Read Chimborazo Highland Quichua 2 REYES 20 Bible Online

2 REYES 20 - Chimborazo Highland Quichua bible

2 REYES 20

¹Chai punllacunapimi, Ezequiasca huañuna ungüihuan carca. Amozpaj churi, profeta Isaías paita ricunaman rishpaca: — Mandaj Diosca cashnami nin: Canca ña mana causanguichu, huañugringuimi, cambaj huasi ucu familia ima shina canata allichi ninmi — nircami.

²Shina nijpica Ezequiasca pata ladoman muyurishpami Mandaj Diostaca cashna mañarca:

³“Mandaj Dioslla, cantami rogani. Cambaj ñaupajpica mana nij tucushpalla tucui shunguhuan can munashcata rurashpa, cambaj ñaupajpi purishcata yuyarichunmi rogani” nishpami Ezequiasca yallitaj huacashpa mañarca.

⁴Ezequías chashna mañajpica, Isaías manaraj mandana huasi canlla chaupita rijpimi, Mandaj Diosca Isaiastaca:

⁵“Ñuca agllashcacunata mandaj Ezequiaspajman tigrashpa cashna ni: Cambaj ñaupa yaya Davidpaj Mandaj Diosca cashnami nin: Can mañashcatapish uyanimi. Can huacashcatapish ricunimi. Cantaca alliyachigrinimi, quimsa punllapica Mandaj Diospaj huasiman huichiyanguimi.

⁶Cambaj causaitaca chunga pichca huatahuanmi mirachini. Cantapish, cai pueblotapish Asiria llajtapaj jatun mandajpaj maquimanta quishpichishami. Ñuca quiquinllatataj c'uyashcamanta, ñucapajta ruraj Davidta c'uyashcamantami chashna huaquichigrini ninmi nigri” nircami.

⁷Shina nijpi Isaiasca: Higo ñutushcata japichij — nircami. Chaita japishpa carachapi churajpica alliyarcallami.

⁸Ezequiasca Isaiastaca: — Mandaj Dios ñucata alliyachinatapish, ña quimsa punllapi paipaj huasiman huichiyanatapish ¿imata ricushpataj yachasha? — nishcami carca.

⁹Shina nijpi Isaiasca: — Mandaj Diosca pai nishcataca pajtachingatajmi. Mandaj Diosmanta ricuchishcataca caitami ricungui. Can chaita yachangapajca ¿horasta ricuna gradacunapi chunga gradacunata llandu uriyachun ninguichu? Mana cashpaca, ¿chunga gradacunata llandu huashaman tigrachun ninguichu? — nircami.

¹⁰Shina nijpi Ezequiasca: — Chunga gradacunata llandu ñaupajman rinaca jahuallatajmari. Chunga gradacunata llandu huashaman tigranami sinchi — nircami.

¹¹Shina nijpi profeta Isaías Mandaj Diosta mañajpica, inti llandupi horasta ricungapaj Acaz rurachishca gradacunapica, llandutaca ña chunga gradacunata ñaupajman rishcatami huashaman tigrachirca.

¹²Chai punllacunapimi, Baladanpaj churi Merodac-baladán Babilonia llajtata jatun mandajca, huillashpa purijcunataca quillcacunandij convidanacunandij Ezequiaspajman cacharca. Ezequías ungushca cashcata yachashpami cacharca.

¹³Ezequiasca chai cushcacunata chasquishpaca, paipaj huasipi imalla huaquichishcacunataca, cullquita, curita, mishquijllata ashnacujcunata, ashtahuan alli aceiteta, macanacunacunata huaquichinacunata, paipaj huaquichinacunapi imalla tiyajcunatapish tucuitami paicunamanca ricuchirca. Ezequiasca paipaj huasipipish, pai mandacunpipish imata mana saquishpa tucuitami ricuchirca.

¹⁴Profeta Isaías jatun mandaj Ezequiasta ricunaman shamushpaca: — ¿Chai runacunaca maimantataj shamushcacuna, imatataj nincunari? — nijpi Ezequiasca: — Caru Babilonia llajtamantami shamushcacuna — nircami.

¹⁵Shina nijpi Isaiasca cutinmi: — Cambaj huasipica ¿imatataj ricurcacuna? — nijpi Ezequiasca: — Ñuca huasipi tucui imalla tiyashcatami ricurcacuna. Ñucapaj huaquichinacunapi tiyajcunaca paicuna mana ricushcaca ima mana saquirinchu — nircami.

¹⁶Shina nijpimi Isaiasca Ezequiastaca: — Mandaj Dios imata nishca cai shimicunata uyai:

¹⁷Cambaj huasipi tucui imalla tiyajcunata, cambaj ñaupa yayacuna cunancama tucui imallata huaquichishcacunata Babilonia llajtaman apana punllacunami chayamucun. Imata mana saquishpami apangacuna ninmi Mandaj Diosca.

¹⁸Canmanta llujshishca maijan cambaj churicunataca Babilonia llajtaman apajpi, paicunaca chai llajtata jatun mandajpaj huasipimi eunucocuna canga ninmi — nircami.

¹⁹Shina nijpi Ezequiasca Isaiastaca: — Mandaj Dios canta ñucaman huillachishca shimicunaca allimi — nircami. Chashna nishpaca: — Ñuca causai punllacunallapish sumaj causai, ima manchai illaj canami tiyanga — nircami.

²⁰Ezequías ashtahuan imalla rurashcata, pai c'ari c'ari cashcata, yacupaj jatun tanqueta rurashcata, allpa ucuta jatun jutcuta rurashpa yacuta puebloman apashcata, ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

²¹Ezequías paipaj ñaupa yayacunahuan dormijpica, paipaj randica paipaj churi Manasesmi mandarca.