Read Chimborazo Highland Quichua 2 CRÓNICAS 11 Bible Online

2 CRÓNICAS 11 - Chimborazo Highland Quichua bible

2 CRÓNICAS 11

¹Roboam Jerusalenman shamushpaca, Judá ailluta, Benjamín ailluta tandachishpami, 180.000 ashtahuan alli macanacuj runacunata agllarca. Roboamllataj tucui israelcunata mandangapaj, paipajman tigrachingapaj macanacungapajmi chashna tandachirca.

²Ashtahuanpish Mandaj Diosca, Taita Diospaj Semaías runatami cashna nirca:

³“Judá llajtata jatun mandaj Salomonpaj churi Roboamtapish, Judá aillutapish, Benjamín aillutapish cashna nigri:

⁴Mandaj Diosca cashnami nin: Cancunapaj quiquin huauqui israelcunapajmanca ama huichiyaichijchu, paicunahuanca ama macanacugrichijpishchu. Ñucallatajmi ch'icanchircani, tucuicuna cancunapaj huasicunaman tigraichijlla ninmi nigri” nircami. Paicunaca Mandaj Dios nishcata uyashpami Mandaj Dios nishca shinallataj paicunapaj huasicunaman tigrarcacuna.

⁵Roboamca, Jerusalenpimi mandashpa causarca. Paica Judá llajta ashtahuan sinchi cachunmi, pueblocuna muyundijta jatun pircacunata rurarca.

⁶Belén, Etam, Tecoa,

⁷Bet-sur, Soco, Adulam,

⁸Gat, Maresa, Zif,

⁹Adoraim, Laquis, Azeca,

¹⁰Zora, Ajalón, Hebrón shuti pueblocuna muyundijpimi jatun pircacunata rurarca. Chai pueblocunaca Benjamín llajtapi, Judá llajtapimi carca.

¹¹Shinallataj jatun torrecunatapishmi ashtahuan sinchita rurachirca. Chaicunapi cuidachun soldadocunata churashpaca, paicunapaj micunatapish, aceitetapish, vinotapishmi curca.

¹²Tucui pueblocunapajmi escudocunatapish, lanzacunatapish curca. Chashna tucuita allichishpami Roboamca Judá llajtata, Benjamín llajtata mandarca.

¹³Israel llajtapi causacushca tucui curacunapish, levitacunapishmi maillapi causacushcamantaca Roboamhuan tandanacungapaj Jerusalenman shamurcacuna.

¹⁴Jeroboam, paipaj churicunahuanmi curacunatapish, levitacunatapish, Diospajta ruracushcamanta llujshichircacuna. Chaimantami paicunaca Israelmantaca, michina allpacunatapish, ima shujtaj charishcacunatapish shitashpa, Judapi caj caishuj pueblocunapipish, Jerusalenpipish causanaman shamurcacuna.

¹⁵Jeroboamca paillatajmi lomacunapi tiyaj altarcunapajpish, supaicunapajpish, pai rurachishca bizi dioscunapajpish shujtaj curacunata churarca.

¹⁶Israelcunata Mandaj Diosta tucui shunguhuan catisha nijcunaca, tucui aillucunapurallamantatajmi levitacunata catishpa Jerusalenman shamurcacuna. Paicunapish, paicunapaj ñaupa yayacunapaj Mandaj Diosmanmi sacrifiocunata cungapaj shamurcacuna.

¹⁷Chashnami Judá llajtatapish, Salomonpaj churi jatun mandaj Roboamtapish quimsa huatacamaca pi mana cuyuchipaj shinata rurarcacuna. Roboamca quimsa huatacamallami David shina, Salomón shina Diosta cazushpa causarca.

¹⁸Roboamca, Abihail huarmipi David charishca Jerimot shuti churipaj ushushi Mahalattami paipaj huarmi cachun japirca. Abihailca, Eliabpaj ushushimi carca. Eliabca, Isaipaj churimi carca.

¹⁹Mahalat huarmihuan Roboam charishca churicunaca: Jeús, Semarías, Zaham shuticunami carca.

²⁰Mahalathuan cazarashca q'uipami, Absalonpaj ushushi Maacata paipaj huarmi cachun japirca. Chai huarmihuanca: Abías, Atai, Ziza, Selomit shuti churicunatami charirca.

²¹Roboamca quiquin huarmicunataca, chunga pusaj huarmicunatami charirca. Caishuj huarmicunataca, sujta chunga huarmicunatami charirca. Quiquin huarmicunapuramantapish, caishuj huarmicunapuramantapish yallica, Absalonpaj ushushi Maacatami yallitaj c'uyarca. Huahuacunataca tucuimantaca ishqui chunga pusaj churicunata, sujta chunga ushushicunatami charirca.

²²Roboamca, Maaca huarmipi charishca churi Abiastami, jatun mandaj cachun churanata munarca. Chaimantami paitaca tucui huauquicunata mandachun churarca.

²³Tucui churicunatami Judá llajtapi, Benjamín llajtapi caj pueblocunaman cacharca. Paicunaman cushca pueblocunaca, muyujta jatun pircacunayujmi carca. Chai pueblocunapi churashpami, achca allicunatapish curca. Shinallataj achca huarmicunahuanmi cazarachirca. Alli yuyarishpami, chai tucuita rurarca.