Joaspish, Mandaj Diospaj ñaupajpica millaitami rurarca. Nabatpaj churi Jeroboam juchallishpa israelcunata juchallichishca shina juchallinata mana saquishpami paicuna rurashca shinallataj rurashpa catirca.

¹²Joás ashtahuan imalla rurashcata, tucui pai imalla rurashcata, Judá llajtata jatun mandaj Amasiashuan c'ari c'ari macanacushcata, ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.

¹³Joás paipaj ñaupa yayacunahuan dormijpica, Israel llajtata jatun mandajcunata churashcallapitajmi Samariapi churarcacuna. Paipaj randica Jeroboammi mandarca.

¹⁴Eliseo ungushca ña huañunalla cajpimi, israelcunata jatun mandaj Joás paipajman uriyashpa paipaj ñaupajpica: — ¡Ñuca yayalla, ñuca yayalla, canca israelcunapajca macanacuna carrocunata charishca shina, caballocunapi tiyarij soldadocunata charishca shinami carcangui! — nishpa huacarca.

¹⁵Chaipimi Eliseoca: — Shuj arcota, puntajlla caspicunata japi — nijpi, paica shuj arcota, puntajlla caspicunata japirca.

¹⁶Chaimi Eliseoca, israelcunata jatun mandajtaca: — Cambaj maquita arco jahuapi churai — nijpi paica arco jahuapi paipaj maquita churajpi Eliseopish jatun mandajpaj maqui jahuapi paipaj maquita churashpaca:

¹⁷— Inti llujshin lado ventanata pascai — nijpi, jatun mandaj chai ventanata ña pascajpica, Eliseoca: — Cunanca puntajlla caspita shitai — nijpi jatun mandaj puntajlla caspita shitajpimi, Eliseoca: — Mandaj Diosca, cai puntajlla caspihuanmi, Siria llajta soldadocunataca mishachinga. Cai puntajlla caspihuanmi cancunataca, paicuna llaquichicunmanta llujshichinga. Canmari paicunataca, Afec pueblopi mishashpa tucuicunata huañuchingui — nircami.

¹⁸Chashna nishpaca Eliseoca cutinllatajmi: — Chai puntajlla caspicunata japi — nijpi jatun mandaj japijpica Eliseoca: — Cunanca pambata huajtai — nijpimi jatun mandajca quimsa cutin huajtashpa shayarirca.

¹⁹Chaimi Diospaj runa paihuan p'iñarishpaca: — Pichca cutinllapish, mana cashpaca sujta cutinllapish huajtashca cashpami, Siria llajta soldadocunataca shujllatapish mana saquishpa tucuita chingachinguiman carca. Ashtahuanpish cunanca siriocunataca quimsa cutinllami mishangui — nircami.

²⁰Eliseo huañujpi pambashca q'uipami, moabitacunaca macanacunacunahuan allichirishpa israelcunapajta shuhuangapaj shamurcacuna. Chaica huata callaripimi carca.

²¹Chaipica shuj runacunami huañushca runata pambanaman ricushpaca, moabita shuhuacuna macanacunacunahuan allichirishcacuna shamucujta ñapish ricushpa, huañushca runataca Eliseota churashca jutcupi shitashcahuan callparcacuna. Huañushca runapaj aicha Eliseopaj tullucunapi tupashpaca, causarishpa jatarishpami shayarirca.

²²Siria llajtata jatun mandaj Hazaelca israelcunata Joacaz mandacui huatacunapica, tucui pai mandacui huatacunapimi israelcunataca llaquichirca.

²³Chaimi Mandaj Diosca paicunata llaquishpa c'uyashpa paicunaca llaquitamari apacuncuna nishpaca, Abrahamhuan, Isaachuan, Jacobhuan ari ninacushcata yuyarishpa, manataj tucuita chingachishachu nirca. Chashna nishpaca cunan punllacamami paipaj ñaupajmantaca mana tucui anchuchin.

²⁴Siria llajtata jatun mandaj Hazael huañujpica, paipaj randica paipaj churi Ben-adadmi mandarca.

²⁵Ben-adadpaj yaya Hazaelmi, Joaspaj yaya Joacazhuan macanacushpa, Israel llajta pueblocunata quichushca carca. Joasmi Ben-adadhuan quimsa cutin macanacushpa mishashpa, chai pueblocunataca israelcunapajllataj cachun cutin tigra quichurca.