Read Chimborazo Highland Quichua 1 CRÓNICAS 16 Bible Online

1 CRÓNICAS 16 - Chimborazo Highland Quichua bible

1 CRÓNICAS 16

¹Diospaj arcata chashna apamushpaca, David ñaupaman shayachishca carpa huasi chaupi pambapimi churarcacuna. Chaipimi Davidca Taita Diosman cushpa tucui rupachinatapish cushpa rupachirca, Dioshuan alli cangapajpish paipaj ñaupajpi curca.

²Davidca Diosman cushpa tucui rupachinatapish cushpa rupachishpa, Dioshuan alli cangapaj cushca q'uipaca, tucui israelcunataca tucuita Mandaj Diospaj shutipimi alli cashca canguichijman nirca.

³Chai q'uipaca tucui israelcunamanmi c'aricunamanpish, huarmicunamanpish cada shujman shuj tandahuan, mirga aichahuan, chaquishca uvata rurashca shuj tandahuan cararca.

⁴Davidca, Mandaj Diospaj arca ñaupajpi Diospajta rurachunmi, levitapuramanta agllashpa churarca. Paicunataca israelcunata Mandaj Taita Diosta yuyachichun, tucuicunapaj juchacunata paiman huillashpa mañachun, pagui nishpa alabachunpishmi chaipi churarca.

⁵Paicunaca, puntaca Asafmi carca. Chai q'uipaca: Zacarías, Jeiel, Semiramot, Jehiel, Matatías, Eliab, Benaía, Obed-edom, Jeiel shuti levitacunami carca. Paicunaca salteriocunapi, arpacunapi tocajcunami carca. Asafca cimbalocunapi tocajmi carca.

⁶Shinallataj Benaía, Jahaziel curacunaca Taita Dioshuan ari ninacushca quillcata huaquichina arca ñaupajpi, punllanta trompetacunapi tocajcunami carca.

⁷Davidca, chai punllami Asaftapish, paihuan cantaj caishujcunatapish, Mandaj Diosta pagui nishpa cashna cantachun punta cutin mandarca:

⁸“Mandaj Diostaca alabaichigari, paitaca pagui nichigari. Pai imallata rurashcataca, pueblocunapi yachaj chayachichigari.

⁹Mandaj Diostaca cantaichigari. Salmocunahuan cantaichigari. Jatun mancharinacunata pai rurashcataca huillaichigari.

¹⁰Jucha illaj Diospaj shutimanta cushicuichigari. Mandaj Diosta mashcajcunapaj shunguca cushicuchun.

¹¹Mandaj Diostapish, paipaj podertapish mashcaichigari. Punllanta paita mashcaichigari.

¹²Mancharinacunata pai rurashcata yuyarichigari. Pi mana rurai tucuipajta rurashcatapish yuyarichigari. Pai mandashca shimicunatapish yuyarichigari.

¹³Mandaj Diospajta ruraj Israelpaj huahua huahuacunamari canguichij. Pai agllashca Jacobpaj huahua huahuacunamari canguichij.

¹⁴Mandaj Diosca ñucanchij Diosmari. Paipaj shimicunaca tucui cai pachapimari.

¹⁵Pai ari nishcataca huiñaita manataj cungaringachu. Pai mandashca shimicunapish huaranga huaranga huahua huahuacunapaj shamucungallami.

¹⁶Abrahammanmari chashnatajmi rurasha nirca. Isaacmanpish rurashatajmi nishpami huillarca.

¹⁷Chaitaca pajtachinacungapaj nishpa Jacobman cushcami. Israelcunapaj ari nishcaca huiñaipajmi canga,

¹⁸nishpaca: Canaán llajtataca canmanmi cusha. Cambaj allpa cachunmi cusha nircami.

¹⁹Paicuna ashacunalla cai punllacunapi, chai llajtacunapica pasajcunalla shina cai punllacunapimi chashna nirca.

²⁰Paicunaca llajtan llajtanmi purirca. Ch'ican ch'ican mandacun llajtacunamanmi rirca.

²¹Paicunata pi llaquichichunca Diosca mana saquircachu. Ashtahuanpish paicunata c'uyashcamantami, chai llajtacunata jatun mandajcunata llaquichij carca.

²²Ñuca agllashcacunataca ama tuparichijchu. Ñuca profetacunataca, ama llaquichichijchu nircami.

