Read Chimborazo Highland Quichua 2 CRÓNICAS 18 Bible Online

2 CRÓNICAS 18 - Chimborazo Highland Quichua bible

2 CRÓNICAS 18

¹Josafatca yallitaj charij, tucuicuna alli nishcami carca. Paica Acabpaj familiami tucurca.

²Josafatca, unipimi Acabta ricunaman Samaria puebloman rirca. Pai chayajpimi Acabca, achca ovejacunatapish huagracunatapish huañuchishpa jatun micuita rurashpa paihuanpish, paihuan shamujcunahuanpish micurca. Chashna rurashpami Acabca, Josafattaca, Galaadpi caj Ramotpi causajcunahuan macanacunaman ñucaman ishqui tucushpa jaculla nishpa ari nichirca.

³Chaipimi Israel llajtata jatun mandaj Acabca, Judá llajtata jatun mandaj Josafattaca: — ¿Galaadpi caj Ramot pueblopi causajcunahuan ñucahuan macanacugringapaj shamusha ninguichu? — nijpica Josafatca: — Ñucapish canpish shuj shinallami canchij. Ñuca soldadocunapish cambaj soldadocuna cashca shinallatajmi. Chashna cashcamantaca, canhuan rishunllami.

⁴Shinallataj Josafatca, Israel llajtata jatun mandajtaca: — Mandaj Dios imata nishcata tapuchunmi rogani — nirca.

⁵Shina nijpimi israelcunata jatun mandajca, 400 profetacunata tandachishpaca: — ¿Galaad llajtapi caj Ramot pueblopi causajcunahuan macanacugrishunchu, mana cashpaca saquishallachu? — nirca. Shina nijpi paicunaca: — Macanacugrilla, Diosmi cambaj maquipi churanga — nircacuna.

⁶Shina nijpipish Josafatca: — Cai llajtapica ¿manachu Mandaj Diospaj profeta shujtaj runapish tiyan, paitapish tapushpa alli yachangapaj? — nircami.

⁷Josafat chashna nijpimi, israelcunata jatun mandajca: — Imlapaj churi Micaías profeta tiyanrajmi, paitapish Mandaj Dios imata nishcata tapunchijmanchari. Paica shuj cutinllapish ima allita manamari huillashcachu, ashtahuanpish llaquillatamari huillan. Chaimantami paitaca p'iñani — nijpi, Josafatca: — Jatun mandaj ama chashna rimaichu — nirca.

⁸Shina nijpi israelcunata jatun mandajca, paipajta ruraj shujta cayashpaca: — Imlanpaj churi Micaiasta pushamugri — nirca.

⁹Israelcunata jatun mandajpish, Judá llajtata jatun mandaj Josafatpish mandajcuna churana churanata churarishcami, Samaria puebloman yaicuna pungu c'uchullapi caj plazapi jatun mandajcuna tiyarinapi tiyacurcacuna. Profetacunaca tucuicunami paicunapaj ñaupajpi huillacurcacuna.

¹⁰Quenaanapaj churi Sedequiasca, fierro gachucunatami rurachishca carca. Chaimantami: “Mandaj Diosca cashnami nin: Siriocunataca, cai gachucunahuan sagmashpami tucuicunata huañuchinga ninmi” nircami.

¹¹Pai chashna nijpica, tucui caishuj profetacunapishmi: “Galaadpi caj Ramot puebloman huichiyailla. Mandaj Diosmari cambaj maquipi churashpa chai macanacuita mishachinga” nircacuna.

¹²Micaiasta pushagrij huillaj runaca paitaca: — Caishuj profetacunaca tucuicunami jatun mandajtaca, mishanguimi nishpa cushichicuncuna. Canpish jatun mandajtaca paicuna nishca shinallataj mishanguitajmi nishpa ashtahuan cushichingui — nircami.

¹³Shina nijpica Micaiasca: — Mandaj Diosca causajmi. Ñucaca Mandaj Dios imata huillachun nishcallatami huillasha — nishpa, Micaías jatun mandajpajman shamujpimi,

¹⁴jatun mandajca: — Micaías, Galaadpi caj Ramot pueblopi causajcunahuan ¿macanacungapajca huichiyashunchu mana cashpaca saquishallachu? — nijpi Micaiasca: — Macanacungapaj huichiyailla mishanguichijmi. Cancunapaj maquipimi churashca cangacuna — nircami.

¹⁵Shina nijpi jatun mandajca: — ¿Mashna cutincamataj imatapish chashnataj cana cajllapi Mandaj Diospaj shutipica huillangui nicushallari? — nircami.

¹⁶Shina nijpi Micaisca: — Tucui israelcunatami, michij illajlla ovejacuna shina urcucunapi caita chaita puricujta ricurcani. Chaimi Mandaj Diosca: Caicunaca mandaj illajllamari puricuncuna. Tucuicuna paicunapaj quiquin huasicunaman imata mana manchashpa tigrachunlla nirca — nircami.

