Read Chimborazo Highland Quichua 2 REYES 17 Bible Online

2 REYES 17 - Chimborazo Highland Quichua bible

2 REYES 17

¹Judá llajtata jatun mandaj Acaz chunga ishqui huatata ña mandacujpimi, Elapaj churi Oseasca, Israel llajtata mandai callarirca. Paica iscun huatatami Samariapi mandarca.

²Oseasca Israel llajtata paipaj ñaupa jatun mandajcuna millaita rurashca shina millaita mana rurashpapish Mandaj Diospaj ñaupajpica millaitami rurarca.

³Oseashuan macanacungapajmi Asiria llajtata jatun mandaj Salmanasarca huichiyamurca. Oseasca paipajta ruraj tucushpami, tributota pagashpa causarca.

⁴Ashtahuanpish Asiria llajtata jatun mandajca shujtajcunahuan huashalla yuyarinacushpa Oseas parlanacucujtami yacharca. Oseasca Egiptota So shuti jatun mandajpajmanmi paipaj randi parlanacujcunata cachashca carca. Shinallataj Asiria llajtata jatun mandajman ñaupa huatacunaman tributota cucushca shinapish ña mana curcachu. Chaimi jatun mandaj Salmanasarca Oseasta prezu japishpa carcelpi churarca.

⁵Asiria llajtata jatun mandajca tucui Israel llajtata yaicushpami, Samaria muyundijta shayarishpa chaipica quimsa huatata tiyarcacuna.

⁶Iscun huatata Oseas mandacujpimi, Asiria llajtata jatun mandajca Samaria pueblota japishpa chaipi causaj israelcunata prezu aparca. Paicunataca Halah pueblopi, Gozán jatun yacu c'uchupi caj Habor llajtapi, medocunapaj pueblocunapimi churarca.

⁷Israelcunaca Egiptota jatun mandaj faraonpaj maquipi cajpi llujshichimuj Mandaj paicunapaj Diosta p'iñachishpa shujtaj dioscunata manchashcamantami chashna tucurca.

⁸Paicunaca Mandaj Dios paicunapaj ñaupajmanta anchuchishca llajtacunapaj mandashcacunatapish, Israel llajtata jatun mandajcuna paicunapaj yuyaimanta rurashca mandashcacunatapishmi rurarcacuna.

⁹Israelcunaca imapish mana allicunata pacalla rurashpami Mandaj paicunapaj Diosta p'iñachirca. Tucui paicunapaj pueblocunapi tiyaj lomacuna jahuapipish altarcunatami rurarcacuna. Chapana torrecunamanta callarishpaca, jatun pircayuj pueblocunacamami chai altarcunata rurarcacuna.

¹⁰Shinallataj rumimanta imamanpish rijchajta rurashcacunatapish, Asera huarmi diostajlla rumi diostapish rurashpami tucui lomacunapi, tucui p'angasapa yura ucucunapi churarcacuna.

¹¹Lomacunapi tiyaj altarcunapica tucui chaicunapimi inciensota rupachircacuna. Mandaj Dios paicunapaj ñaupajmanta anchuchishca llajtacuna shinallataj rurashpami, ima ruranacunatapish yallitaj millaita rurashpa Mandaj Diostaca p'iñachircacuna.

¹²Israelcunaca rurashcalla dioscunapajtami rurarcacuna. Mandaj Diosca paicunataca cancunaca chaicunataca amataj ruranguichij nishcami carca.

¹³Mandaj Diosca israelcunatapish, Judá llajtapi causajcunatapish, profetacunahuanpish, paillataj ricuchishpa huillajta huillachishcahuanpish sinchita rimashpaca: “Cancunapaj millai ñancunata saquishpa ñucapajman cutirichij. Cancunapaj ñaupa yayacunaman ñuca mandashcacunata, pajtachinguitaj nishcacunata ñucapajta ruraj profetacunaman huillachishcacunata ima shina mandashca shinataj tucuita pajtachichij” nircami.

