Read Chimborazo Highland Quichua 1 CRÓNICAS 19 Bible Online

1 CRÓNICAS 19 - Chimborazo Highland Quichua bible

1 CRÓNICAS 19

¹Tucui chaicuna q'uipaca, amonitacunata jatun mandaj Nahasmi huañurca. Paipaj randica paipaj churimi mandarca.

²Chaimi Davidca: “Ñucami Nahaspaj churi Hanunhuanca, paipaj yaya ñucahuan alli cashca shinallataj paihuanpish llaquishcata ricuchigrini” nishpami paipaj yaya huañushcamanta cushichingapaj Davidca paipajta ruraj maijancunata cacharca. Davidpajta rurajcuna amonitacunapaj llajtaman Hanunta cushichinaman chayajpica,

³chai llajtata q'uipa mandajcunaca jatun mandaj Hanuntaca: “¿Cambaj yuyaipica Davidca paipajta rurajcunata cachashpaca cambaj yaya huañushcamanta canta cushichichun cachashcatachu yuyangui? ¿Manachu Davidpajta rurajcunaca can ima shina cashcata purij shinalla ricunaman, tapunaman, cai llajtata rijsinaman shamushca canga?” nircacunami.

⁴Shina nijpimi Hanunca, Davidpajta rurajcunata japishpa shuj lado barbasta tucui raspashpa, churanacunatapish shuj lado uritaca siqui patacama lliquishpa paicunataca tigrachishpa cacharca.

⁵Paicuna tigrajpica paipaj runacunata imallata rurashpa cachashcata Davidman yachaj chayachijpimi, paicunaca yallitaj pingaihuan cana cashcata yachashpa jatun mandajca maijancunata tupanaman cachashpaca: “Cutinllataj barbas huiñangacama Jericopi saquirichij. Barbas huiñajpica tigramunguichijllami” ninaman cacharca.

⁶Amonitacunapish, jatun mandaj Hanunpish chaimanta David paicunahuan p'iña cashcata yachashpami, Mesopotamiapi causaj, Siriapi causaj, Maacapi causaj, Sobapi causaj, caballocunapi tiyarij gentecunatapish, carrocunatapish, pagashpa pushamuchun 1.000 talento cullquita cacharcacuna.

⁷Chaimi paicunaca 32.000 carrocunatapish, jatun mandaj Maacatapish, paipaj tucui soldadocunandij japirca. Paicuna shamushpaca Medeba ch'imbapurapimi carpa huasicunata shayachishpa tiyarircacuna. Amonitacunapish paicunapaj pueblocunamanta llujshishpa paicunahuan tandalla tucushpami macanacunaman shamurcacuna.

⁸Chaita David uyashpaca, c'ari c'ari tucui soldadocunahuanmi Joabta cacharca.

⁹Amonitacunaca macanacungapaj llujshishpaca, israelcunapaj puebloman yaicuna pungullapimi macanacunalla tucushpa shayarircacuna. Paicunahuan shamuj jatun mandajcunapish shujtaj pambapimi carcacuna.

¹⁰Joabca ñaupaj ladomantapish, huasha ladomantapish amonitacuna quimimugrijta ricushpami, israelcunapuramantaca ashtahuan alli soldadocunata agllashpa siriocunahuan macanacungapaj macanacunalla tucushpa shayarirca.

¹¹Caishuj soldadocunataca amonitacunahuan macanacunallata rurashpa shayachishpami, paipaj huauqui Abisaiman cushpa cashna nirca:

¹²“Siriocuna ñucata mishagrijpica, can ayudanaman shamungui. Amonitacuna canta mishagrijpica, ñucami canta ayudanaman shamusha.

¹³Taita Diospaj agllashcacunamanta ñucanchij pueblomantaca c'ari c'ari cailla, c'ari c'ari cashunlla. Mandaj Dios paipaj ima shina alli canapaj rurachunlla” nircami.

¹⁴Shina nijpi, Joabca paihuan caj israelcunahuanmi siriocunahuan macanacungapaj c'uchuyagrirca. Ashtahuanpish siriocunaca paicunapaj ñaupajmanta miticushpa rircallacunami.

¹⁵Amonitacunaca siriocuna miticushpa rijta ricushpaca, paicunapish Joabpaj huauqui Abisaipaj ñaupajmanta miticushpa rishpami, puebloman yaicurcacuna. Chai q'uipaca Joabca, Jerusalenman tigrarcallami.

¹⁶Siriocunaca israelcuna paicunata mishajpimi Éufrates yacu chaininij llajtapi causaj siriocunata cutinllataj pushanaman cacharca. Chaicunata mandajca Hadad-ezerpaj soldadocunata mandaj Sofacmi carca.

¹⁷Chaita Davidman huillajpica, tucui israelcunata tandachishpami Jordán yacuta ch'imbashpa paicunapajman shamurca. Chaipimi paicunataca macanacunalla tucushpa shayarichun mandarca. Macanacunalla tucushpa shayarishca soldadocunata macanacuichij nishpa David mandajpimi, paicunaca siriocunahuan macanacurcacuna.

¹⁸Ashtahuanpish siriocunaca israelcunapaj ñaupajmantami miticushpa callparca. Chaipica Davidca carrocunapi caj 7.000 soldadocunata, chaquillahuan purij 40.000 soldadocunatami huañuchirca. Soldadocunata mandaj Sofactapishmi huañuchirca.

¹⁹Hadad-ezerta ayudanaman shamujcunaca israelcuna mishajpimi, paicunaca Davidhuan alli tucushpa paipajta rurajcuna tucurcacuna. Chaimanta pachami siriocunaca amonitacunataca mana ayudashun nircacuna.