Read Chimborazo Highland Quichua 1 CRÓNICAS 27 Bible Online

1 CRÓNICAS 27 - Chimborazo Highland Quichua bible

1 CRÓNICAS 27

¹Jatun mandaj David israelcunata mandachun churashca mandajcunaca caicunami: Ñaupa yayacunamanta mirarishca quiquinpuralla caj soldadocunata mandajcuna, 1.000 soldadocunata mandajcuna, patsaj soldadocunata mandajcunami carca. Chai mandajcunami huatanta, cada quilla jatun mandajpajta rurangapaj shamujcunataca yaicujcunatapish llujshijcunatapish ricujcuna carca. Chunga ishquipi ch'icanchishcacunaca cada mirgapimi 24.000, 24.000 soldadocuna carca.

²Huatapaj punta quillapi shamuj, 24.000 soldadocunata mandajca Zabdielpaj churi Jasobeammi carca.

³Paica Farespaj huahua huahuapura, punta quillapi shamuj soldadocunata mandajcunata mandajmi carca.

⁴Ishqui quillapi shamuj 24.000 soldadocunata mandajca Ahoha pueblomanta caj Dodaimi carca. Paipaj soldadocunata paipaj q'uipa mandajca, Miclotmi carca.

⁵Quimsa quillapi shamuj, 24.000 soldadocunataca curacunata mandaj Joiadapaj churi Benaiami mandaj carca.

⁶Chai Benaiami quimsa chunga soldadocunapuramanta ashtahuan c'ari c'ari, chai quimsa chunga soldadocunallatataj mandajpish carca. Yaya mandacun soldadocunapurapica Amisabad paipaj churipishmi carca.

⁷Chuscu quillapi shamuj, soldadocunataca Joabpaj huauqui Asaelmi mandaj carca. Paipaj q'uipaca paipaj churi Zebadiasmi mandaj carca. Pai mandacun mirga soldadocunapish 24.000mi carca.

⁸Pichca quillapi shamuj, soldadocunataca Izrai pueblomanta caj Samhutmi mandaj carca. Pai mandacun mirga soldadocunapish 24.000mi carca.

⁹Sujta quillapi shamuj, soldadocunataca Tecoamanta caj Iquespaj churi Irami mandaj carca. Pai mandacun mirga soldadocunapish 24.000mi carca.

¹⁰Canchis quillapi shamuj, soldadocunataca Pelon pueblomanta Efrainpaj huahua huahuapura caj Helesmi mandaj carca. Pai mandacun mirga soldadocunapish 24.000mi carca.

¹¹Pusaj quillapi shamuj, soldadocunataca Husat pueblomanta caj Zerapaj huahua huahuapura Sibecaimi mandaj carca. Pai mandacun mirga soldadocunapish 24.000mi carca.

¹²Iscun quillapi shamuj, soldadocunataca Anatot pueblomanta caj Benjaminpaj huahua huahuapura Abiezermi mandaj carca. Pai mandacun mirga soldadocunapish 24.000mi carca.

¹³Chunga quillapi shamuj, soldadocunataca Netofat pueblomanta caj Zerapaj huahua huahuapura Maharaimi mandaj carca. Pai mandacun mirga soldadocunapish 24.000mi carca.

¹⁴Chunga shuj quillapi shamuj, soldadocunataca Piratón pueblomanta caj Efrainpaj huahua huahuapura Benaiami mandaj carca. Pai mandacun mirga soldadocunapish 24.000mi carca.

¹⁵Chunga ishqui quillapi shamuj, soldadocunataca Netofat pueblomanta caj Otonielpaj huahua huahuapura Heldaimi mandaj carca. Pai mandacun mirga soldadocunapish 24.000mi carca.

¹⁶Israel aillucunata mandajcunaca caicunami: Rubén aillutaca, Zicripaj churi Eliezermi mandaj carca. Simeón aillutaca, Maacapaj churi Sefatiasmi mandaj carca.

