Read Chimborazo Highland Quichua 2 REYES 4 Bible Online

2 REYES 4 - Chimborazo Highland Quichua bible

2 REYES 4

¹Profeta canata yachacujcunapaj shuj huarmimi: — Cambajta ruraj ñuca cusaca ñami huañurca. Cambajta ruraj paica Mandaj Diosta manchajmi carca. Chaitaca canllataj yachanguimi. Ashtahuanpish cullquita ñucanchijman mañachij runamari paipajta ruraj cachun ñuca ishqui churicunata apasha nicun — nishpami Eliseota caparirca.

²Chaimi Eliseoca: — ¿Cambajca ñucaca imatataj rurai tucuni? Cambaj huasipica ¿imallatataj charingui? — nijpi chai huarmica: — Cambajta rurajca ñuca huasipica imata mana charinichu, shuj uchilla puñu aceitellatami charini — nirca.

³Shina nijpimi Eliseoca: — Ri, cambaj c'uchullapi causajcunapaj chushaj puñucunata mashna tiyashcata mañagri.

⁴Chaicunata apamushpaca cambaj churicunandij cambaj huasi ucupi huichcarishpa, can charicushca aceitetaca chai puñucunapi churai. Ña jundajpica puñutaca shujman ch'icanchishpa churashpa catingui — nircami.

⁵Shina nijpi chai huarmi rishpaca paipaj churicunandijmi huasi ucupi yaicushpa huichcarirca. Chai puñucunataca paipaj churicuna pasachishpa catijpimi paica pai charicushca aceiteta churashpa catirca.

⁶Tucui puñucunapi ña jundajpica, chai huarmica paipaj shuj churitami: — Ashtahuan puñucunata apamui — nijpi paipaj churica: — Ña mana ashtahuan puñucuna tiyanchu — nirca. Aceitepish pai charicushca puñumantaca ña mana ashtahuan llujshircachu.

⁷Chai q'uipaca chaitaca Diospaj runaman huillajpimi paica: — Cunanca chai aceiteta c'atushpa, cullquita canman mañachijman pagagri. Puchushca cullquihuanca canpish, cambaj churicunapish micushpa churashpa causanguichij — nirca.

⁸Shuj punlla Eliseo Sunem pueblota pasacujpica, tucuicuna rijsishca alli nishca shuj huarmimi Eliseotaca micushpa ripai nicushpalla, paipaj huasiman yaicuchirca. Eliseo chai pueblota pasacushpaca chai huarmipaj huasipi micushpami purij carca.

⁹Chai huarmica, paipaj cusataca: — Ñucanchij huasiman yaicushpataj pasaj runataca ima jucha illaj Diospaj runa cashcatami ricuni.

¹⁰Chaimanta cunanca pai ima punlla cai ñucanchijpajta shamushpapish, caipi saquirishpa samarichunca, huasi jahuapi shuj uchilla ucuta rurashun. Chai ucupica shuj camahuan, shuj mezahuan, shuj tiyarinahuan, shuj lamparahuan churashun — nirca.

¹¹Shuj punlla Eliseo chaita shamushpaca chai jahua ucupi saquirishpa chaipimi dormirca.

¹²Chaipi cashpami Eliseoca paipajta ruraj Giezi runataca huasiyuj huarmita cayanaman cachajpi chai huarmi paipajman shamujpi,

¹³Eliseoca Giezi runataca: — Cai huarmitaca: Canca ñucanchijpajca allitami rurashcangui. Can chashna rurashcamanta ñucanchijpish cambaj imata rurachun nishpapish mañailla. ¿Cambajca imatataj rurachun ningui? Can munajpica jatun mandajhuan, mana cashpaca soldadocunata mandajhuan canmanta rimashunllami ni — nirca. Eliseopaj runa chashnallataj nijpimi chai huarmica: — Ñucaca ñuca llajta gentecunahuanca allimi causani — nirca.

¹⁴Shina nijpi Giezi runaca chai huarmi nishca shinallataj Eliseoman huillajpimi Eliseoca: — Cunanca paipajca ¿imatataj rurashun? — nijpi Giezi runaca: — Paica huahuacunatamari mana charin. Cusapish ñamari yuyaj — nirca.

¹⁵Chaimi Eliseoca: — Chai huarmita cayai — nijpi paipaj runa cayajpi chai huarmica Eliseo tiyacun huasi pungupi shayarijpi,

¹⁶Eliseoca: — Shamuj huata cunan shina punllacunapica shuj c'ari huahuata marcashcami cangui — nijpi chai huarmica: — Taita Diospaj runa, ñuca amito, cambajta ruraj ñucataca ama chanzata rurahuaichu — nirca.

¹⁷Chai huarmica chichushpa caishuj huatapajca Eliseo nishca punllacuna shinallapitajmi shuj c'ari huahuata huacharca.

¹⁸Chai huahua huiñarishpa shuj punlla paipaj yaya cozichacujcunahuan cajpi chaiman rishpa,

¹⁹chaipi cashpami paipaj yayataca: — ¡Aij, ñuca umalla, ñuca umalla! — nijpi, yayaca paipajta ruraj shuj runataca: — Mamapajman apai — nirca.

²⁰Shina nijpi chai runaca marcashcahuan mamapajman apamujpimi, huahuaca chaupi punllacama mamapaj changapi tiyacushpa huañurca.

²¹Chai huarmica Diospaj runa pozana ucuman huichiyashpa chai huahuata camapi sirichishpami punguta huichcashpa llujshirca.

²²Chai q'uipaca paipaj cusata cayashpami paitaca: — Diospaj runapajman rishpa utca tigramungapaj, ñucanchijpajta rurajta shuj burrohuan ñucahuan cachahuai — nirca.

