Read Chimborazo Highland Quichua 1 CRÓNICAS 29 Bible Online

1 CRÓNICAS 29 - Chimborazo Highland Quichua bible

1 CRÓNICAS 29

¹Chai q'uipami jatun mandaj Davidca, tucui chaipi tandanacushcacunataca: “Taita Diosca ñuca churi Salomonllatami agllashca. Paica chairaj huambrarajmari. Ashtahuanpish Mandaj Taita Diospaj huasita shayachinaca sinchimari. Chai huasica mana runapajchu, ashtahuanpish Mandaj Diospajmari.

²Ñucaca tucui yuyaihuanmi, ñuca Diospaj huasita shayachingapajca, tucuita tandachircani. Curimanta rurana cashcapajca curita, cullquimanta rurana cashcapajca cullquita, broncemanta rurana cashcapajca bronceta, fierromanta rurana cashcapajca fierrota, caspimanta rurana cashcapajca caspitami tandachircani. Shinallataj ónice rumicunatapish, shujtaj sumaj rumicunatapish, yana rumicunatapish, tucui laya color rumicunatapish, tucui laya sumaj rumicunatapish, mármol rumicunatapishmi achcata tandachircani.

³Mandaj Diospaj huasita shayachinata munashcamantaca paipaj huasita shayachingapaj tucui chaicunata tandachishca jahuapish ñuca quiquinpaj huaquichishca curita cullquitapishmi cuni. Chaicunataca:

⁴Mandaj Diospaj huasi pata quinrita llihuinapajmi Ofirmanta apamushca 3.000 talento curita, 7.000 talento ashtahuan alli cullquitapish cuni.

⁵Curihuan rurana cashcapajca curita, cullquihuan rurana cashcapajca cullquitami cuni. Chaicunahuanmi imatapish ruranata yachajcunaca sumajta rurangacuna. ¿Cancunamanta maijantaj cunan punllaca Mandaj Diospaj huasipaj shungumanta ofrendata cushun ninguichij?” nircami.

⁶Chashna nijpica familiacunata mandajcunapish, Israel aillucunata pushajcunapish, 1.000 soldadocunata mandajcunapish, patsaj soldadocunata mandajcunapish, jatun mandajpaj haciendapi imallata rurajcunata mandajcunapish quiquin shungu yuyashca shinami Diosman curcacuna.

⁷Paicunaca Diospaj huasipajca, 5.000 talento curita, 10.000 dracma curita, 10.000 talento cullquita, 18.000 talento bronceta, 5.000 talento fierrotapishmi curcacuna.

⁸Sumaj achij nicuj rumicunata charijcunapish, Diospaj huasipi huaquichinapajmi, Gersonpaj huahua huahuapura Jehielman curcacuna.

⁹Mandaj Diosmanca tucui shunguhuan tucui munaihuan cujpimi, tucui chaipi cajcunaca cushicurcacuna.

¹⁰Jatun mandaj Davidpish achcata cushicushpami, tucui chaipi tandanacushcacunapaj ñaupajpi Mandaj Diosta allimari cangui nishpaca: “Mandaj Taita Dioslla, canmari ñucanchij ñaupa yaya Israelpaj Dios cangui. Can Diostaca huiñai huiñaita alli nishca cachun.

¹¹Mandaj Dioslla, jatun canapish, tucuita rurai tucuj canapish, sumaj canapish, mishaj canapish, alli nishca canapish cambajmi. Jahua pachapi imalla tiyajcunapish, cai pachapi imalla tiyajcunapish cambajmi. Mandaj Dioslla mandanapish cambajmi. Can Mandaj Diosca tucuicunata cazuchijmi cangui.

¹²Charij canapish, sumaj canapish canmantami shamun. Canmi tucuicunata cazuchingui. Fuerzapish, tucuita rurai tucuj canapish cambaj maquipimi. Tucuicunaman jatun canata, imatapish rurai tucuj canata cunaca cambaj maquipimi.

¹³Chaimantami cunanca ñucanchij Dios cambaj sumaj shutita alabanchij, cambaj sumaj shutita alli ninchij.

¹⁴Ñucapish, ñuca mandacun cai tucuicunapish cai tucuicunata ñucanchij cusha nishcamanta canman cungapajca ¿pitaj canchigari? Tucui imapish cambajmi. Cambaj maquimanta japishcallatami canman cunchij.

¹⁵Cambaj ñaupajpica ñucanchij ñaupa yayacuna shinallataj shujtaj llajtamanta shamushcacunalla, ñanta pasajcuna shinallami canchij. Ñucanchij causaipish cai pachapica, llandu shina ñapish chingarijllami.

