Read Chimborazo Highland Quichua 2 REYES 5 Bible Online

2 REYES 5 - Chimborazo Highland Quichua bible

2 REYES 5

¹Naamanca, Siria llajtata jatun mandajpaj soldadocunata mandajmi carca. Siria llajtataca Mandaj Diosca Naamanmantami quishpichirca. Chaimi Siria llajtata jatun mandaj c'uyashca alli nishca carca. Naamanca yallitaj c'ari c'ari runami carca. Chashna cashpapish lepra ungüihuanmi carca.

²Siriocunaca macanacunacunahuan allichirishpa shuhuangapaj llujshishpami, paicunaca Israelpuramanta shuj uchillaraj huarmi huambrata shuhuashpa apashcacuna carca. Chai huambraca Naamanpaj huarmipajta rurajmi tucurca.

³Chai huambrami Naamanpaj huarmitaca: — Samariapi caj profetata, ñuca amo rogajpica lepra ungüimanta paica alliyachinmanmi — nirca.

⁴Chaimi Naamanca paipaj amopajman yaicushpaca: — Israel llajtamanta shuj huarmi huambrami cashna chashna nishca — nishpami pai imalla nishcata parlarca.

⁵Shina nijpi Siria llajtata jatun mandajca: — Shinashpaca, chaiman rilla. Ñucatajmi Israel llajtata jatun mandajpaj shuj quillcata cachasha — nijpimi Naamanca chunga talento cullquita, 6.000 mirga curita, chunga mudai churanacunata,

⁶Israel llajtata jatun mandajpaj cashna nishpa cachashca quillcatapish apashpa rirca. Chaipica: “Ñucapajta ruraj Naamantaca lepra ungüimanta alliyachichunmi cambajman cachapani. Chaita rurachun mingashpami, cai quillcata cachani” nishcami carca.

⁷Israel llajtata jatun mandaj chai quillcata rezashpaca, p'iñarishpa paipaj churanata lliquirishpami: — Ñucaca Dios shina causaita cui tucuj, causaita quichui tucuj cajpi shinamari, cai runataca lepra ungüimanta alliyachichun ñucapajman cachashca. ¡Chashna rurashpaca ñucahuan p'iñanacungapaj mashcacushcatami ricuchin. Chaitaca cancunallataj ricunguichijmi! — nirca.

⁸Diospaj runa Eliseo Israel llajtata jatun mandaj paipaj churanata lliquirishcata uyashpaca: “¿Ima nishpataj cambaj churanata lliquirircangui? Chai runataca ñucapajman shamui ni. Caiman shamushpami paica Israel llajtapica, profeta tiyashcata yachanga” nichunmi jatun mandajpajman cacharca.

⁹Jatun mandaj chaita huillajpica Naamanca, paipaj caballocuna aisashca carrondij rishpami, Eliseopaj huasi pungupi shayarirca.

¹⁰Chaimi Eliseoca Naamanman cashna nichun cacharca: “Jordán yacuman rishpa canchis cutin armagri. Chashna armashpaca cambaj aicha alli tucujpi lepramantaca chuya tucunguillami” nichunmi paipaj huillajta cacharca.

¹¹Shina nijpi Naaman p'iñarishpaca: — Ñucaca paitaj llujshishpa ñuca ñaupajpi shayarishpa Mandaj paipaj Diosta mañashpa maillapi lepra ungüi canpi paipaj maquita churashpami alliyachinga yuyarcanimari.

¹²Damascopi caj Abana, Farfar jatun yacucunaca ¿manachari cai Israel llajtapi caj tucui yacucunata yalli alli? Chai yacucunapi armashpaca ¿manachu chuya saquiriman carcani? — nishpami p'iñarishpa tigrashpa rirca.

¹³Ashtahuanpish paipajta rurajcuna paipajman c'uchuyashpaca: — Ñucanchij yayito, profeta ima sinchita rurachun mandashca cajpipish ruranguimanmi carca. Cunancarin cambaj ungüi anchurichunca armai nishcallataca ¿maitataj mana ruranguiyari? — nircacunami.

¹⁴Chaimi Naamanca Jordanman uriyashpa Diospaj runa nishca shinallataj chai yacupi canchis cutin pambarirca. Paipaj aichaca uchilla huahuapaj aicha shina tucushpami chuya saquirirca.

