Read Chimborazo Highland Quichua 1 CRÓNICAS 23 Bible Online

1 CRÓNICAS 23 - Chimborazo Highland Quichua bible

1 CRÓNICAS 23

¹Davidca ña yallitaj yuyaj cashpami, paipaj churi Salomontaca paimi israelcunata jatun mandaj nishpa churarca.

²Israelcunata mandajcunata, curacunata, levitacunatapishmi tandachirca.

³Chaipica levitacunataca, quimsa chunga huatayujmanta huichiman cajcunatami yuparcacuna. Paicunata shujllancama yupajpica 38.000 levitacunami tiyashca carca.

⁴Chai tucuicunamantaca Mandaj Diospaj huasipi imalla rurana cashcata rurachunca 24.000 levitacunatami churarca. 6.000 levitacunataca mandajcuna cachunpish, juezcuna cachunpishmi churarca.

⁵Pungupi cuidajcuna cachunca, 4.000 levitacunatami churarca. Mandaj Diosta tocanacunahuan alabanapaj David rurachishca tocanacunahuan Mandaj Diosta cantachunpish 4.000 levitacunatami churarca.

⁶Davidca chai ruranacunapica, ñaupa yaya Levipaj Gersón, Coat, Merari shuti churicunapaj huahua huahuacunataca chaipurallata ch'icanchishpami ch'ican ch'ican ruranacunapi churarca.

⁷Gersonpaj huahua huahuacunamantaca Laadán, Simei shuticunami carca.

⁸Laadanca, quimsa churitami charirca. Punta churica, Jehielmi carca. Q'uipa churicunaca Zetam, Joel shuticunami carca.

⁹Simeipish quimsa churicunatami charirca. Chaicunaca Selomit, Haziel, Harán shuticunami carca. Paicunami Laadanpaj huahua huahuapura quiquinpurallatataj mandajcuna carca.

¹⁰Simeipaj churicunaca: Jahat, Zina, Jeús, Bería shuti chuscu churicunami carca.

¹¹Jahatca punta churimi carca. Q'uipa churica Zinami carca. Ashtahuanpish Jeús runahuan, Beria runahuanca mana achca huahuacunata charishcamantami paicunataca ishquindijta shuj familiata shinalla yupashca carca.

¹²Coatca, chuscu churicunatami charirca. Paicunaca: Amram, Izhar, Hebrón, Uziel shuticunami carca.

¹³Amrampaj churicunaca: Aarón, Moisés shuticunami carca. Aarontaca, ashtahuan Diospajlla cajcunapi Mandaj Diospajllata rurachunmi ch'icanchirca. Mandaj Diospaj ñaupajpi inciensota rupachichun, paipaj shutipi bendiciachunmi ch'icanchirca. Aaronpish paipaj huahuacunapish huiñaita chaillatataj rurajcuna cachunmi ch'icanchirca.

¹⁴Diospaj runa Moisespaj huahua huahuacunataca Levipaj ailluhuan chagrushpami paicunahuan churarca.

¹⁵Moisespaj churicunaca Gersón, Eliezer shuticunami carca.

¹⁶Gersonpaj churica, Sebuelmi carca. Paica mandajmi carca.

¹⁷Eliezerca, Rehabías shuti churitami charirca. Rehabiasca mandajmi carca. Eliezerca shujtaj churicunataca mana charircachu. Ashtahuanpish Rehabiasca achca churicunatami charirca.

¹⁸Izharpaj churica, Selomitmi carca. Paica mandajmi carca.

¹⁹Hebronpaj churicunaca caicunami: Punta churica Jerías. Paica mandajmi carca. Q'uipa churica Amarías. Ishquipaj q'uipaca Jahaziel. Quimsapaj q'uipaca Jecamán shuticunami carca.

²⁰Uzielpaj churicunaca caicunami: Punta churica Micaías. Paica mandajmi carca. Q'uipa churica Isiasmi carca.

²¹Meraripaj churicunaca: Mahli, Musi shuticunami carca. Mahlipaj churicunaca: Eleazar, Cis shuticunami carca.

²²Eleazarca churicunata manataj charishpami huañurca. Ushushicunallatami charirca. Chai ushushicunataca paicunapaj yayapaj huauqui Cispaj churicunami paicunapaj huarmi cachun japircacuna.

²³Musi runapaj churicunaca: Mahli, Edar, Jeremot shuti quimsa churicunami carca.

²⁴Tucui chaicunami Levipaj huahua huahuacuna carca. Paicunapaj ñaupa yayacunamanta mirarimushca huahua huahuacunata, quiquin familiacunata mandajcunata yupashpaca, ishqui chunga huata yallita charijcunamanta huichimanmi shuticunata quillcarcacuna. Paicunami Diospaj huasipi imalla rurana cashcapi trabajajcuna carca.

²⁵Davidca cashnami nishca carca: “Israelcunata Mandaj Taita Diosmi pai agllashca israelcunamanca sumaj causaita cushca. Paica Jerusalenpimi huiñaipaj causanga.

²⁶Chaimanta levitacunaca Diospaj carpa huasitapish, paipajta ruranapaj caj charinacunatapish ña mana ashtahuan caiman chaiman apacunachu canga” nishcami carca.

²⁷David ña huañunalla punllacunapi cashpa levipaj huahua huahuacunataca q'uipata ima shinalla canapaj ishqui chunga huatayujmanta huichiman yupaichij nishca shinallatajmi yuparcacuna.

²⁸Paicunaca Mandaj Diospaj huasipica caicunata rurangapajmi saquirijcuna carca. Mandaj Diospaj huasi canllapi, Mandaj Diospaj huasi canllapi tiyaj ucucunapi, imapish Diospajlla cajcunata chuyayachinapi, Diospaj huasi ucupi imalla rurana cashcata ruranapimi saquirijcuna carca. Paicunataca Aaronpaj huahua huahuacunami mandaj carca.

²⁹Diospaj ñaupajpi tandata churangapajpish, Diosman cushca animalta huañuchishpa ashtahuan alli cutahuan cungapajpish, levadura illaj ñañujlla jatun tortillacunata rurangapajpish, Diosman cushpa sartenpi cusangapajpish, Diosman cushpa camchangapajpish, medinacunata, pizanacunata ricungapajpishmi saquirijcuna carca.

³⁰Mandaj Diosta chishipish, tutamantapish pagui nishpa cantashpa punllanta alabanapajpish,

³¹Samana punllacunapipish, mushuj luna punllacunapipish, shujtaj jatun punllacunapipish Mandaj Diosman animalcunata cushpa tucui rupachingapajpishmi saquirijcuna carca. Chai punllacunapi mashna animalcunata cuna cashcata cungapajpish, cada animalta ima shinalla cuna cashca shina cungapajpish,

³²Dioshuan tupana carpa huasitapish, Diospajlla ch'icanchishca ucutapish cuidangapajmi saquirijcuna carca. Mandaj Diospaj huasipi imalla rurana cashcata ruraj Aaronpaj huahua huahuacuna Levipurallatajmi paicunataca mandarcacuna.