Read Chimborazo Highland Quichua 2 CRÓNICAS 19 Bible Online

2 CRÓNICAS 19 - Chimborazo Highland Quichua bible

2 CRÓNICAS 19

¹Judá llajtata jatun mandaj Josafatca, Jerusalenpi caj paipaj huasimanca ima mana tucushpa allimi tigrarca.

²Pai chayajpica Hananipaj churi, Dios ricuchishcata huillaj Jehú tupanaman llujshishpami cashna nirca: “Diosta mana manchaj runatamari ayudanaman rishcangui. Mandaj Diosta p'iñajcunahuanmari apanacungui. Chashna rurashcamantaca, cunanca Mandaj Diosca canhuan p'iñarishcami.

³Shina cashpapish, cai Judá llajtamanta Asera huarmi diosman rijchajcunata anchuchishpaca, cambaj tucui shunguhuantajmi Mandaj Diosta mashcarcangui. Chaillamantami can alli cashcataca ricushca” nircami.

⁴Josafatca, Jerusalén pueblopimi causarca. Shina cashpapish Beerseba pueblomantapacha, Efraín urcucamami tucui Judá llajtapi causajcunata ricushpa purij carca. Chashna purishpami, paicunapaj ñaupa yayacunata Mandaj Diosman cutirichun yachachij carca.

⁵Shinallataj Judá llajtapi caj pueblocunapica, muyundijta jatun pircayuj tucui pueblocunapimi juezcunata churarca.

⁶Chai juezcunataca: “Ima ruranapi cancunata churashcataca alli yuyaringuichij. Cancunaca mana maijan runapaj randichu mandacunguichij. Ashtahuanpish Mandaj Diospaj randimari mandanguichij. Cancuna imata ricuna cajpipish, Diosmi cancunahuan canga.

⁷Cancunaca Mandaj Diosta manchashpa causanguichij. Ñucanchijta Mandaj Taita Diosca manapish llaquichina cajta llaquichichunpish, ñahuita ricushpalla mitsachunpish, camaricunata huashalla japishpa mitsachunpish mana munanchu. Chashna cashcamantaca, cancuna rurana cashcataca alli yuyaihuan ruranguichij” nircami.

⁸Shinallataj Josafatca ima tiyajpipish, Mandaj Dios mandashca shina mandachunmi Jerusalenpica levitacunatapish curacunatapish caishuj israelcunapaj familiacunata mandaj yayacuna cachun churarca. Tucui pueblocunapi mandajcunata churashca q'uipami, Jerusalenman tigrarcacuna.

⁹Chaipica paicunatapish cashnami mandarca: “Caishuj pueblocunapi causaj cancunapaj huauquicuna imata cancunaman huillanaman shamujpipish, cancunaca Mandaj Diosta tucui shunguhuan, mana nij tucushpalla manchashpami, alli ricushpa allichina canguichij. Huañunacui tiyajpipish tucui mandashcacunata, imallata rurai nishcata, quillcachishcacunata, huillachishcacunata ricuchishpami rimana canguichij. Chashnami Mandaj Diosta ama p'iñachichun yachachina canguichij. Chashna rurajpimi cancunahuanpish, cancunapaj huauquicunahuanpish Diosca mana p'iñaringa. Cancunapish mana juchachishca canguichijchu.

¹¹Amarías curami, Mandaj Diospajta ruranapica, tucuita mandanga. Ñucapajta ruranapica, Judapaj huahua huahuacunata mandaj Zebadiasmi mandanga. Paica Ismaelpaj churimi. Shinallataj levitacunapish cancunapaj randi, Diospajta rurangapaj caipimi cangacuna. Cancuna imallata rurana cashcataca tucuicuna chai yuyai ruranguichij. Caicunata alli rurajtaca, Mandaj Diosmi pushanga” nircami.