²³Mandaj Diostaca, tucui cai pachapi causajcuna cantaichigari. Pai mishachij cashcataca punllanta huillaichigari.

²⁴Pai jatun cashcataca, tucui gentecunapaj chaupipi cantaichigari. Mancharinacunata ruraj cashcataca tucui pueblocunapi huillaichigari.

²⁵Mandaj Diosca jatunmari, alabashca cana Diosmari. Shujtaj dioscuna shinaca mana canchu. Paica manchanataj Diosmari.

²⁶Tucui pueblocunapaj dioscunaca, mana diostajchu. Ashtahuanpish Mandaj Diosca, jahua pachatapish ruraj Diosmari.

²⁷Paipaj ñaupajpica alabanapish, cushicunapishmi tiyan. Pai causacunpica, tucuita rurai tucunapish, cushicuipishmi tiyan.

²⁸Pueblocunapi causajcuna Mandaj Diosmanca alli nishca canata cuichigari. Jatunmi cangui, tucuita rurai tucujmi cangui nishcata cuichigari.

²⁹Mandaj Diospaj shutitaca alli nina cashca shinataj alli nichij. Paiman cuna cashcata apashpa, paipaj ñaupajman shamuichij. Jucha illaj sumaj Mandaj Diospaj ñaupajpi cungurichij.

³⁰Tucui cai pachapi causajcuna Mandaj Diospaj ñaupajpi chujchuichij. Cai pacha ama cuyurichunca paimi sinchita churarca.

³¹Jahua pachapish cushicuichij. Cai pachapish cushicuichij. “Ñucanchij mandajca Mandaj Diosmi” nishpa llajtacunapi huillaichij.

³²Mama cuchapish, chaipi imalla tiyajpish huajiaichij. Allpapish, chaipi imalla tiyajcunapish cushicuichij.

³³Shinallataj tucui yuracuna Mandaj Diospaj ñaupajpi cantaichij. Paica cai pachata mandanamanmari shamucun.

³⁴Mandaj Diosta mañaichij, paica allimari. Paipaj c'uyaica huiñaipajmi.

³⁵Cashna nichigari: Ñucanchijta quishpichij Dios, quishpichihuayari. Cambaj jucha illaj shutita huillangapaj. Cambaj cantocunapi cushicungapaj. Tucui llajtacunamanta llujshichishpa tandachihuayari.

³⁶Israelcunata Mandaj Taita Diosca huiñaimanta huiñaicama cajmi. Paitaca alli nishca cachun” nircami. Shina nijpica tucuicunami: “Chashna cachun” nishpa, Mandaj Diosta alabarcacuna.

³⁷Davidca Mandaj Dioshuan ari ninacushca quillcata huaquichina arca ñaupajpi, punllanta Mandaj Diospaj imallata rurana cashcata rurajcuna cachunca Asafta, paipaj huauquicunandijtami chaipi saquirca.

³⁸Obed-edomtaca paipaj aillullamantataj caj sujta chunga pusaj runacunandijmi carpa huasi pungupi cuidajcuna cachun saquirca. Jedutunpaj churi Obed-edomtapish, Hosa runatapish pungupi cuidaj cachunllatajmi saquirca.

³⁹Sadoc curataca, caishuj curacunandijmi, Mandaj Diospaj carpa huasipi Diospajta rurachun Gabaón lomapi tiyaj altarpi saquirca.

⁴⁰Chishipish tutamantapish Mandaj Diosman animalcunata cushpa tucui rupachina altar jahuapi punllanta rupachishpa Mandaj Diosman cuchunmi chaipi saquirca. Ima shinalla ruranata Mandaj Dios israelcunata mandashca shinallatajmi rurana carca.

⁴¹Paicunahuanca Hemanpish, Jedutunpish, cantachun pillata agllashcacunata ñajaman ña huillashcacunandijmi chaipi carcacuna. Paicunataca: “Mandaj Diospaj c'uyaica huiñaipajmi” nishpa cantajcuna cachunmi churashca carca.

⁴²Chai cantajcuna Diosta alabashpa cantacujpi trompetacunapi, cimbalocunapi, shujtaj tocanacunapipish tocachunca Hemanta, Jedutuntami churarca. Jedutunpaj churicunataca, pungupi cuidajcuna cachunmi churarca.

⁴³Chai q'uipaca tucuicuna cada quiquin huasiman tigrarcallacunami. Davidpish, paipaj huasi familiata Dios allicunata cuchun ningapaj tigrarcallami.