¹⁷Leví aillutaca Kemuelpaj churi Hasabiasmi mandaj cara. Aaronpaj huahua huahua curacunataca Sadocmi mandaj carca.

¹⁸Judá aillutaca, Davidpaj huauqui Eliumi mandaj carca. Isacar aillutaca, Micaelpaj churi Omrimi mandaj carca.

¹⁹Zabulón aillutaca, Abdiaspaj churi Ismaiasmi mandaj carca. Neftalí aillutaca, Azrielpaj churi Jerimotmi mandaj carca.

²⁰Efraín aillutaca, Azaziaspaj churi Oseasmi mandaj carca. Manasespaj chaupi aillutaca, Pedaiaspaj churi Joelmi mandaj carca.

²¹Galaad llajtapi caj Manasespajllataj caishuj chaupi aillutaca Zacariaspaj churi Iddomi mandaj carca. Benjamín aillutaca, Abnerpaj churi Jaasielmi mandaj carca.

²²Danpaj aillutaca, Jerohampaj churi Azareelmi mandaj carca. Tucui chaicunami Israel aillucunata mandajcuna carca.

²³Mandaj Diosca israelcunataca, jahua pachapi tiyaj luzerocunata shina mirachisha nishcamantami Davidca, ishqui chunga huatayujcunataca mana yupachirca.

²⁴Sarviapaj churi Joab israelcunata yupai callarijpi, israelcunapajca jatun llaqui shamujpimi mana tucui yuparca. Chaimantami jatun mandaj David imallata rurashcata quillcashcacunapica israelcuna mashna cashcaca mana quillcashca tiyan.

²⁵Adielpaj churi Azmavetca, jatun mandajpaj tucui imalla achca valijcunata cuidajmi carca. Shinallataj chagrata rurana allpacunapipish, pueblocunapipish, pueblocuna muyundij llajtacunapipish, torrecunapipish granocunata huaquichijcunataca Uziaspaj churi Jonatanmi mandaj carca.

²⁶Jatun mandajpaj chagrata rurajcunataca, Quelubpaj churi Ezrimi mandaj carca.

²⁷Uva chagracunata rurajcunataca, Ramá pueblomanta Simeimi mandaj carca. Uvata capishcata huaquichinacunapi huaquichijcunataca Sifmot pueblomanta Zabdimi mandaj carca.

²⁸Sefela pambapi tiyaj olivo yura chagracunapi, higo chagracunapi trabajajcunataca Geder pueblomanta Baal-hananmi mandaj carca. Olivo aceiteta huaquichijcunataca, Joasmi mandaj carca.

²⁹Sarón llajtapi huagracunata michijcunataca, Sarón pueblomanta caj Sitraimi mandaj carca. Pugru pambacunapi huagracunata michijcunataca Adlaipaj churi Safatmi mandaj carca.

³⁰Camellocunata michijcunataca, Ismaelpaj huahua huahuapura Obilmi mandaj carca. Burrocunata michijcunataca, Meronot pueblomanta caj Jehediasmi mandaj carca.

³¹Ovejacunata michijcunataca agarenopura Jazizmi mandaj carca. Tucui paicunami jatun mandaj Davidpaj haciendapi imallata rurajcunataca tucuita alli ricushpa mandajcuna carca.

³²Davidpaj tío Jonatanca Davidman yuyaita cushpa cunaj, alli yuyaiyujpish, quillcajpishmi carca. Hacmonipaj churi Jehielca jatun mandajpaj churicunahuanmi caj carca.

³³Ahitofelpish, jatun mandajman yuyaita cushpa cunajmi carca. Arquitacunapura Husaica, jatun mandajhuan alli apanacujmi carca.

³⁴Ahitofel mandacushcataca Benaiapaj churi Joiadahuan, Abiatarhuanmi japircacuna. Joabca, jatun mandajpaj tucui soldadocunata mandajmi carca.