¹⁷Shina nijpi israelcunata jatun mandajca Josafattaca: — Chai runaca ñucapajca ima alli cana cashcataca mana huillangachu, ashtahuanpish llaqui cana cashcallatami huillanga nircanimi. ¿Manachu chaillatataj huillan? — nirca.

¹⁸Shina nijpi Micaiasca: — Mandaj Dios imata nishcata uyayari. Ñucaca Mandaj Diostaca paipaj jatun tiyarinapi tiyacujtami ricurcani. Jahua pachapi paipajta rurajcunapish alli ladomanpish, lluqui ladomanpish cajtami ricurcani.

¹⁹Chaipimi Mandaj Diosca paicunataca: Galaadpi caj Ramot puebloman huichiyashpa israelcunata jatun mandaj Acab llaqui tucugrichunca ¿maijantaj chaipi macanacugrina yuyaita cushpa umanaman risha ninguichij? nijpi shujca shujta, caishujca shujtajtami ninacurca.

²⁰Chashna ninacucujpi Mandaj Diospaj shuj espíritu shamushpami: Ñuca chai yuyaita cugrisha nijpi Mandaj Diosca: ¿Ima shinataj umagringui? nirca.

²¹Shina nijpi chai espirituca: Ñuca rishpaca, tucui profetacunatami llullachishpa huillachigrini nijpimi Mandaj Diosca: Can nishca shinallataj rurashpa umagrilla. Paitaca umai tucunguimi nirca.

²²Mandaj Diosmi cambaj tucui profetacunapaj shimiman llullachij espíritu richun saquirca. Mandaj Diosllatajmi can llaqui tucuchunpish nirca — nircami.

²³Chaimi Quenaanapaj churi Sedequiasca, Micaiasta quijaduspi huajtashpaca: — Mandaj Diospaj Espirituca ñucamanta anchurishpaca ¿maitataj cambajman rishpaca chashnaca huillachingari? — nirca.

²⁴Shina nijpi Micaiasca: — Miticungapaj caishuj ucuman caishuj ucuman huasi ucupi puricui punllami chashnataj cashcataca yachangui — nirca.

²⁵Shina nijpi israelcunata jatun mandajca: — Micaiasta japishpa, pueblota mandaj Amonpajman, jatun mandaj churi Joaspajman apashpa,

²⁶cashna ninguichij: Cai runataca carcelpi churashpa macanacuita mishashpa ñuca mishashpa tigramungacama, ashitajllata carashpa, yacutapish p'ichijllata cushpa huanachicuichij ninmi jatun mandajca nigrichij — nircami.

²⁷Shina nijpipish Micaiasca: — Macanacuita mishashpa alli can tigramushpaca, ñucaca Mandaj Dios manapish chashna huillachijpi chashna huillashcataca yachangui — nircami. Chashna nishcahuanmi: “Tucuicunami cai nishcata uyanguichij” nirca.

²⁸Israelcunata jatun mandajhuan, Judá llajtata jatun mandaj Josafathuanca Galaadpi caj Ramot pueblomanmi huichiyarcacuna.

²⁹Chaipimi israelcunata jatun mandajca Josafattaca: — Ñucaca shujtaj churanata churarishpa macanacungapaj risha. Canca mandashpa tiyana cambaj churanallatataj churashpa ringui — nishpami, israelcunata jatun mandajca shujtaj churanata churarishpa macanacunaman rirca.

³⁰Siria llajtata jatun mandajca, carrocunapi purij paipaj soldadocunata mandajcunataca: “Israelcunahuanca soldadocunahuanpish soldadocunata mandajcunahuanpish ama macanacunguichijchu. Ashtahuanpish israelcunata jatun mandajllahuan macanacunguichij” nircami.

³¹Siria llajtapaj carrro soldadocunata mandajcuna Josafatta ricushpaca: “Paimi israelcunata jatun mandaj” ninacushpami, paihuan macanacungapaj chaupipi churarcacuna. Chaimi Josafatca, quishpichihuai nishpa Diosta mañarca. Chashna mañajpica Mandaj Diosca, chai soldadocunata paimanta anchuchircami.

³²Siria llajtapaj carro soldadocunata mandajcunaca israelcunata jatun mandaj mana cashcata ricushpami, Josafattaca mana ashtahuan catircacuna.

³³Ashtahuanpish shuj soldadomi, puntajlla caspita arcohuan yangalla shitajpi, chai caspica israelcunata jatun mandajca, churarishca fierro churana chaupita yaicushpa chugrichirca. Chaimi paipaj carrota apajtaca: — Chugrichishcamari cani. Carrota aisacuj caballocunata muyuchishpa, cai macanacuimanta ñucata llujshichi — nirca.

³⁴Sirio soldadocunahuan ch'imbapurashpami, chai punllaca israelcunata jatun mandajca, paipaj carrollapitaj shayashpa cainarca. Chaimi chai punllaca, sinchita macanacurcacuna. Jatun mandajca, inti huashicugrijpimi huañurca.