Read Chimborazo Highland Quichua 1 CRÓNICAS 12 Bible Online

1 CRÓNICAS 12 - Chimborazo Highland Quichua bible

1 CRÓNICAS 12

¹Davidca Cispaj churi Saulta miticushpami, Siclagpi causacurca. Pai chaipi cajpipish, jatun macanacuicunapi paita ayudangapajca, tauca c'ari c'ari soldadocunami paihuan tandanacungapaj chaiman rircacuna.

²Chai soldadocunaca arcocunata apashcacunami carca. Puntajlla caspita shitanatapish, rumita huaracahuan shitanatapish alli maquihuanpish, lluqui maquihuanpish shitanata alli yachajcunami carca. Benjaminpaj aillupi Saulpaj huasi ucupuracunaca caicunami:

³Chai soldadocunata mandajca Ahiezermi carca. Paipaj q'uipaca Joasmi mandarca. Paicunaca Gabaamanta caj Semaapaj churicunami carca. Shinallataj Azmavet runapaj Jeziel, Pelet shuti churicunapish, Anatotmanta caj Beracapish, Jehupishmi carca.

⁴Gabaonmanta caj Ismaiasca quimsa chunga c'ari c'ari caj soldadocunata yalli c'ari c'arimi carca. Paicunapurapi mandajmi carca. Shinallataj Jeremías, Jahaziel, Johanan, Gederamanta caj Jozabad,

⁵Eluzai, Jerimot, Bealías, Semarías, Harufmanta caj Sefatías,

⁶Elcana, Isías, Azareel, Joezer, Jasobeampishmi carca. Paicunaca Corepaj huahua huahuapurami carca.

⁷Gedormanta caj Jeroham runapaj Joela, Zebadías shuti churicunapishmi carca.

⁸Gad aillumantapish taucacunami David miticushpa tiyacun shitashcapi caj peña jutcuman rircacuna. Chai runacunaca macanacunata alli yachaj, c'ari c'ari runacuna escudohuanpish, lanzahuanpish alli macanacujcunami carca. Paicunapaj ñahuicunaca leoncunapaj ñahui shinami carca. Urcucunapi purij tarugacuna shina yallitaj callpajcunami carca.

⁹Chaicunaca caicunami carca: Puntaca Ezer, ishquipica Obadías, quimsapica Eliab,

¹⁰chuscupica Mismana, pichcapica, Jeremías,

¹¹sujtapica Atai, canchispica, Eliel,

¹²pusajpica Johanán, iscunpica Elzabad,

¹³chungapica Jeremías, chunga shujpica Macbanai c'ari c'ari runacunami carca.

¹⁴Tucui chaicunaca Gadpaj huahua huahuapura soldadocunallatataj mandajmi carca. Tucuipaj q'uipa churica patsaj soldadocunata mandajmi carca. Punta churica 1.000 soldadocunata mandajmi carca.

¹⁵Chai runacunami huatapaj punta quilla tamya punllacunapi Jordán yacu mirarishpa lado pambacunacama jundashca cajpipish ch'imbashpa pugru pambacunapi causajcunataca inti llujshin ladoman, inti huashicun ladoman callpachishpa cacharcacuna.

¹⁶Shinallataj Benjaminpaj, Judapaj huahua huahuacunapuramanta maijancunapishmi David miticushpa tiyacun peña jutcunaman rircacuna.

¹⁷Paicunata tupanaman David llujshishpaca: “Sumaj causai tiyachun ñucata ayudanaman shamushca cajpica, ñucapish cancunahuanca shuj yuyaillami tucusha. Ashtahuanpish ñuca pita jatun llaquita mana rurashca cajpipish ñucata p'iñajcunapaj maquipi churangapaj shamushca cajpica, ñucanchij ñaupa yayacunapaj Diosllataj ricushpa cancunata llaquichichun” nircami.

¹⁸Chaipimi quimsa chungacunata mandaj Amasaica, Diospaj Espíritu japijpi cashna nirca: “David cambajmi canchij. Isaipaj churi canhuanmi canchij. Cambajca sumaj causai, sumaj causai tiyachun. Canta ayudajcunapajpish sumaj causai tiyachun. Cantaca Taita Diosmari ayudacun” nirca. Chashna nijpimi Davidca, paicunata chasquishpa soldadocunata mandajcunapurapi churarca.

¹⁹Shinallataj Manasespaj aillucunamanta maijancunapishmi Davidhuan tandanacugrircacuna. Saulhuan macanacungapaj filisteocuna rijpica Davidpish filisteocunahuanmi rirca. (Ashtahuanpish filisteo soldadocunata mandajcuna tandanacushpa yuyarinacushpami: “Davidca ñucanchijta huañuchishpa ñucanchij umacunata apashpa paipaj amo Saulpi alli ricurigringallatajmari”) nishpa tigrachishpa cachajpimi Davidca mana ayudarca.