¹⁴Paicunapaj ñaupa yayacunaca rumi shungu tucushpami Mandaj paicunapaj Diostaca mana crircacuna. Chai shinallatajmi paicunapish rumi shungu tucushpa mana cazurcacuna.

¹⁵Mandaj Dios chaitataj pajtachichun nishcacunatapish, paicunapaj ñaupa yayacunahuan Mandaj Dios ari ninacushcacunatapish, Dios ima shina cashca shina causashpa ricuchinata mandashcatapish saquishpami, imapish mana canacunata rurashpa yanga tucurcacuna. Paicunapaj muyundij llajtacuna rurashcatami catircacuna. Mandaj Diosca paicuna shinaca amataj ruranguichijchu nishcami carca.

¹⁶Ashtahuanpish paicunaca Mandaj paicunapaj Dios tucui mandashcacunata saquishpami, bronce ishqui bizi diosta, Asera huarmi diosman rijchajtapish rurarcacuna. Jahua pachapi tucui imalla tiyajcunatapish adorashpa, Baalpajtapish rurashpami,

¹⁷paicunapaj churicunatapish, ushushicunatapish chai dioscunaman cushpa rupachircacuna. Adivinocunapish, brujocunapish tucushpami, Mandaj Diospaj ñaupajpi millaita ruranapaj curishpa paita p'iñachircacuna.

¹⁸Chaimi Mandaj Diosca israelcunahuan yallitaj p'iñarishpa, paipaj ñaupajmanta tucuita anchuchirca. Judá aillullami saquirirca.

¹⁹Ashtahuanpish Judá aillupish, Mandaj paicunapaj Dios mandashcacunataca mana huaquichircacunachu. Israelcuna paicunapaj yuyaimanta rurashca mandashcacunatami paicunapish rurarcacuna.

²⁰Chaimantami Mandaj Diosca, Israelpaj huahua huahuacunataca tucuita cungarishpa saquirca. Paipaj ñaupajmanta tucui anchungacamami llaquichishpa shuhuacunapaj maquipi churarca.

²¹Israelcunata Davidpaj aillupuramanta ch'icanchijpica, paicunaca Nabatpaj churi Jeroboamtami jatun mandaj cachun churarcacuna. Chai Jeroboammi Mandaj Diospaj ñanmanta israelcunata anchuchishpa yallitaj juchata rurachirca.

²²Israelcunaca Jeroboam ima shinalla juchallishca juchacunallatatajmi rurashpa catirca. Chashna juchallinataca,

²³Mandaj Dios israelcunata paipaj ñaupajmanta tucui anchuchingacamami manataj saquishpa juchallicurcallacuna. Mandaj Diosca paipajta ruraj profetacunaman huillachishca shinallatajmi, israelcunataca Asiria llajtaman prezu apachun saquirca. Paicunaca cunan punllacamami chaipi causacuncuna.

²⁴Asiria llajtata jatun mandajca Babilonia, Cuta, Ava, Hamat, Sefarvaim pueblocunapi causajcunata apashpami, Samariapi caj pueblocunapi israelcunapaj randi causachun churarca. Paicunami Samariataca paicunapajta rurashpa, chaipi caj pueblocunapi causarcacuna.

²⁵Chai runacuna causai callarijpica cashnami tucurca: Paicuna chaipi causai callarishpaca Mandaj Diostaca mana mancharcacunachu. Chaimi Mandaj Diosca paicunata huañuchichun leoncunata cachajpi paicunata huañuchirca.

²⁶Chaimi Asiria llajtata jatun mandajtaca: “Caimanta apashpa Samariapi caj pueblocunapi causachun can churashca gentecunaca chai llajtapaj Diospaj mandashcacunata ima shina pajtachinataca mana yachancunachu. Chaimari chai Diosca paicunata huañuchichun paicunapajman leoncunata cachashca. Chai llajtapaj Diospaj mandashcata mana yachashpa mana pajtachijpimi chashna rurashca” nircacunami.

