Read Chimborazo Highland Quichua 1 CRÓNICAS 26 Bible Online

1 CRÓNICAS 26 - Chimborazo Highland Quichua bible

1 CRÓNICAS 26

¹Pungupi cuidajcuna cachun ch'icanchishpa churashcacunaca caicunami: Coreitapuramanta caj Asafpaj huahua huahuapura Corepaj churi Meselemiasmi yaicurca.

²Meselemiaspaj churicunaca: Punta churi Zacarías, ishquipica Jediael, quimsapica Zebadías, chuscupica Jatniel,

³pichcapica Elam, sujtapica Johanan, canchispica Elioenaimi yaicurca.

⁴Obed-edompaj churicuna: Puntaca Semaías, ishquipica Jozabad, quimsapica Joa, chuscupica Sacar, pichcapica Natanael,

⁵sujtapica Amiel, canchispica Isacar, pusajpica Peultaimi yaicurca. Taita Diosmi Obed-edommanca allicunata curca.

⁶Obed-edompaj churi Semaiaspish huahuacunata charircami. Paicunaca paicunapaj ñaupa yayacunapaj huasi familiata mandajcuna, c'ari c'ari, fuerzasapa runacunami carca.

⁷Semaiaspaj churicunaca: Otni, Rafael, Obed, Elzabad shuticunami carca. Paicunapurallataj caj Eliú, Samaquías fuerzasapa runacunapishmi carca.

⁸Tucui paicunami Obed-edompaj huahua huahuacuna carca. Paicunaca paicunapaj huahuacunapish, paicunapurallataj cajcunapish, Diospajta ruranapajca fuerzasapa c'ari c'aricunami carca. Obed-edompaj huahua huahuacunaca sujta chunga ishquimi carca.

⁹Meselemiaspaj huauquicunapish, churicunapish, chunga pusaj c'ari c'ari runacunami carca.

¹⁰Merari runapaj huahua huahuapuramanta Hosa runapaj churica: Simrimi carca. Paica mandajmi carca. (Simri runataca mana punta churi cajpipish, paipaj yayaca mandaj cachunmi churarca).

¹¹Chaipaj q'uipaca Hilcías. Quimsapica Tebalías. Chuscupica Zacariasmi carca. Hosapaj huauquicunapish, churicunapish chunga quimsami carca.

¹²Tucui paicunapuramanta pungupi huashan huashan cuidashpa paipajta rurachunca cuidajcunata mandajcunatapish, pai mandana runacunatapish cashnami ch'icanchirca.

¹³Cada pungupi maijanlla cuidana cashcata yachangapajca, paicunapaj ñaupa yayacunapaj huasi familia mashna cashca shinallatajmi yuyajcunapajpish chairajcunapajpish suerteta rurarca.

¹⁴Inti llujshin ladopi caj pungupi cuidachun sortejpica, Selemiaspajmi urmarca. Selemiaspaj churi alli cunaj Zacariaspaj sortejpica, janaj lado pungupi cuidanami urmarca.

¹⁵Obed-edompajca, ura lado pungupi cuidanami urmarca. Paipaj churicunapajca, Diospaj huasipi charinacunata huaquichina ucuta cuidanami urmarca.

¹⁶Supimpaj, Hosapajca inti huashicun ladopi caj Salequet pungupi cuidanami urmarca. Chaillatatajmi huichiman rina ñan tiyan. Cuidajcunataca huashan huashan cashnami churashca carca:

¹⁷Inti llujshin lado pungupica, punllanta sujta levitacunami cuidana carca. Janaj lado pungupica punllanta chuscumi cuidana carca. Ura lado pungupipish punllanta chuscullatajmi cuidana carca. Diospaj huasipi tiyaj huaquichina ucucunatapish ishqui ishquimi cuidana carca.

¹⁸Inti huashicun ladoman caj ucupi imalla charinacunata huaquichinapica ishquimi cuidana carca. Ñan ladomanca chuscumi cuidana carca.

¹⁹Chashnami Corepaj, Meraripaj huahua huahuacunataca, mailla pungupi cuidana cashcapi churarcacuna.

²⁰Levitacunapurallataj caj Ahiastaca Diospaj huasipi tiyaj achca valijcunata, Diospajlla ch'icanchishca achca valijcunata cuidachunmi saquircacuna.

²¹Gersonpaj churi Laadanpaj huahua huahuacunapaj ñaupa yayacunamanta mirarishca quiquinpurallata mandajcunaca jehielitacunami carca.

²²Jehielipaj churicunandij, Zetam paipaj huauqui Joeldijca Mandaj Diospaj huasipi tiyaj achca valijcunatami cuidana tucurca.

²³Amrampaj, Izharpaj, Hebronpaj, Uzielpaj huahua huahuapuramantaca,

²⁴Moisespaj churi Gersonpaj huahua huahuapura caj Sebuelmi Mandaj Diospaj huasipi tiyaj achca valijcunata cuidajcunata mandaj carca.

²⁵Paipaj huauqui Eliezerpaj churica Rehabiasmi. Rehabiaspaj churica Jesaiasmi. Jesaiaspaj churica Jorammi. Jorampaj churica Zicrimi. Zicripaj churica Selomitmi carca.

²⁶Selomit paipaj huauquicunandijca, jatun mandaj David, ñaupa yayacunamanta mirarishca quiquinpurallata mandajcuna, 1.000 soldadocunata mandajcuna, patsaj soldadocunata mandajcuna, tucui soldadocunata mandajcunapish Diospajlla ch'icanchishpa cushca achca valijcunata cuidajcunami carca.

²⁷Chaicunataca macanacuipi mishashpa japishcacunatami, paicunaca Mandaj Diospaj huasita allichingapaj ch'icanchishcacuna carca.

²⁸Shinallataj Dios huillachishcata huillaj Samuel, Cispaj churi Saúl, Nerpaj churi Abner, Sarviapaj churi Joabpish maijan shujtajcunapish Diospajlla ch'icanchishpa cushcacunatami Selomit paipaj huauquicunandijca cuidana carca.

²⁹Izharpaj huahua huahuapura Quenanías paipaj churicunandijca, israelcunapurapi mandajcuna, juezcunami carca. Paicunaca Diospaj huasipica, mana imata ricunapaj carcachu.

³⁰Hebronpaj huahua huahuapura Hasabiasca, paipaj familiapurallataj, 1.700 c'ari c'ari runacunahuanmi Jordán yacumanta inti huashicun ladoman causaj israelcunataca Diospajta rurajcunatapish, jatun mandajpajta rurajcunatapish mandajcuna carca.

³¹Hebronpaj huahua huahuacunataca, Jeriasmi mandacurca. Hebronpaj huahua huahuacunataca paicunapaj ñaupa yayacunamanta mirarishcacunata paicunapurallata ch'icanyachishcacunataca Davidca, ña chuscu chunga huatacunata mandacushpami, paicunapaj shuticunata quillcashpaca, Galaad llajtapi caj Jazer pueblopi causajcunapurapi alli yuyaiyuj, c'ari c'ari runacuna tiyashcata japirca.

³²Jeriaspaj huauquicunapish chashnallataj c'ari c'ari 2.700 runacunami carca. Paicunatami jatun mandaj Davidca Rubenpaj, Gadpaj aillucunatapish, Manasespaj chaupi aillutapish mandachun churarca. Paicunami Taita Diospajta rurajcunata, jatun mandajpajta rurajcunatapish mandajcuna carca.