Read Chimborazo Highland Quichua 2 REYES 22 Bible Online

2 REYES 22 - Chimborazo Highland Quichua bible

2 REYES 22

¹Josiasca, Judá llajtata mandai callarinapajca pusaj huatatami charirca. Paica, quimsa chunga shuj huatatami, Jerusalenpi mandarca. Paipaj mamaca, Boscat pueblomanta caj Adaía runapaj ushushi Jedidami carca.

²Josiasca, paipaj ñaupa yaya David purishca shinallataj purishpami Mandaj Diospaj ñaupajpica ima pandata mana rurarca. Alli ladomanpish, lluqui ladomanpish mana anchurircachu.

³Josiasca Judá llajtata chunga pusaj huatata ña mandacushpami, Mesulampaj nieto Azaliapaj churi Safán quillcaj runataca, Mandaj Diospaj huasiman cashna nishpa cacharca:

⁴— Curacunata jatun mandaj Hilciaspajman rishpa paitaca: Mandaj Diospaj huasiman israelcuna apamushca cullquita, pungupi cuidajcuna japishcata tandachi nigri.

⁵Chaitaca Mandaj Diospaj huasita allichichichun mingashcacunapaj maquipi churai. Paicunaca Diospaj huasita imallata allichinapi churashcapi trabajacujcunaman,

⁶carpinterocunaman, rumita labrajcunaman, albañilcunaman cuchun. Chai huasita allichingapaj caspicunatapish, labrashca rumicunatapish randichuncuna.

⁷Huasita allichinapaj mingashcacunataca, cullquita ima shinalla apashcata ricuchichunca ama mañachun. Paicunaca imata mana pacaj alli shungu runacunami ningui — nircami.

⁸Shina nijpimi curacunata jatun mandaj Hilciasca quillcaj Safán runamanca: “Mandaj Diospaj huasipimi mandashcacunata quillcashca librota japircani” nishpa Hilcías Safán runaman cujpi paica japishpa rezarca.

⁹Quillcaj Safán runa jatun mandajpajman tigrashpaca, tucui ima shinalla cashcatami cashna huillarca: — Mandaj Diospaj huasiman apamushca cullquitaca cambajta rurajcunaca ñami paicuna japishpa Diospaj huasita imalla allichina cashcata allichichingapaj mingui tucujcunaman cuncuna.

¹⁰Chai q'uipaca quillcaj Safán runaca, Hilcías curami cai librota cun — nishpami, jatun mandajpaj ñaupajpi rezarca.

¹¹Jatun mandajca mandashca libropi quillcashcata rezashcata uyashpaca, paipaj churanata lliquirishpami,

¹²Hilcías curatapish, Safanpaj churi Ahicamtapish, Micaiaspaj churi Acbortapish, quillcaj Safán runatapish, jatun mandajpajta ruraj Asaiastapish cashna nishpa mandarca.

¹³— Ñucatapish, Jerusalenpi causajcunatapish, tucui Judá llajtapi causajcunatapish Diospaj huasipi japishca cai libropi tiyacuj shimicunamanta Mandaj Dios imata nijta tapugrichij. Ñucanchij ñaupa yayacunaca, Mandaj Dios cushca cai shimicuna imallata nicushcatamari manataj uyashpa manataj cazushcacuna. Chashna rurashcamantaca, Mandaj Diosca ñucanchijhuanca nina sindirij shinami yallitaj p'iñarishca — nircami.

¹⁴Shina nijpi Hilcías curapish, Ahicampish, Acborpish, Safanpish, Asaiaspish profeta Hulda huarmipajmanmi rircacuna. Chai huarmica, Harhaspaj nieto Ticvapaj churi Salumpaj huarmimi carca. Salumca jatun mandajpaj churanacunata cuidajmi carca. Chai huarmica q'uipata rurashca Jerusalenpimi causarca. Chaiman rishpami paicunaca paihuan parlanacurcacuna.

¹⁵Chai huarmica cashnami nirca: — Israelcunata Mandaj Taita Diosca cashnami nin: Ñucata tapunaman cachaj runamanca cashna nigrichij:

¹⁶Mandaj Diosca cashnami nin: Judá llajtata jatun mandaj chai libropi rezajpi llaquicuna tiyanata ricushca shinallatajmi cai llajtamanpish, chaipi tucui causajcunapajpish jatun llaquita apamugrini.

¹⁷Paicunallataj ñucata saquishpa shujtajcunapaj dioscunaman cushpa inciensota rupachishpa, paicunapaj maquihuan tucui imatapish rurashpa ñucata yallitaj p'iñachishcamantaca cai llajtapi causajcunahuanca, ñucaca nina sindirij shinami yallitaj p'iñarircani. Chai ninaca manataj huañungachu.

¹⁸Shina cajpipish Mandaj Diosta tapuchun ñucapajman cancunata cachaj Judá llajtata jatun mandajtaca cashna nigrichij: Israelcunata Mandaj Diosca cashnami nishca: Canca cai libropi tucui imalla nicushcata uyashpaca,

¹⁹tucui shunguhuan chaipi cambaj yuyaita churashpami Mandaj Diospaj ñaupajpi cumurircangui. Cai llajtapish shitashca saquirinata, tucui chaipi causajcunapish llaquichishca canata huillashcatami uyarcangui. Chaita uyashpaca can churarishcata lliquirishpami, ñuca ñaupajpi huacarcangui. Chaita uyashpaca ñucapish cantaca llaquinimi ninmi Mandaj Diosca.

²⁰Chaimanta cai llajtaman ñuca apamushca tucui llaquicunataca cambaj ñahuicunaca mana ricungachu. Cantaca cambaj ñaupa yayacunahuan tandachingapajca ñuca munashca punllapimi pushasha. Cantaca sumajtami pambangacuna ninmi — nircami. Chashna nishcataca paicunaca tucuitami jatun mandajmanca huillagrircacuna.