²⁰Siclagman David tigrajpi paihuan tandanacugrij Manasés aillupuramanta soldadocunaca: Adnas, Jozabad, Jediaiel, Micael, Jozabad, Eliú, Ziletai shuticunami carca. Paicunaca Manasespaj aillumanta paicunapurallataj huaranga huaranga soldadocunata mandajcunami carca.

²¹Paicunaca macanacunata alli yachaj, c'ari c'ari soldadocunami carca. Chashna cashpami paicunaca shuhuacuna shamujpica, Davidta ayudarcacuna. Paicunataca soldadocunata mandajcuna cachunmi churarca.

²²Mandaj Diospaj soldadocuna shina achcacuna tucungacamami Davidta ayudangapajca punllanta ashtahuan ashtahuan soldadocuna shamuj carca.

²³Hebronpi David cajpimi, Mandaj Dios nishca shinallataj Saúl mandacushcapi Davidta churangapaj achca soldadocuna shamurcacuna. Soldadocunata mandajcuna macanacunapaj allichirishcacunaca caicunami:

²⁴Judapaj aillumantaca macanacunalla allichirishcacunaca escudotapish, lanzatapish apashca 6.800 soldadocunami shamurcacuna.

²⁵Simeonpaj aillumantaca, macanacunalla allichirishca c'ari c'ari 7.100 soldadocunami shamurcacuna.

²⁶Levipaj aillumantaca, 4.600 soldadocunami shamurcacuna.

²⁷Shinallataj Aaronpaj huahua huahuacunata mandaj Joiadapish 3.700 soldadocunandijmi shamurca.

²⁸Paicunahuanca Sadocpish, paipaj yayapaj familiacunata mandaj ishqui chunga ishqui runacunapishmi shamurca. Sadocca, q'uipa huiñai c'ari c'ari fuerzasapami carca.

²⁹Chai punllacunacamaca achcacuna paicunapaj aillupura caj Saulpaj familiahuan alli apanacucushcamantarajmi, Benjaminpaj aillumantaca 3.000 soldadocunalla shamurcacuna.

³⁰Efraín aillumantaca, 20.800 c'ari c'ari soldadocunami shamurcacuna. Paicunaca c'ari c'aricuna paicunapaj yayapaj huasi ucupurapipish alli nishcacunami carcacuna.

³¹Manasespaj chaupi aillumantaca, 18.000 soldadocunami shamurcacuna. Paicunaca jatun mandaj cachun Davidta churanaman pilla rina cashcata shuticunata quillcashpa cachashcacunami carca.

³²Isacarpaj aillumantaca, 200 mandajcunami shamurcacuna. Paicunaca imalla tucucujta entendishpa israelcunaman imallata ruranata yuyaita cujcunami carca. Chai nishcacunataca tucuicunami uyajcuna carca.

³³Zabulón aillumantaca, 50.000 soldadocunami shamurcacuna. Paicunaca macanacunapaj allichirishcacuna, tucui laya macanacunata apashcacuna, ima shujtajta mana yuyashpa macanacuna yuyaillami shamurcacuna.

³⁴Neftalí aillumantaca soldadocunata mandaj 1.000 soldadocunami, 37.000 soldadocunata pushashpa, lanzacunahuan, escudocunahuan shamurcacuna.

³⁵Dan aillumantaca, macanacunapaj allichirishca 28.600 soldadocunami shamurcacuna.

³⁶Aser aillumantaca, macanacunapaj allichirishca, macanacunalla 40.000 soldadocunami shamurcacuna.

³⁷Jordán yacu ch'imbanijmantapish 120.000 soldadocunami tucui laya macanacunacunata apashca shamurcacuna. Paicunaca Rubenpaj, Gadpaj aillucunamantapish, Manasespaj chaupi aillumantapishmi carca.

³⁸Macanacunata yachaj tucui chai runacunami macanacunapaj allichirishcacuna tucuicuna shuj yuyailla Davidta israelcunata jatun mandaj cachun churangapaj Hebronman shamurcacuna. Tucui caishuj israelcunapish jatun mandaj cachun Davidta churangapajca, shuj yuyaillami carcacuna.

³⁹Tucui chai soldadocunami Davidhuan micushpa, ubyashpa quimsa punllata Hebronpi carcacuna. Paicuna micuchunca Hebronpi causaj israelcunallatajmi micunataca allichishcacuna carca.

⁴⁰Israelpica jatun cushicui tiyajpimi, chai c'uchulla llajtacunapi causajcunapish, shinallataj Isacarpaj, Zabulonpaj, Neftalipaj aillucunapish cutata, higo tandacunata, uvata chaquichishcacunata, vinota, aceitetapish burrocunapi, camellocunapi, mulacunapi, huagracunapi apachishpa apamurcacuna. Huagracunatapish, ovejacunatapish achcatami apamurcacuna.