²⁷Chaimi Asiria llajtata jatun mandajca: “Samaria llajtamanta cai Asiriaman apamushca maijan curata Samariaman rishpa chaipi causashpa chai llajtapaj Diospaj mandashcacunata ima shina pajtachina cashcata yachachichun cachaichij” nishpa mandarca.

²⁸Samaria llajtamanta Asiriaman prezu apashca shuj curami Samaria llajtaman cutin tigrashpa Bet-elpi causashpa chai gentecunata Mandaj Diosta ima shina manchashpa causanata yachachirca.

²⁹Chashna yachachijpipish, cada llajtamanta cajcunami paicuna maipi causacun pueblocunapica quiquinpaj dioscunata rurashpa, Samariacuna chaipi causacushpa lomacunapi rurashca uchilla huasicunapica chai dioscunata churarcacuna.

³⁰Babiloniamanta cajcunaca, Sucot-benot diosman rijchajtami rurarcacuna. Cuta llajtamanta cajcunaca, Nergal diosman rijchajtami rurarcacuna. Hamatmanta cajcunaca, Asima diosman rijchajtami rurarcacuna.

³¹Aveocunaca Nibhaz, Tartac dioscunaman rijchajcunatami rurarcacuna. Sefarvaimmanta cajcunaca, paicunapaj Adramelec, Anamelec dioscunata adorangapajmi paicunapaj huahuacunata chai dioscunaman cushpa rupachircacuna.

³²Mandaj Diosta manchashpapish, ashtahuancarin lomacunapi tiyaj altarcunapi paicuna cushca sacrificiocunata paicunapaj dioscunaman cuchunmi paicunapurallatataj curacuna cachun agllashpa churarcacuna.

³³Chashnami chai shujtaj llajtacunamanta cachashca runacunaca, Mandaj Diosta manchanchij nishpapish, paicunapaj llajtapi cashpa ima shina ruraj cashca shinallataj paicunapaj dioscunallatataj adorashpa causarcacuna.

³⁴Paicunaca cunan punllacunacamallatajmi Mandaj Diosta mana manchashpa, chaitataj pajtachichun nishcatapish, pajtachinguitaj nishcatapish mana pajtachishpa ñaupa shinallataj ruracuncuna. Mandaj Dios Jacobpaj huahua huahuacunata Israel shutita shutichishpa mandashcacunata cushpa ima shina pajtachina cashcata mandashca shinaca mana pajtachincunachu.

³⁵Jacobpaj huahua huahuacunahuan Mandaj Dios ari ninacushpaca cashnami mandarca: “Shujtaj dioscunataca ama manchanguichij, ama adoranguichij, paicunapajtaca ama ruranguichij, chai dioscunamanpish ama sacrificiota cunguichij.

³⁶Ashtahuanpish Egiptomanta jatun poderhuan, paipaj maquihuan cancunata llujshichimuj pai Mandaj Diosllata manchanguichij, paillata adoranguichij, paillaman sacrificiota cunguichij.

³⁷Chaitataj pajtachingui nishcatapish, cancunapaj imalla rurana cashcatapish, mandashcatapish, mandashcacunatapish quillcachishpa cushcataca ama cungarishpa chaitataj pajtachina yuyailla tucushpa chaitataj pajtachingui. Shujtajcunapaj dioscunataca ama manchangui.

³⁸Ñuca cancunahuan ari ninacushcataca ama cungaringuichij, shujtajcunapaj dioscunataca amataj manchanguichij.

³⁹Ashtahuanpish Mandaj cancunapaj Diosllata manchanguichij. Paimi cancunata p'iñajcunapaj maquimantaca cacharichinga” nircami.

⁴⁰Shina nijpish paicunaca chaitaca mana uyarcachu. Paicuna ñaupa maipi causacushcapi ruraj cashca shinatajmi rurarcacuna.

⁴¹Chashnami chai gentecunaca Mandaj Diosta manchanchij nishpapish, paicunapaj rurashcalla dioscunapajta rurarcacuna. Paicunapaj churicunapish, paicunapaj nietocunapish paicunapaj yayacuna ruraj cashca shinallatajmi cunan punllacunacama ruracuncuna.