Read Chimborazo Highland Quichua 2 REYES 3 Bible Online

2 REYES 3 - Chimborazo Highland Quichua bible

2 REYES 3

¹Judá llajtata Josafat ña chunga pusaj huatata mandacujpimi, Acabpaj churi Joramca israelcunata mandai callarirca. Paica chunga ishqui huatatami, Samariapi mandarca.

²Paica paipaj yaya mama shina millaita mana rurashpapish, Mandaj Diospaj ñaupajpica millaita rurarcami. Shina cashpapish Baal diosman rijchajcunata paipaj yaya rurachishcataca anchuchircami.

³Chashna rurashpapish Nabatpaj churi Jeroboam juchallishca shinallataj juchallishpami israelcunataca juchallichirca. Chashna juchata ruranamantaca mana anchurircachu.

⁴Moab llajtata jatun mandaj Mesa runaca animalcunayujmi carca. Paimi Israel llajtata jatun mandajmanca huatanta, 100.000 malta ovejacunata, 100.000 carnerocunata millmandijta pagaj carca.

⁵Acab huañujpica, Moab llajtata jatun mandajca, israelcunata jatun mandajta c'ariyanata yuyarishpami jatarirca.

⁶Chaimi israelcunata jatun mandaj Joramca, Samariamanta rishpaca, tucui israelcuna mashna cashcata ricurca.

⁷Chashna rurashpaca Judá llajtata jatun mandaj Josafatpajmanmi: “Moab llajtata jatun mandajmi ñucahuan macanacungapaj jataricun. Paihuan macanacungapaj ¿ñucahuan risha ninguichu?” ninaman cacharca. Chaimi Judá llajtata jatun mandajca: “Ari rishallami. Ñucapish canpish shuj shinallami canchij. Ñuca soldadocunapish cambaj cashca shinallatajmi, ñuca caballocunapish cambaj cashca shinallatajmi.

⁸¿Maijan ñantataj rishun?” nijpimi Joramca: “Edom llajtapi caj shitashca pamba ñantami rishun” nirca.

⁹Chashna yuyarinacushpaca, israelcunata jatun mandajca Judá llajtata jatun mandajhuan, Edom llajtata jatun mandajhuan tucushpami Moab llajtata jatun mandajhuan macanacunaman llujshirca. Shitashca pamba ñanta muyushpa, ña canchis punllata purijpimi paicunata catishpa ricuj soldadocunapajpish, animalcunapajpish yacu tucurirca.

¹⁰Chaipimi israelcunata jatun mandajca: — ¡Jalachij! Ñucanchij quimsandij jatun mandajcunataca, Mandaj Diosca Moab llajtata jatun mandajpaj maquipi churangapajmari, pushamushca yuyachin — nirca.

¹¹Chaimi Josafatca: — Ñucanchij ima tucunata Mandaj Diosta, profetaman tapuchingapaj ¿manachu caicunapi Mandaj Diospaj maijan profeta causan? — nijpimi israelcunata jatun mandajpajta rurajcunapuramanta shujca: — Safatpaj churi Eliseomari caipi causan. Paica Eliaspajta rurajmari carca — nirca.

¹²Shina nijpi Josafatca: — Paica Mandaj Diosta tapushpa pai ima nishcata huillangamari — nishpami israelcunata jatun mandajpish, Josafatpish, Edom llajtata jatun mandajpish Eliseopajman uriyarcacuna.

¹³Eliseoca, israelcunata jatun mandajtaca: — Ñucaca canhuanca ¿imatataj chariniyari? Cambaj yaya cambaj mama tapuj cashca profetacunata tapugrilla — nijpimi israelcunata jatun mandajca: — Mandaj Diosmari ñucanchij cai quimsa jatun mandajcunataca, moabitacunapaj maquipi churangapaj tandachishca — nircami.

