Read Chimborazo Highland Quichua 2 CRÓNICAS 21 Bible Online

2 CRÓNICAS 21 - Chimborazo Highland Quichua bible

2 CRÓNICAS 21

¹Josafat paipaj ñaupa yayacunahuan dormijpica, Davidpaj pueblopi chai yayacunata pambashcallapitajmi pambarcacuna. Paipaj randica paipaj churi Jorammi mandarca.

²Paipaj huauquicunaca: Azarías, Jehiel, Zacarías, Azarías, Micael, Sefatías shuticunami carca. Tucui chaicunami Judá llajtata jatun mandaj Josafatpaj churicuna carca.

³Tucuicunamanmi paicunapaj yaya Josafatca achca curita, cullquita, ima sumaj charinacunata, jatun pircacunayuj pueblocunatapish Judá llajtapi cushca carca. Judá llajtata mandanataca, Joram paipaj punta churi cashcamantami, paiman cushca carca.

⁴Joramca, paipaj yayapaj randi mandanapi tiyarishpa, ña tucuita mandai callarishpaca, paipaj tucui huauquicunatami espadahuan huañuchirca. Israelcunata mandajcunapuramanta maijancunatapishmi huañuchirca.

⁵Joramca mandai callarinapajca quimsa chunga ishqui huatayujmi carca. Paica Jerusalenpica pusaj huatatami mandarca.

⁶Paica Israel llajtata jatun mandajcuna millaita rurashca ñancunallapitajmi purirca. Paipaj huarmi Acabpaj ushushi cashcamantaca Acabpaj familiacuna millaita rurashca shinallatajmi Mandaj Diospaj ñaupajpica millaita rurarca.

⁷Mandaj Diosca canman cambaj huahua huahuacunamanca huiñaipajmi lamparata churasha nishpami ari nishca carca. Chaimantami Mandaj Diosca Davidpaj huahua huahua jatun mandajcunataca, mana chingachisha nirca.

⁸Judá llajtata Joram mandacujpimi, Edom llajtapi causajcunaca judacuna mandacunmanta cachariringapaj, c'ariyashpa jatarircacuna. Paicunapurallamantatajmi quiquin mandajtapish churarcacuna.

⁹Chaimantami Joramca pai churashca mandajcunahuanpish, paipaj carrocunahuanpish macanacunaman rircacuna. Chaimantaca tuta jatarishpami, Edom llajtamanta shamushpa paicunapaj muyundijta chapacujcunataca macanacushpa misharcacuna. Paicunapaj carrocunapi purij soldadocunata mandajcunatapishmi misharcacuna.

¹⁰Shina cajpipish, edomitacunaca, Judá llajtata jatun mandajpaj maquimanta cacharichishpami cunancama chashna causacuncuna. Chai huatallapitajmi Libna pueblopi causajcunapish, pai mandacunmanta cacharirircacuna. Paipaj ñaupa yayacunata Mandaj Diosta cungarishcamantami, chashna tucurca.

¹¹Chashna mana mishai tucushca jahuami, Joramca Judá llajtapica lomacunapi altarcunata rurarca. Chaita rurashpami Jerusalenpi causajcunataca, rurashcalla dioscunata catishpa huainayachirca. Tucui Judá llajtapi causajcunatami, chai dioscunapi yuyaita churachirca.

¹²Chaimantami profeta Elías cachashca shuj quillcata paipajman chayachircacuna. Chai quillcapica cashnami nicurca: “Cambaj ñaupa yaya Davidta Mandaj Diosca cashnami nin: Canca mana cambaj yaya Josafat shinapish, cai Judá llajtallatataj jatun mandaj cambaj abuelo Asa shinapish causarcanguichu.

¹³Ashtahuanpish Israel llajtata jatun mandajcunatami catircangui. Judá llajtapi causajcunatapish, Jerusalenpi causajcunapishmi Acabpaj familiacuna rurashca shinallatataj millaita rurachircangui. Millai ñanpi churashpami huainayachircangui. Chaita rurashca jahuamari canta yalli alli caj cambaj tucui huauquicunatapish, cambaj yayapaj tucui familiacunatapish huañuchircangui.

¹⁴Chashna rurashcamantaca Mandaj Diosca can mandana tucui runacunatapish, cambaj huauquicunatapish, cambaj huarmicunatapish, can tucui imallata charishcacunatapish jatun ungüihuanmi llaquichigri.

¹⁵Cantapish jatun ungüicunahuanmi llaquichigrin. Cambaj huijsa tugyashpa, chunllullicuna tallirijtami ungungui” ninmi nishpa huillashpami, quillcashpa cachashca carca.

¹⁶Mandaj Diosca chashna huillachishca q'uipami filisteocunapipish, Etiopía llajtapi causajcunahuan caj arabecunapipish Joramta p'iñana yuyaita churarca.

¹⁷Chaimantami tucui chaicunaca Judá llajtapi causajcunahuan macanacungapaj huichiyarcacuna. Chaipi causajcunata mishashpami, jatun mandajpaj huasipi tucui imalla tiyashcatapish, paipaj huahuacunatapish, paipaj huarmicunatapish aparcacuna. Paipaj churicunapuramantaca, tucuicunapaj q'uipa churi Joacazllatami saquirca.

¹⁸Chai q'uipami Mandaj Diosca, Joramtaca ña mana alliyaipajta chunllullicunapi unguchirca.

¹⁹Ña ishqui huata shina unita ungushca cajpimi, huijsa cara ismujpi chunllullicuna llujshirca. Chai ungüihuanmi jatun nanaita apashpa huañurca. Pai huañujpica, paipaj ñaupa yayacuna huañui punlla rupachishca shina paita yuyarishpa ima rupachina cashcata mana rupachircacunachu.

²⁰Paica quimsa chunga ishqui huatayuj cashpa mandai callarishpaca, pusaj huatatami Judá llajtataca Jerusalenpi mandarca. Paica pi mana llaquishcami huañurca. Paitaca Davidpaj pueblopi pambashpapish, jatun mandajcunata pambana jutcucunapica mana pambarcacunachu.