¹⁶Ñucanchijta Mandaj Taita Dioslla, cambaj jucha illaj shuti chai huasipi cachun shayachingapaj cai tucuitaca cambaj maquimanta japishpami cambaj cachun tandachircanchij. Tucui chaica cambajmi.

¹⁷Ñuca Dioslla, canca ñucanchij shungupi yuyashcataca callarishpami ricucungui. Alli cajllatami munangui, chaitaca yachanimi. Chaimantami ñuca tucui shunguhuan cunata munashcamanta tucui caicunataca canman curcani. Shinallataj cunan caipi tandanacushca can agllashcacunapish mana llaquishpa, tucui shunguhuan cai tucuita canman cujta ricushpaca cushicunimi.

¹⁸Ñucanchij ñaupa yaya Abrahampaj, yaya Isaacpaj, yaya Israelpaj Mandaj Taita Dioslla can agllashca cai tucuicunapaj shungutaca cashna paicunapaj quiquin munaihuantaj canman cushpa huiñaipaj chai yuyailla canata cungui. Can yuyailla cachun paicunapaj shungupi yuyachipangui.

¹⁹Chashnallataj ñuca churi Salomonmanpish can mandashcacunata, can ima shina cashcata ricuchishpa causanata, chaitataj pajtachichun nishcata pajtachinata, tucui imalla rurana cashcata ruranata, cambaj huasita shayachichunpish alli shunguta cupangui. Chai huasita shayachichunca ñami imalla minishtirishcataca allichircani” nircami.

²⁰Chashna nishca q'uipami Davidca, tucui chaipi tandanacushcacunataca: “Cunanca cancunata Mandaj Taita Diosta allimari cangui nichij” nirca. Shina nijpica tucuicunami paicunapaj ñaupa yayacunata Mandaj Diostaca allimari cangui nishpa, Mandaj Diospaj ñaupajpipish, jatun mandaj Davidpaj ñaupajpipish cungurishpa adorarcacuna.

²¹Chai cayandij punllaca Mandaj Diosman sacrificiocunata cushpami, 1.000 bizicunata, 1.000 carnerocunata, 1.000 c'ari ovejacunatapish vinota tallishpa tucui rupachircacuna. Tucui israelcuna cushca achca sacrificiocunatapishmi curcacuna.

²²Chai punllaca, jatunta cushicushpami Mandaj Diospaj ñaupajpica micurcacuna, ubyarcacuna. Shinallataj Davidpaj churi Salomontapish Mandaj Diospaj ñaupajpimi cutinllataj jatun mandaj cashpa churana cashca churanata churachishpa aceitehuan umapi churarcacuna. Sadoctapish curacunata mandaj cachunmi churarcacuna.

²³Chaimi Salomonca, Mandaj Dios cushca mandanapica, paipaj yaya Davidpaj randi tiyarirca. Paica tucui imapipish allimi carca. Tucui israelcunami cazurcacuna.

²⁴Tucui mandajcunapish, c'ari c'ari cajcunapish, jatun mandaj Davidpaj tucui caishuj churicunapishmi, jatun mandaj Salomonta alli nishpa cazushunmi nircacuna.

²⁵Mandaj Diosca Salomontaca, pai mandacunpica tucui imata ruranapipish allita rurachishpami tucui israelcunapaj ñaupajpi yallitaj jatunyachirca. Israelcunata paipaj ñaupa mandaj cashca jatun mandajcunaca chashnataca pi mana charircacunachu.

²⁶Isaipaj churi Davidca, chashnami tucui israelcunata mandarca.

²⁷Davidca tucuimantaca chuscu chunga huatacunatami israelcunata mandarca. Canchis huatacunataca, Hebronpimi mandarca. Quimsa chunga quimsa huatacunataca, Jerusalenpimi mandarca.

²⁸Paica achcata charij, tucuicuna alli nishca achca huatacunata causashpa yallitaj yuyaj cashpami huañurca. Pai huañujpica, paipaj churi Salomonmi paipaj randi mandarca.

²⁹Jatun mandaj David callarimanta huañungacama imallata rurashcacunaca Dios huillachishcata huillaj Samuel parlashpa quillcashca libropi, profeta Natán parlashpa quillcashca libropi, Dios huillachishcata huillaj Gad parlashpa quillcashca libropipishmi quillcashca tiyacun.

³⁰Chai quillcashcacunapica, pai ima shina mandaj cashcapish, pai ima shina cazuchij cashcapish, paipi imalla tucushcacunapish, tucui israelcuna imalla tucushcacunapish, pai maillata mandacun llajtacuna imalla tucushcacunapishmi quillcashca tiyacun.