¹⁴Shina nijpi, Eliseoca: — Tucuita Mandaj Diosca causajmi. Ñucaca paipaj ñaupajpimi cani. Judá llajtata jatun mandaj Josafatndij mana caipi cashca cajpica, can imata nijpipish mana rimaimanchu. Cambaj ñahuillatapish mana ricuimanchu carcani.

¹⁵Shina cashpapish cunanca tocanata yachajta pushamuichij — nircami. Chai tocaj runa ña tocai callarijpimi, Mandaj Diospaj maquica Eliseopaj jahuaman shamujpi,

¹⁶Eliseoca: — Mandaj Diosca cashnami nin: Cai pugru pambapi achca jutcucunata ruraichij.

¹⁷Mandaj Diosca cashnami nin: Huairatapish mana ricunguichijchu. Tamyatapish mana ricunguichijchu. Shina cajpipish cai pugru pambapi yacu jundajpimi cancunapish, cancunapaj caballocunapish, cancunapaj animalcunapish ubyanguichij.

¹⁸Mandaj Diosca pai rurai tucushcataca ashallatami rurashpa ricuchigrin. Moabitacunatapish cancunapaj maquipi churangami.

¹⁹Chaimi cancunaca muyundijta pircacunayuj pueblocunata, tucui sumaj huasicunata urmachinguichij. Sumaj yuracunatapish urmachinguichijmi. Yacu pugyucunatapish chingachinguichijmi. Alli granota p'ucuj allpacunatapish rumicunahuan tapachinguichijmi ninmi — nircami.

²⁰Cayandij tutamanta sacrificiota cuna horaspi Edomman rina ñan ladomanta yacu shamushpaca profeta nishca shinallatajmi tucui pambata jundarca.

²¹Moab llajtapi causajcunaca, jatun mandajcuna paicunahuan macanacungapaj huichiyamucujta uyashpami, macanacuiman ri tucuipaj cajcunataca tucuicunata tandachishpa Edom llajtahuan, paicunapaj llajtahuan tupanacunpi shayarircacuna.

²²Moabitacuna cayandij tutamanta jatarishpaca paicunapaj ch'imbapurapi caj yacuca inti lamyachishcamanta yahuar shina pucajlla cajtami ricurcacuna.

²³Chaita ricushpami paicunaca: “Jalachij, chaica espadacunahuan huañunacushcamanta yahuarmari, jatun mandajcunapura p'iñanacushpamari, paicunapurallataj macanacushpa huañuchinacushca yuyachin. ¡Moab runacuna, jacuchij paicuna imalla charishcacunata japishunchij!” ninacushpami rircacuna.

²⁴Moabitacuna israelcunapaj carpa huasicunaman chayajpica, israelcuna jatarishpaca paicunataca llaquinayajtami macashpa callpachircacuna. Paicuna miticushpa rijpipish israelcunaca catishpa huañuchishpami,

²⁵pueblocunatapish tucuita chingachirca. Tarpuna allpacunapipish rumicunata jundachircacuna. Yacu pugyucunatapish tucuimi tapachirca. Granota p'ucuj tucui yuracunatapish urmachircacunami. Kir-hareset pueblollatami mana urmachircacuna. Shina cajpipish huaracahuan macanacujcuna chai pueblo muyundijta shayarishpami tucui chingachircacuna.

²⁶Moab llajtata jatun mandajca, israelcuna paipaj soldadocunata mishajta ricushpami, espadahuan macanacuj paipaj 700 soldadocunata pushashpa, Edomta jatun mandajhuan macanacungapaj huichiyasha yuyashpapish mana huichiyai tucurca.

²⁷Chai jatun mandajca, paipaj randi jatun mandaj tucuna punta churita japishpa, chai pirca jahuapi paipaj diosman sacrificiota cushpami tucui rupachirca. Chashna yallitaj p'iñarishcata ricushpami israelcunaca paicunapaj llajtaman tigrarcallacuna.