Read Chimborazo Highland Quichua 2 CRÓNICAS 17 Bible Online

2 CRÓNICAS 17 - Chimborazo Highland Quichua bible

2 CRÓNICAS 17

¹Asapaj randica paipaj churi Josafatmi, Judá llajtataca mandarca. Paica c'ari c'ari tucushpami, israelcunataca cumurichirca.

²Paica Judá llajtapi caj pueblocunapica, muyundijta jatun pircacunayuj pueblocunapimi soldadocunata churarca. Shinallataj chapaj soldadocunatapishmi Judá llajtapica churarca. Efraín llajtapi caj pueblocunata israelcunata paipaj yaya Asa quichushca pueblocunapipishmi, cuidaj soldadocunata churarca.

³Josafatca mandai callarishpaca, paipaj ñaupa yaya David rurashca shinami Diosta cazushpa allita rurashpa causarca. Baal dioscunataca mana catircachu. Chaimantami Mandaj Diosca paihuan carca.

⁴Paipaj Diosta catishpami, mana caishuj israelcuna shina causarca. Ashtahuanpish Dios mandashcacunatami cazuj carca.

⁵Chaimantami Mandaj Diosca, mandanapica pi mana cuyuchipajta charirca. Judá llajtapi causajcunaca tucuicunami ima allicunatapish curcacuna. Chaimantami yallitaj charijpish, tucuicuna alli nishcapish tucurca.

⁶Mandaj Dios ayudajpimi, Josafatca Mandaj Diospajllata rurashpa causarca. Lomacunapi tiyaj altarcunatapish, Asera huarmi diosman rijchajcunatapish Judá llajtamantaca tucuita anchuchirca.

⁷Ña quimsa huatata mandacushpami, paipajta ruraj Ben-hail, Abdías, Zacarías, Natanael, Micaías shuti mandajcunataca Judá llajtapi caj pueblocunapi causajcunaman Diosmanta yachachichun cacharca.

⁸Paicunahuan yachachichunca, Semaías, Netanías, Zebadías, Asael, Semiramot, Jonatán, Adonías, Tobías, Tob-adonías shuti levitacunatami cacharca. Shinallataj Elisama, Joram shuti curacunatapishmi cacharca.

⁹Tucui paicunami Judá llajtapi causajcunamanca, Mandaj Dios mandashcata quillcashca librota apashpa, tucui pueblocunata purishpa yachachircacuna.

¹⁰Chaimantami Judá llajta muyundijpi caj tucui llajtacunapi causajcunaca, Mandaj Diosta yallitaj mancharcacuna. Chaimantami Josafathuan macanacunatapish mancharcacuna.

¹¹Filisteocunaca Josafatmanca convidanacunatapish, impuesto cullquitapishmi curcacuna. Shinallataj arabecunaca animalcunatapish, 7.700 carnerocunatapish, 7.700 c'ari chivocunatapishmi huatanta cujcuna carca.

¹²Chashna cujpimi Josafatca ashtahuan, ashtahuan charijyashpa alli nishca tucurca. Paica Judá llajtapica torrecunatapish, granocunata huaquichina pueblocunatapishmi rurarca.

¹³Tucui Judá llajtapimi, achca allicunata charirca. Jerusalenpipish yallitaj c'ari c'ari soldadocunatami charirca.

¹⁴Chai soldadocunaca, maijanlla yayacunapaj huahua huahuacuna cashcata ricujpica caicunami: Judá aillupaj huaranga huaranga soldadocunata mandajca, Adnasmi carca. Paica ashtahuan c'ari c'ari, 300.000 soldadocunatami mandaj carca.

¹⁵Caishuj mandaj soldadoca, Johananmi carca. Paica, 280.000 soldadocunatami mandaj carca.

¹⁶Caishuj mandajca, Zicripaj churi Amasiasmi carca. Paimi Mandaj Diospajta rurangapajca paipaj quiquin munaihuan ari nirca. Paica, 200.000 c'ari c'ari soldadocunatami mandaj carca.

¹⁷Benjamín aillumantaca, Eliadami mandaj carca. Paica, 200.000 soldadocunata mandaj, c'ari c'ari mana manchaj soldadomi carca. Chai soldadocunaca arcocunahuan, escudocunahuan allichirishcacunami carca.

¹⁸Chaipaj q'uipa mandajca, Jozabadmi carca. Paica macanacungapaj allichirishca, 180.000 soldadocunatami mandaj carca.

¹⁹Tucui chaicunami jatun mandaj Josafatpajta rurajcuna carca. Judá llajtallapitajmi, muyundijta jatun pircacunayuj pueblocunapipish cuidaj, shujtaj soldadocunata charirca.