Read Chimborazo Highland Quichua 2 REYES 21 Bible Online

2 REYES 21 - Chimborazo Highland Quichua bible

2 REYES 21

¹Manasesca, Judá llajtata mandai callarinapajca chunga ishqui huatayujmi carca. Paica pichca chunga pichca huatatami, Jerusalenpi mandarca. Paipaj mamaca, Hepsiba shutimi carca.

²Manasesca Mandaj Diospaj ñaupajpica, yallitaj millaitami rurarca. Mandaj Dios israelcunapaj ñaupajmanta llujshichishpa cachashca runacuna rurashca millanana ruranacunatami rurarca.

³Lomacunapi tiyaj altarcunata paipaj yaya Ezequías urmachishcatami cutin shayachirca. Israel llajtata jatun mandaj Acab rurashca shinallatajmi, Baalpaj altarcunata rurachirca. Asera huarmi diosman rijchajtapishmi rurachirca. Jahua pachapi tucui imalla tiyajcunatapish adorarcami. Chaicunatami llaquihuai nishpa adorashpa mañarca.

⁴Mandaj Diosca: “Jerusalenpi caj ñuca huasipimi ñuca shutitaca churani” nircami. Chai huasipipish altarcunata rurachircami.

⁵Mandaj Diospaj huasi canllapipish, ishquindij ladopimi jahua pachapi tucui imalla tiyajcunapaj altarcunata rurachirca.

⁶Manasesca paipaj churitapish rurashcalla diosman cushpami rupachirca. Imalla punllacunapi imalla tucunata yachaj canata, brujo canata, muspachij yumbu canata, adivinaj canata yachanatapishmi churarca. Chashna pai rurashcacunahuan yallitaj millaita mirachishpami Mandaj Diostaca p'iñachirca.

⁷Mandaj Diosca Davidmanpish paipaj churi Salomonmanpish: Tucui israelcunapaj aillupuramanta agllashpa Jerusalenpi churashca ñuca huasipimi ñuca shutitaca huiñaipaj churani nircami. Chai huasipimi Manasesca, pai rurashca Asera huarmi diosman rijchajta churarca.

⁸Diosca israelcunataca cancunapaj ñaupa yayacunaman cushca llajtamanta llujshishpa caita chaita llaquinayajta purichunca mana saquishachu. Ashtahuanca ñucapajta ruraj Moisesman ñuca cushca mandashcacunata cancunata mandashcataca tucuita chaitataj pajtachinguichijlla.

⁹Chashna nishcataca israelcunaca mana uyarcacunachu. Ashtahuanpish Manasescarin Mandaj Dios israelcunapaj ñaupajmanta chingachishca llajtacuna rurashcatapish yalli millaitami rurachishpa catirca.

¹⁰Chaimi Mandaj Diosca, paipajta ruraj profetacunaman huillachishpaca:

¹¹“Judá llajtata jatun mandaj Manasesca, ñaupa cai llajtapi causaj amorreocuna rurashcata yalli millanayajcunata rurashpami, paipaj rurashcalla dioscunahuan judacunata juchallichirca.

¹²Chaimi Mandaj israelcunapaj Diosca: Jerusalencunapaj, judacunapajpish ñucami jatun llaquicunata apamuni. Cai llaquicunata uyajcunaca, ishquindij lado rinrincunatami nanachingacuna.

¹³Samariata ricushca coldel-llahuantajmi Jerusalentapish ricusha. Acabpaj familiacunata ricushca plomadallahuantajmi Jerusalentapish ricusha. Jerusalentaca platota maillanahuan sobashpa maillashpa urisingaman churaj shinami p'ichasha.

¹⁴Ñuca agllashcacunataca puchurijpipish paicunata p'iñajcunapaj maquipi churashpami, paicuna mirga mirgata rurashpa shitachun saquisha.

¹⁵Egipto llajtamanta paicunapaj ñaupa yayacunata llujshichimushca punllamantapacha cunanca mana cazushpa ñuca ñaupajpi millaita rurashpa ñucata yallitaj p'iñachishcamantami llaquichigrini”.

¹⁶Chai jahuami Manasesca ima mana allita manapish ruraj runacunata huañuchishpa, Jerusalenpica yallitaj yahuarta jundachirca. Chai jahuapishmi judacunataca Mandaj Diospaj ñaupajpi millai ricurichun pai juchallishca shinallataj juchallichirca.

¹⁷Manasés ashtahuan imalla rurashcata, tucui pai imalla rurashcata, imalla juchacunata rurashcata ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

¹⁸Manasés paipaj ñaupa yayacunahuan dormijpica, mandana huasi c'uchupi caj Uza runapaj huertapimi pambarcacuna. Paipaj randica paipaj churi Amonmi mandarca.

¹⁹Amonca Judá llajtata mandai callarinapajca ishqui chunga huatayujmi carca. Ishqui huatatami, Jerusalenpi mandarca. Paipaj mamaca, Jotba pueblomanta caj Haruz runapaj ushushi Mesulemetmi carca.

²⁰Amonca paipaj yaya Manasés rurashca shinallataj millaitami Mandaj Diospaj ñaupajpica rurarca.

²¹Paipaj yaya purishca tucui ñancunallapitajmi purirca. Paipaj yaya servishca manapish dioscunapajta rurashpami chaicunata adorarca.

²²Paipaj ñaupa yayacunapaj Mandaj Diosta saquishpami, Mandaj Diospaj ñanpica mana purirca.

²³Jatun mandaj Amontaca paipajta rurajcunallataj huashalla shujtajcunahuan yuyarinacushpami, paipaj huasipi huañuchircacuna.

²⁴Huashalla yuyarinacushpa jatun mandaj Amonta huañuchijcunatapish, Judá llajtapi causajcunaca tucuicunata huañuchishpami, Amonpaj randica paipaj churi Josiasta mandachun churarcacuna.

²⁵Amón ashtahuan imalla rurashcata, ashtahuan yachasha nishpaca Judá llajta jatun mandajcuna imallata rurashcata quillcashca libropimi ricuna.

²⁶Amontaca, Uza runapaj huertapi caj jutcupimi churarcacuna. Paipaj randica paipaj churi Josiasmi mandarca.