²³Chaimi paipaj cusaca: — Llullu lunapish, samana punllapish mana canchu. Paita ricunamanca ¿imapajtaj risha ningui? — nijpi paica: — Ama sustarichu — nirca.

²⁴Burrota parejachishpami, paipajta ruraj runataca: — Ñaupashpa jaculla. Ñuca ñami chayanchij ningacama — nirca.

²⁵Chashna rishpaca Diospaj runa maipi can Carmelo urcumanmi rirca. Chai huarmi caruta shamujta ricushpami, Eliseoca paipajta ruraj Giezi runataca: — Riqui, chaitaca Sunem pueblopi causaj huarmimari shamucun.

²⁶Callpashpa tupagri. Paihuan tupashpaca: ¿Allillachu cangui? ¿Cambaj cusapish, cambaj churipish allillachu? ningui — nijpi chai runa tupashpa tapujpica chai huarmica: — Allillami canchij — nirca.

²⁷Diospaj runa maipi can urcuman chayashpaca, chai runapaj chaquicunapimi ugllarirca. Giezi runa chai huarmita anchuchingapaj c'uchuyajpimi Diospaj runaca: — Saquilla, paica yallitaj llaquillamari shamushca. Pai imamanta chashna llaquilla cashcataca, Mandaj Diosca mana huillahuashcachu — nirca.

²⁸Chaimi chai huarmica: — Ñuca amito, cantaca manamari churiyuj canata mañarcanichu. ¿Manachu ñucaca ama chashna nishpa chanzata rurahuaichu nircani? — nirca.

²⁹Shina nijpi Eliseoca, Giezi runataca: — Chumbillirishpa, ñuca taunata japishpa chai huarmipaj huasiman ri. Ñanpi pi tupajpipish ama allillachu cangui ningui. Pi canta allillachu cangui nijpipish, upalla ringui. Ña chayashpaca huambrapaj ñahui jahuapi ñuca taunata churangui — nirca.

³⁰Shina nijpi huambrapaj mamaca: — Mandaj Diosca causajmi. Canpish causacunguimi. Cantaca manataj saquishpa rishachu — nircami.

³¹Chaimi Eliseoca jatarishpa chai huarmindij q'uipata rirca. Giezi runaca paicunapaj ñaupa rishpami, chai huambrapaj ñahui jahuapi Eliseopaj taunata churarca. Huambraca mana rimarcachu, samaillapish mana llujshircachu. Chaimi chai runaca Eliseohuan tupangapaj shamushpaca: — Huambraca mana rijcharinchu — nirca.

³²Chai huasiman Eliseo shamushpaca paipaj camapi huañushca huambra siricunmanmi chayarca.

³³Eliseoca chai ucuman yaicushpa punguta huichcarishpaca, chai huambramantami Mandaj Diosta mañarca.

³⁴Chaipica Eliseoca paipaj shimitaca huambrapaj shimipi, ñahuicunatapish huambrapaj ñahuicunapi, maquicunatapish huambrapaj maquicunapi churashpami paipaj jahuapi siririrca. Chaimi huambrapaj aichaca cunujyai callarirca.

³⁵Eliseoca jatarishpami, caiman chaiman chai ucupi puricurca. Cutinllataj camaman huichiyashpa, huambrapaj jahuapi chashnallataj siririjpimi, chai huambraca canchis cutin jachij nishpa ñahuita pascarca.

³⁶Chaimi Eliseoca Giezi runata cayashpaca: — Cai huasiyuj huarmita cayai — nijpi, Giezi cayajpi chai huarmi shamujpica Eliseoca: — Jaica cambaj churi — nirca.

³⁷Chai huarmica chai ucuman yaicushcahuan Eliseopaj chaquiman urmashpaca pambaman tupajtami cumurirca. Chai q'uipaca paipaj churita pushashpa llujshircallami.

³⁸Eliseoca jatun yaricai tiyai punllacunami, Gilgalman tigrarca. Profeta canata yachacujcunapish paihuanmi carca. Chaipimi paipajta rurajtaca Eliseoca: “Jatun mangapi sumaj micunata profeta canata yachacujcunapaj yanui” nirca.

³⁹Profeta canata yachacujcunamanta shujmi yuyucunata pallanaman rishpaca, sacha calabazo yurata ricushpa, paipaj jahua churana junda calabazacunata japirca. Chaita apashpa tigrashpaca picashpami, micunata yanucun mangapi churarca. Chai ima cashcataca mana yacharcachu.

⁴⁰Chai runacuna micuchun carajpi paicuna probashpaca: — ¡Diospaj runa, cai manga micuica huañuchigrinmi! — nishpami caparishpa mana micurcacuna.

⁴¹Shina nijpimi Eliseoca: — Cutata apamuichij — nishpa cutata mangapi churashpaca: — Cai mangapica ima mana allica ña mana tiyanchu. Paicunaman carailla — nirca.

⁴²Chaimanca Baal-salisamanta shuj runa shamushpami punta rurashca tandacunataca, cebada ishqui chunga tandata, punta p'ucushca llullu trigo caspacunata Diospaj runaman curca. Chaimi Eliseoca paipajta rurajtaca: — Caicunata gentecunaman carai — nirca.

⁴³Shina nijpi paipajta rurajca: — Caillataca, maitataj patsaj runacunamanca carashari — nijpimi Eliseoca: — Gentecuna micuchun carailla. Mandaj Diosca cashnami nin: Huijsa pajtajtami micungacuna, puchungapishmi ninmi — nirca.

⁴⁴Chaimi paipajta rurajca tucuicunaman cararca. Mandaj Dios nishca shinallatajmi tucuicuna huijsa pajtajta micurcacuna, puchurcapishmi.