¹⁵Chai q'uipaca paipish, paihuan tucui cajcunapish Diospaj runapajman tigrashpa paipaj ñaupajpi shayarishpami: — Shujtaj llajtacunapica maipi mana Diostajca tiyashcachu. Israel llajtallapi Diostajca tiyashcatami cunantajca yachani. Cunanca cambajta ruraj canman cungapaj apamushcacunata chasquipai — nircami.

¹⁶Shina nijpi Eliseoca: — Mandaj Diosca causajmi. Ñucaca paipaj ñaupajpimi cani. Manataj japishachu — nijpimi Naamanca imallatapish japihuaillari nirca. Shina nijpipish Eliseoca mana japircachu.

¹⁷Chaimi Naamanca: — Shinashpaca cai llajtamanta allpata ishqui mulapi apachishpa aparingapaj cambajta rurajman cuhuai. Cambajta ruraj ñucaca cunanmantapacha shujtaj dioscunamanca mana ashtahuan sacrificiota cushpa tucui rupachishachu. Mandaj Diosllamanmi cusha.

¹⁸Mandaj Diosca cambajta ruraj ñucataca caillata perdonachun: Jatun mandaj ñuca amo Rimón diospaj huasiman yaicushpa paita adorangapaj rijpimi paihuan rina tucunlla. Chaipi yaicushpami pai Rimón diosta adorangapajca ñuca rigra jahuapi taunaringa. Chaimari Rimón diospaj huasipi ñucapish cungurina tucunga. Chashna rurashcata Mandaj Diosca paipajta ruraj ñucata perdonashca cachun — nircami.

¹⁹Shina nijpimi Eliseoca: — Ama manchashpa rilla — nijpi Naamanca chaimanta rishpaca ña caruta rirca.

²⁰Chaimi Diospaj runapajta ruraj Giezi runaca paipaj shungupi cashna yuyarirca: “Ñuca amoca, Siria llajtamanta Naamán runa paiman cungapaj apamushcataca mana japishpamari cachan. Mandaj Diosca causajmi. Ñucaca Naamanta cati japijta rishpa pai cusha nicushcacunata imallatapish mañamugrisha” nishpami,

²¹Giezica Naamanta catishpa rirca. Naamanca paita catishpa callpacujta ricushpami, paita chasquingapaj carromanta uriyashpaca: — ¿Tucui allillachu? — nirca.

²²Shina nijpi Giezi runaca: — Tucuimi alli. Ñuca amomari cashna nin: Profeta canata yachacuj huambraraj, ishqui runacunami Efraín urcumanta shamushpa cunanlla chayamuncuna. Paicunaman cungapaj shuj talento cullquita, ishqui mushuj churanata cushpa saquihuai nichunmi cachan — nircami.

²³Chaimi Naamanca: — Shinashpaca ishqui talento cullquita apai — nishpa Naamanca ishqui talento cullquita, ishqui mushuj churanacunandij ishqui muchilacunapi churashpa caicunatami apana cangui nishpa curca. Giezi runahuan richunca paipajta ruraj ishqui runacunahuanmi cacharca.

²⁴Ña chayashpaca pacallapimi Giezica, chai ishqui runacunapaj maquimanta japishpa, huasi ucupi huaquichirca. Chai q'uipaca paicunataca tigrachishpa cacharcallami.

²⁵Chaimantaca Giezica paipaj amo Eliseopaj ñaupajman yaicujpimi Eliseoca: — Giezi, ¿maimantataj shamungui? — nijpi paica: — Cambajta ruraj ñucaca maiman mana rircanichu — nirca.

²⁶Shina nijpi Eliseoca: — Soldadocunata mandaj carromanta uriyashpa canhuan tupanaman tigracujpica, ñuca shunguca chaipimi carca. ¿Cunan punllaca cullquita, churanata, olivo chagracunata, uva chagracunata, ovejacunata, huagracunata, shujtajpajta ruraj c'aricunata, huarmicunata japinami yuyanguichu?

²⁷Chaimanta cunanca Naamanpaj lepra ungüica cambaj aichamanmi pasanga. Cambaj huahua huahuacunapishmi, tucui causaipi chai ungüihuan causangacuna — nircami. Shina nijpi Giezica tucui paipaj aicha rasu shina yurajlla lepra ungüillami Eliseopaj ñaupajmanta llujshirca.