Read Chimborazo Highland Quichua 2 CRÓNICAS 12 Bible Online

2 CRÓNICAS 12 - Chimborazo Highland Quichua bible

2 CRÓNICAS 12

¹Roboamca, ñami tucuita alli mandacurca. Chashna pi mana imata nipaj shina cajpimi, Roboamca Mandaj Dios cushca mandashcataca mana ashtahuan pajtachishpa catirca. Chaita ricushpaca, tucui israelcunapishmi chashnallataj rurarcacuna.

²Mandaj Diosta mana cazushcamantami, Jatun mandaj Roboam mandacushca ña pichca huatacunata tucujpica, Egiptota jatun mandaj Sisac shamushpa Jerusalenpi causajcunahuan macanacurca.

³Sisac runaca, 1.200 carrocunahuan, caballocunapi tiyarishca, 60.000 runacunahuanpishmi shamurca. Shinallataj Libia llajtamantapish, suquienoscunatapish, Etiopía llajtamantapish mana yupai tucuipaj yallitaj achca soldadocunatapishmi Egipto llajtamanta apamurca.

⁴Tucui chaicunahuan Judaman shamushpami, muyundijta jatun pircacunayuj pueblocunapi causajcunahuan macanacushpa mishashpaca, Jerusalenmanpish chayarca.

⁵Chaimi profeta Semaiasca, Roboampajman rirca. Jatun mandaj Sisac macanacunaman shamushcamantami, Judá llajtapi causajcunata tucui mandajcunapish, Jerusalenpi Roboamhuan tandanacushcacuna carca. Tucui paicunatapish, Roboamtapishmi Semaiasca cashna nirca: — Mandaj Diosca cashnami nin: Cancunami ñucamanta anchurircanguichij. Chaimantami cunanca ñucapish cancunataca, Sisacpaj maquipi churagrini ninmi — nircami.

⁶Shina nijpica israelcunata mandajcunapish, jatun mandajtaca: — Mandaj Diosca cashcatamari rurashca — nishpa, tucui shunguhuan llaquirircacuna.

⁷Chaimantami Mandaj Diosca, Semaiastaca: “Paicuna mana allita rurashcamantaca, llaquirijta ricunimi. Chaillamantami mana llaquichigrini. Ashtahuanpish ñallami cai llaquimanta llujshichigrini. Jerusalenpi causajcunahuan ñuca p'iñarishca cashpapish, ña mana Sisacta cachashpa llaquichigrinichu.

⁸Shina cashpapish, cunanca paipajta rurajcunami cagringuichij. Chashnami cancunaca ñucapajta rurashpa causanapish, shujtaj llajtacunata jatun mandajcunapajta rurashpa causanapish ima shina cashcata yachanguichij” nishpami huillachirca.

⁹Egiptota jatun mandaj Sisacca, Jerusalenman huichiyashpami, Mandaj Diospaj huasipi tiyaj achca valij huaquichishcacunata, mandashpa tiyana huasipi tiyaj achca valij huaquichishcacunataca tucuita aparca. Salomón rurachishca curi escudocunatapishmi tucuita aparca.

¹⁰Chai escudocunapaj randica Jatun mandaj Roboamca, bronce escudocunata rurachishpami, mandashpa tiyana huasi pungupi cuidaj soldadocunaman cuidachun curca.

¹¹Mandaj Diospaj huasiman jatun mandaj rijpica, cuidaj soldadocunaca chai escudocunata apashpami paihuan rijcuna carca. Chai q'uipaca, cuidajcuna cuidacun ucullapitajmi churagrijcuna carca.

¹²Roboamca chashna tucui shunguhuan llaquirishcamantami, Mandaj Diosca paihuan yallitaj p'iñarishca cashpapish alli tucurca. Chaimantami mana tucuita chingachirca. Judá llajtapi causajcuna mana allita ruracujpipish, alli causai tiyarcami.

¹³Mandaj Diosca paita yuyarinapaj cachunca, tucui Israel aillucunapaj pueblocunamantaca Jerusalentami agllashca carca. Jatun mandaj Roboamca mandanata allichishpami, chai pueblollapitaj mandashpa catirca. Paica mandai callarinapajca, chuscu chunga shuj huatayujmi carca. Chunga canchis huatatami Jerusalenpi mandarca. Paipaj mamaca, amonitapuramanta Naama shutimi carca.

¹⁴Roboamca millaitami rurashpa causarca. Mandaj Diostaca, mana tucui shunguhuan mashcanata yuyarcachu.

¹⁵Roboam ashtahuan imallata rurashcataca, profeta Semaiaspish, Dios ricuchishcata huillaj Iddopishmi quillcarcacuna. Chai quillcacunaca huasi ucupurata quillcana librocunahuanmi tiyacun. Roboamca Jeroboamhuanca, tucui causaipimi macanacujcuna carca.

¹⁶Roboam paipaj ñaupa yayacunahuan dormijpica, Davidpaj pueblopimi pambarcacuna. Paipaj randica, paipaj churi Abiasmi mandarca.